Xitay we Uyghur rayonidiki dawalinish heqqi we sughurtisi

Xitay sehiye ministirliqining yuqiri derijilik emeldarlirining analiz qilishiche, yéqinqi yillardin buyan, gerche xitay puqralirining kirimi bir qeder örligen bolsimu, dawalinish heqqining heddidin tashqiri téz sür'ette ösüwatqanliqi sewebidin, nurghunlighan bimarlar doxturgha körünüshkimu érishelmey kelmekte.

Dawalinish sughurtisigha érishelmigenler köp nisbetni igileydu

Tekshürüshlerge asaslan'ghanda, xitay puqralirining doxturgha körünüsh nisbiti 97 - yilidiki 17 pirsenttin hazirqi 13 pirsentke chüshüp qalghan. Késili bar turup waqtida dawalinalmaydighan puqralar 50٪ ni igiligen. Xitayning senshi téléwiziye istansisida uzun yil muxbir bolup ishligen ma shawming xitaydiki dawalash heqqining ademni chöchütkidek derijide örlep kétiwatqanliqini tekitlep, "hazir xitayda dawalinish sughurtisigha érishelmey kéliwatqanlar omumi nopusning az dégende 80٪ ni igileydu" dep körsetti.

Ma shawming ependi sözide: "hazir xitayda puqralar bolupmu yilliq kirimige tayinip kün ötküziwatqan dehqanlar adette késel bolup qalsa hergizmu doxturgha barmaydu. Hetta éghir késel bolup qalghan halettimu doxturxanida yétip dawalinishqa éshinalmaydu. Bichare dehqanlar qerz élip bolsimu bir amallarni qilip doxturxanida yétip dawalan'ghan teghdirdimu, dawalash heqqi heddidin tashqiri qimmet bolghachqa, dawamliq dawalinish waqti toshmay turupla doxturxanidin chiqip kétidu" dep bildürdi.

Saqaymay turup doxturxanidin chiqip kétidighanlar köp sanliq

Xitay sehiye ministirliqining istatistikisidin melum bolushiche, hazir xitayda, meyli yézilarda bolsun, yaki sheherlerde bolsun, ٪ 40 ke yéqin adem késel turuqluq doxturgha körinelmeydiken. Iqtisadiy ehwali nachar bolghanliqtin késili saqaymay turup doxturxanidin chiqip kétimiz dep telep qilidighanlar ٪ 64 ni igileydiken.

Aldin pul tapshurmay turup körünüsh mumkin emes

Yéqinda xitay agéntliqining ürümchidin bergen xewerliridimu, hazir Uyghur rayonidiki dawalinish heqqining heddidin tashqiri yuqiri bolup kétiwatqanliqi hemde bu xil ehwalning kishilerning kündilik turmushigha zor derijide bésim boluwatqanliqi otturigha qoyulghan.

Biz bu heqte Uyghur rayonidiki doxturxanilargha téléfon qilip , ehwal igiligende ziyaritimizni qobul qilghan aptonom rayonluq tibbiy uniwersitétining qarmiqidiki birinchi doxturxana yataq mes'uli, hazir ürümchide mezkur doxturxanidin bashqa doxturxanilar bimarlardin yataqta yétish üchün aldin ala tapshurushqa tégishlik bolghan 3000 yü'en pulni toluq tapshuriwalmay turup, bimarni qobul qilmaydighanliqini melum qilghan.

Sughurta shirketlirining mesuliyetsizliki

Munasiwetlik melumatlargha qarighanda, hazir xitayda we shundaqla Uyghur rayonida dawalinish heqqining qimmet bolup kétiwatqanliqidin bashqa, dawalinish sughurtisimu nahayiti töwen bolghan.

Mesilen uniwérsitét oqughuchilirining yilliq dawalinishi üchün bérilidighan pul aran nechche on yü'en pul bolup, hökümet xirajiti bilen dawalinish dégenlik pütünley quruq gepke aylan'ghan. Shunga hazir oqughuchilar késel bolup qalghanda dawamliq özi pul chiqirip dawalinidiken.

Shinjang uniwérsitétida oquwatqan ismini melum qilishni xalimighan bir oqughuchining bildürüshiche, mezkur mektepte oquwatqan bir oqughuchi éghir késelge giriptar bolup qélip, dawalinish heqqini töliyelmigenliktin, ilajisiz mekteptin chékinip öyige qaytip ketken.

Ziyaritimizni qobul qilghan qeshqer shehiride turushluq bir Uyghur xanim mezkur rayondiki xelqning héchqachan dawalinish sughurtisidin behriman bolup baqmighanliqini sözlep kélip, mundaq bir misalni sözlep berdi:

• U mundaq dédi
• Download story audio

(Méhriban)