Xitay kommunist partiyisige toqquz baha (1)

"Toqquz baha"gha kirish söz

Amérikida xitayche hem en'glizche neshr qilinidighan "ulugh éra géziti" ning "xitay kommunist partiyisige baha" namliq toqquz parche bash maqalisi 11 - ayning 19 - künidin bashlap élan qilinishqa bashlidi.

Bu "toqquz baha" üchün yézilghan kirish sözde mundaq dep bayan qilinidu: sabiq sowét ittipaqi we sherqi yawropadiki her qaysi kommunist hakimiyetliri gumran bolghandin kéyin "kommunizm" dégen nerse pütün dunya miqyasida exlet döwisige tashlandi. "Xitay kommunist partiyisi" dégen dunyadiki bu eng axirqi exletningmu tazilap chiqirilip kömüp tashlinidighan waqti yétip keldi.

Tarixqa qaraydighan bolsaq, -- dep bayan qilinidu "toqquz baha"ning kirish sözide, ---- xitay kommunist partiyisi hökümranliq qilghan bu bir qisqighine dewr xitay tarixidiki eng qarangghu - zulmetlik bir tarixiy dewr boldi. Yalghanchiliq, aldamchiliq, tehdit we qirghinchiliqqa tolghan bir dewr boldi. Bu dewrde, kommunist partiye peyda bolghanliki jayda yalghanchiliq, malimanchiliq, urush, tehdit, acharchiliq, mustebitlik, qirghinchiliq dawamliship keldi. Jemiyettiki en'eniwi exlaq - eqide ölchemliri buzuldi. Adem bilen adem otturisidiki munasiwet méhri - muhebbet munasiwiti emes, belki sinipi küresh dep atalghan öz - ara öchmenlik we nepret munasiwiti boldi. Kommunist partiyining "ka'inatqa qarshi küreshke atlinish, yer- zémin'ge qarshi küreshke atlinish, ademlerge qarshi küreshke atlinish" dégen aljighan shu'arining netijiside, ademler yashash üchün tayanmisa bolmaydighan ikologiyilik tengpungluq buzulup xelqqe bala- apet keldi. Xitayda yüz bergen mushundaq jinayi qilmishlarning hemmisini xitay kommunist partiyisi biwaste pilanlap peyda qildi.

"Toqquz baha" ning kirish sözide yene mundaq dep dawamliq bayan qilinidu, -- shunimu iqrar qilish kérekki, xitay kommunist partiyisi mushundaq jinayi qilmishlarni ötküzüshte tamamen bizdiki qorqunjaqliqtin paydilandi. Buni özimiz üstimizge élishmiz kérek. Qurulghili aran bir nechche on yil bolghan bu xitay kommunist partiyisi hazir puti görge sanggilighanda, özini nechche ming yilliq xitay medeniyitige mehkem chétiwélip, shu arqiliq dawamliq mewjut bolup turushqa uruniwatidu. Bu, uning yene bir aldamchiliqi. Wahalenki, hazir falun'gong xitay kommunist partiyisining jan tumurigha xenjer urdi. Emdi biz kommunist partiyisiz bir jemiyetni kütüwélishqa yüzlenmektimiz.

Xitay kommunist partiyisning qirghinchiliq qilish tarixi(1)

"Toqquz baha" ning "xitay kommunist partiyisning qirghinchiliq qilish tarixi" dégen qismida mundaq dep bayan qilinidu:

-- Xitay kommunist partiyisi hakimiyet qurghandin buyan öltürgen biguna adem sani 50 milyundin éship ketti. Hayatidin mehrum bolghan shu biguna ademlerning yürigi zide bolghan urugh -tughqanliri, ular öltürülgüchining biguna ikenlikini yaxshi bilgini üchün "xitay kommunist partiyisi zadi néme üchün bundaq naheq adem öltüridu" dégen su'algha jawab izdeshke bashlighan idi. Yéqinda kommunist partiye sichu'enning xenyu'en yézisida, hökümet élip barghan qurulushni déhqanlar bu xelqning yashash muhitini buzidighan qurulush dep qarap naraziliq bildürgenliki üchün yene oq chiqirip déhqanlarni qirghanda, xelq yene "xitay kommunist partiyisini xelqqe miltiq bilen mu'amile qilmay, gep - söz bilen mu'amile qilidighan qilghili bolamdu" dégen mesile üstide oylinishqa bashlidi. Shuni bilishimiz kérekki, kommunist partiye topulanggha, bulangchiliqqa, miltiqqa tayinip qurulghan idi, yene shuninggha tayinip mewjut bolup kelmekte. Maw zédong "jahanni maliman qilip andin tüzesh kérek, 7 - 8 yilda bir qétim shundaq qilip turush kérek" dégen idi.

