Xelq özi bilen düshmenlishidighan kishini dölet re'islikige saylimaydu

Yéqinda "közütüsh zhornili" da "xelq özi bilen düshmenlishidighan kishini dölet re'islikige saylimaydu" serlewhilik bir obzor élan qilindi. Bu obzorni yazghan kishi del xitayda "partiye merkizi komitétining teshwiqat ministirlikige lenet - nepret yaghdurayli" dégen maqalini yézip tonulghan, béyjing uniwérsitéti axbaratchiliq fakultétining proféssori jaw gobyaw ependi idi.

11 - Ayning 5 - küni, proféssor jaw amérikining kannektiket shitatining xartford shehridiki tiriniti uniwérsitigha kélip, hazirqi zaman axbaratchiliqi bilen xelqning munasibiti dégen témida léksiye bergen. U, bu pa'aliyitide hökümetning sirliq perdisini échip tashlashni xitaydiki uchur - waste xadimliri aldi bilen özidin bashlishi kéreklikini, shundaqla hazirqi mushu bir ewlattin bashlishi kéreklikini tekitligen. Proféssor jaw bu qétimqi amérika sepiride yene démokratik saylam heqqide yéngi oy- pikirlerge érishken.

Xelq saylimighan dölet re'isi choqum xelqning düshmini

Közütüsh zhornilida bayan qilinishiche, proféssor jaw démokratik saylam heqqide qilghan mulahiziside mundaq dégen: xitayda dölet rehberliri özidin kéyin rehber bolidighan kishini , yeni "iz basar" ni omum xelqning saylimi arqiliq emes , belki shexsiy özi aldin belgilep qoyidu. Buningdin kéyin bundaq iz basarni, xelqning tili bilen eytqanda " qara sanduq ichide belgilen'gen" bundaq dölet re'isini choqum ret qilish kérek. Biz hazir 21 - esirde yashawatimiz, bizning etrapimizdiki döletlerning hemmiside dölet rehberlirini xelq özliri saylap chiqiwatsa, bundaq ehwal astida, jongxwa xelq jumhuriyitide téxiche qaysi bir kishi özi bashqilar teripidin iz basar qilip belgilen'gen soghatni qubul qilip xelqning saylimini ret qilsa, bundaq kishni biz xelqning düshmini dep qarishimiz kérek. Mentiqe buyiche xelq özige xizmet qilidighan, töhbe qoshi'idighan ademni dölet rehbiri qilip saylaydu, xelq héchqachan üzining düshminini dölet re'islikige saylimaydu. Mushu menidin eytqanda, xelq saylimighan, melum shexsiler teripidin belgilen'gen yaki özi zomigerlik qilip boliwalghan dölet re'isi chuqum xelqning düshmini.

Her bir puxramu öz dölitining re'isini choqum özi saylap chiqishta ching turushi kérek

Közütüsh zhornilida bayan qilinishiche, proféssor jaw démokratik saylam heqqide qilghan mulahiziside mundaq dégen: chet'ellerde dölet re'isini xelq özi saylap chiqidu. Bir qisim kishi saylimaqchi bolghan namzat saylinalmay qélishi mumkin, emma ular özliri saylam pa'aliyitige qatnashqan bolghanliqi üchün köp sanliq awazgha boy sunidu. Buni men öz közüm bilen kördüm. Wahalenki, bundaq démokratik saylam we bundaq jeryan xitayda yoq. Xitayning dölet rehberliri xelq saylap chiqqan kishiler emes, belki xelqqe zomu-zo téngilghan "rehber" ler. Ularni xelq saylap chiqmighan bolghachqa, ular xelq üchün ish qilmaydu, xelqning menpetini közlimeydu, peqet özini belgilep qoyghan kishining yaki özini belgilep qoyghan gurohning menpe'eti üchünla xizmet qilidu, xelq bilen qarshilishidu, xelqni basturidu, xelqqe rehmi qilmaydu. Eger hazirqi zamandimu xitay milliti dunyadiki bashqa milletlerge oxshash hetta özining dölet re'isinimu özi sayliyalmisa, bu numus emesmu? 5 ming yilliq medeniyitim bar millet dep pexirlinishke néme heqqi bar? bu menidin éytqanda, jongxwa xelq jumhuriyitining her bir puxrasimu, öz dölitining rehbirini özliri medeniyetlik shekil bilen saylap chiqishni jarangliq awaz bilen teshebbus qilish we emiliyette shundaq qilish mejburiyiti bar. Bu teshebbusni emelge ashurushnimu özliridin bashlash kérek.

"Qara sanduqtin chiqqan rehber" ni milli munapiq dep bilish kérek

Közütüsh zhornilida bayan qilinishiche, proféssor jaw démokratik saylam heqqide qilghan mulahiziside mundaq dégen: yene shuni éytish kérekki, hazirqi xitay rehberlirimu iz basar belgileydighan, bu bir ewlad rehber yene bir ewlad rehberni yaki uningdin kéyinki bir nechche ewladni aldin belgilep qoyidighan bundaq medeniyetsiz shekilni axirilashturishi kérek. Eger bashqilar teripidin belgilen'gen “iz basar" özi aldi bilen döletke rehberlik qilalamdu, shunchilik qabiliyiti barmu, xelqni nezerde tutamdu, xelqqe nime ish qilip béreleydu, buni oylimayla "qara sanduqtin chiqqan ghenimet" ni qubul qilip, omum xelq saylimini ret qilip, özliri dölet rehbiri boliwalsa, bundaq kishini xelqning düshmini, milli munapiq dep bilish kérek.(Weli)