Mawzédong mana shundaq 7 - 8 yilda bir qétim malimanchiliq peyda qilip, malimanchiliqni bana qilip qirghinchiliq yürgüzüsh arqiliq kommunist partiyning mewjutliqini saqlap kelgen. Uningdin kéyinki rehberlermu shundaq qilip kéliwa'itdu. Démek qirghinchiliq qilish xitay kommunist partiyisi özining siyasitini ijra qilishning birdin wastisi bolup keldi.

Xitay kommunist partiysi qirghinchiliq bilen mewjut bolup turmaqta

"Ulugh éra géziti"de élan qiliniwatqan "xitay kommunist partiyisige baha"dégen toqquz parche bash maqalining "xitay kommunist partiyisning qirghinchiliq qilish tarixi" dégen qismida mundaq dep bayan qilinidu: xitay kommunist partiyisi hakimiyet qurghandin buyan öltürülgen bigunah adem sani 50 milyondin ashidu. Hemmimizge melumki, xitay kommunist partiysi qirghinchiliq bilen mewjut bolup turmaqta. Mesilen, xitay kommunist partiyisi hakimiyet qurghandin kéyinla özining yer - zémin'ge we mal - mülükke igidarchiliq qilish mesilisini hel qilish üchün, aldi bilen yézilarda yer igilirini qirsa, sheherlerde burzhu'azilarni qirghan idi. Uningdin kéyin, üstqurulma jehette kommunist partiyining döletke rehberlik qilish hoquqini hel qilish üchün partiyige qarshi guruhlarni basturush, ongchilargha qarshi turush, eksiyetchi dini teshkilatlarni pachaqlash, ziyaliylarni özgertish dégen heriketlerni qozghidi.

Kommunist partiye özining medeniyet we siyasi jehettiki mutleq rehberlik hoquqini hel qilish üchün "medeniyet inqilabi" dégen heriketni qozghap xelqni bir- birige urushqa sélip öltürüshni yolgha qoydi. Kommunist partiye özini siyasi krizistin qutuldurush üchün ti'en'enmén meydanida démokratiyini telep qilghan xelqni qoralliq basturdi. Kommunist partiye jemiyette özining kommunizm idé'ologiyisini saqlap qélish üchün en'eniwi medeniyetni dawamlashturidighan falun'gongni basturdi.

Dunyada kommunizm gumran bolup, kompartiye hökümranliq qilidighan döletler parchilinip, izilgen milletler musteqilliqqa érishishke bashlighandin kéyin , xitay kommunist partiyisi xelqqe qarita qattiq basturushni yolgha quyush arqiliq özini saqlap qélishqa we ézilgen milletlerning erkinlik - musteqilliqqa érishishini tosushqa bashlidi.

Peqet insan qélipidin chiqqan kishila xitay kommunist partiyisige eza bolup turalaydu

"Xitay kommunist partiyisige baha" dégen toqquz parche bash maqalining "xitay kommunist partiyisning qirghinchiliq qilish tarixi" dégen qismida bayan qilinishiche, xelqqe qirghinchiliq qilish xitay kommunist partiyisining özining hökümranliqini saqlaydighan birdin- bir usuli. Qirghinchiliq qilghansiri, u qanliq qilichini tashliyalmaydu.

Hemmimizge melumki, xitayda 1949 - yilidin kéyin siyasi jehette zerbige uchrighan adem pütün memlikettiki nopus sanining yérimidin köpraqini teshkil qilidu. Xitayda gheyri normal halda ölüp ketken adem sani 5 0 milyondin 80 milyon'ghiche bolup, peqet mushula hetta 2 - dunya urushida pütün dunyada ölgen adem sanidinmu köp. Xitay kommunist partiyisi dunyadiki bashqa kommunist partiyilerge oxshash xelqqe qarita qirghinchiliq qilipla qalmay, belki öz ichidiki az - tola insanperwerlik héssiyati bar kishilergimu qirghinchiliq qilidu. Peqet insan qélipidin chiqqan kishilerla xitay kommunist partiyisige eza bolup turalaydu.

Xitay kommunist partiyisi özining obrazini yéngilap adem aldaydu

"Xitay kommunist partiyisige baha" dégen toqquz parche bash maqalining "xitay kommunist partiyisining qirghinchiliq qilish tarixi" dégen qismida bayan qilinishiche, xitay kommunist partiyisi pat - pat özining obrazini yéngilap, partiyining xelqning könglidiki térrorluq, wehshiylik obrazini yoq qilishqa tirishidu.

Mesilen, xelq xiyanetchilikke qarshi tursa, xitay kommunist partiyisi özi xiyanetchilikke qarshi turidighan partiye boluwalidu. Özining ichki qismidiki yatlarni jazalap quyup, eng chong xiyanetchiler özini qoghdaydu. Emeliyette, xitay kommunist partiyisi héchqachan özgergen emes. Her qandaq bir normal jemiyette adem bilen adem otturisida bir - birige köyünidighan, bir - birini söyidighan medeniyet munasiwiti mewjut.

Xitayda qedimki zamandimu "özeng rawa körmigenni bashqilargha tenglime" deydighan edep - qa'ide bar idi, emma xitay kommunist partiyisi xelqqe pütünley xelq özi xalimaydighan kommunizm dégen nersini tangdi, qoral küchi arqiliq mejburiy tangdi. Kommunist partiye özining "köresh" pelisepisi arqiliq xelq ichide muhebbetni yoq qilip, nepret we öchmenlikni peyda qilip turdi. Xelqni partiye özi qiripla qalmay, belki xelqni hem bir - birige urushqa sélip öz - ara qirghinchiliq qilghuzdi. Biz buni medeniyet inqilabi dégen herkitte körduq, hazirmu körüp turiwatimiz.

Xitay kommunist partiyisi yézilarda "yer islahati" dep élip barghan qirghinchiliq

"Xitay kommunist partiyisige baha" dégen toqquz parche bash maqalining "xitay kommunist partiyisning qirghinchiliq qilish tarixi" dégen qismida bayan qilinishiche, xitayda yer islahatini adem öltürmeymu qilghili bolatti. Mesilen, teywende bundaq mesile yer- zéminni sétiwélish usuli bilen hel qilin'ghan idi. Emma xitay kommunist partiyisi özi eslidila bulangchi, banditlardin kélip chiqqachqa, u qanxorloqtin waz kechmidi.

Chong qurghluqtiki yer islahati, emeliyette, xitay kommunist partiyisining yézilarda élip barghan qirghinchiliq herikiti boldi. Partiye merkizi komitéti 1951 - yili 2 - ayda "eksiyetchilerni öltürüsh az bolghan rayonlarda téximu köp adem tutush kérek, yézilarda öltürilidighan adem nisbiti mingde birdin köpraq bolush, sheherlerde mingde birdin azraq bolush kérek" dep yolyuruq chüshürgen. Bezi jaylarda hetta "ighwa tarqatqanlarnimu derhal öltürüsh kérek" dégen madda belgilen'gen.

Xitay kommunist patiyisining eyni waqittiki 3 - nomurluq erbabi tawju ependi "her bir mehellide ölüm jazasi bérilidighan adem bolush kérek, her bir a'ilidinmu köresh qilinidighan adem bolush kérek" dep wezipe belgiligen. Xitay kommunist partiysi "mingde bir" dégen nisbetni némige asasen belgiligenliki bizge namelum, emma, emeliyet shundaq boldiki, xitay kommunist partiyisi yézilardiki yer- zémin igilirini "zomiger" dep atap, ularni "mingde bir" dégen nisbetke toghrilap öltürdi. Bu arqiliq qalghan kishilerni qorqutup - yürigini mujup idare qilmaqchi boldi.

Adem öltürüsh üchün jinayi nam toqup chiqti

"Xitay kommunist partiyisige baha" dégen toqquz parche bash maqalining "xitay kommunist partiyisning qirghinchiliq qilish tarixi" dégen qismida bayan qilinishiche, xitay kommunist patiyisining yer islahati jeryanida adem öltürüsh üchün qollan'ghan usuli --- melum birikishini küresh qilish üchün partiye özi "aktiplar" dep talliwalghan kishiler uninggha jinayi nam toqup chiqish, shu asasta küresh yighinlirini échish, küreshke élin'ghuchi shu oydurup chiqilghan pakitlargha iqrar qilmisa, aktiplar "öltürüsh kérek" dep waqirash, bu awazgha asasen partiyining yighin bashqurghan qoralliq yer islahat kadirliri derhal qarar chiqirip neq meydandila étip tashlashtin ibaret bolghan. Xitay kommunist partiyisi élan qilghan matériyalgha asaslan'ghanda, 1952 - yilining axirigha qeder "eksiyetchi" dégen nam bilen öltürülgen adem sani 2 milyon 400 ming. Bu jeryanda nahiye derijiliktin jajanglarghiche bolghan gomindang xadimliridin öltürülgen adem sani 5 milyondin artuq. Bu ikki sanni qoshqanda, xitay kommunist partiyisi yer islahatida öltürgen adem sani 10 milyon'gha yétidu.

Partiye yachikiliri yézilarni igellep bolghanda yer islahati axirlashti

"Xitay kommunist partiyisige baha" dégen toqquz parche bash maqalining "xitay kommunist partiyisning qirghinchiliq qilish tarixi" dégen qismida bayan qilinishiche, yer islahatidin burun, yézilar dini teshkilatlar asasida özini özi idare qilatti, yéza aqsaqalliri asasen baylar yaki dini yétekchilerdin terkip tapqan idi. Xitay kommunist partiysi yer islahatida ularni öltürüp tügetkendin kéyin, yézilarni pütünley xitay kommunist partiyisini yachékiliri égellidi. Partiyining yéza kadirliri öltürülgen baylarning xutun - qizlirini égellesh arqiliq ularning mülkigimu irishti. Xitay kommu'ist partiysi yézilardiki yer égilirini, dini rehberlerni étip öltürgendin yéza xelqini wehimige sélip qoyup bashqurushqa bashlidi.

Xitay kommunist partiyisi sheherlerde élip barghan qirghinchiliq

"Xitay kommunist partiyisige baha" dégen toqquz parche bash maqalining "xitay kommunist partiyisning qirghinchiliq qilish tarixi" dégen qismida bayan qilinishiche, bulangchiliq, banditliqtin kélip chiqqan xitay kommunist partiyisi hakimiyet qurghandin kéyinla, uning ichki qismida "xiyanetchilik parixorluq ewj alghan idi. Bu chaghda, 1951 - yili 12 - ayda, merkizi komititi "xiyanetchilikke, israpxorluqqa, bi'ugratliqqa qarshi turush" dep atalghan " 3ke qarshi turush" herikitini we parxorluqqa, baj oghurlashqa, dölet mülkini oghurlashqa, mehsulatqa matériyalni kam ishlitishke, döletning iqtisadiy uchurlirini oghurlashqa qarshi turush dep atalghan "5 ke qarshi turush" herikitini qozghap, sheherlerdimu qirghinchiliq qilishqa, pul - mal égilirini bulash-talashqa bashlidi. Eyni waqittiki shangxey shehrining bashliqi chén yi ependi baylar azapqa chidimay özini binadin tashlap ölüshke bashlighan ehwalni körüp "düshmenler asmandin paraxut bilen chüshmekte" dep qaqahlap külgen. Bezi baylar xongkonggha qéchip ketse, ularing bala- jaqilirini dawamliq baj töleshke qistighan. Shu waqitta sheher xelqi binadin sekrigenlerni körüp qalmasliq üchün, binalarning yénidin méngip ötüshtin qorqidighan bolup qalghan. 1996 - Yili partiye tarixini tetqiq qilish ishxanisi teripidin tüzülgen "dölitimiz qu'urlghandin buyanqi siyasi heriketler" dégen kitabta bayan qilinishiche, "xuféng guruhigha qarshi turush" dégen herikette 5000 din artuq ademni shu délogha chétiwalghan. "3 Ke qarshi", "5 ke qarshi" dégen herikette 323 ming 100 adem qolgha élinip türmige tashlan'ghan. (Dawami bar) (weli)