Gutman: dunya xitayning tepekkuri boyiche mangmaydu

2004 - Yili 1 - ayda, péshqedem muxbir, meblegh salghuchi shirketlerge meslihet bergüchi, amérikining herbiy qorallarni kontrol qilish tetqiqatchisi étan gutman ependining "yéngi jonggo bilen xoshlishish" namliq kitabi "inkantérbuk" neshriyati teripidin neshir qilin'ghan idi.

Bu kitabta amérika bilen xitay otturisidiki soda -mu'amile ishlirining dawamlishishi, deslepte kütken ümidler we kéyin peyda bolghan ümidsizlikler bayan qilin'ghan. Bu kitabning 7 - babida yene, mexsus xitayning herbiy küchi tonushturulghan.

"Uluq ira géziti" de bayan qilinishiche, yéqinda xitay générali ju chéngxu yadro qoralliri bilen hujum qilish mesilisi heqqide sözligendin kéyin, yuqirida tilgha élin'ghan kitabning aptori étan gutman ependi mulahize élan qilip, dunya xitayning tepekkuri boyiche mangmaydu, dégen köz qarashni ilgiri sürgen.

- Ju chéngxu ependi sözide , xitay teywen'ge qoral küchi ishletse, amérikining arilashmasliqi mumkin emes, shunglashqa urushning derijisi yuqiri örleydu, dep qarighan - deydu gutman ependi mulahiziside , - u, xitay qanche küchlük bolsa, amérikining arilishish éhtimali shunche az bolidu, yaponiyimu biterep halette turushi mumkin, dep qarighan. Emma ju chéngxu ependi xitayda nurghun xelqning teywen mesilisini qoral küchi bilen hel qilishqa qarshi turidighanliqini, urush bolsa néme netije chiqidighanliqini tesewwur qilalmighan.

- Urushning yüz bérish yaki yüz bermeslikini tesewwur qilghili bolmisimu, - dep bayan qilidu gutman ependi, - emma kommunist xitay teywen armiyisini intayin qisqa waqit ichidila qarshiliq körsitish küchini yoqitidu. Xitayning hujumigha qarita amérikining éléktronluq arilishishi muweppeqiyetlik bolmaydu؛ yaponiyinimu tehditke uchrighan haman derhal bir qudretlik herbiy qoshun teshkillep chiqishqa ülgürmeydu, dep tesewwur qilmasliqi kérek. Bolmisa, herbiy jehette tesewwur xataliqi yüz béridu - deydu gutman ependi, - gétlér urush bashlashtin burun, en'giliyiliklerni peqet bir top tijaretchiler, bomba partlighan haman pütünley hoshidin kétidu؛ rusiyining derwazisi bir qattiq tépik bilen échip tashlansila u dölet ghulap kétidu, dep hésablighan. Xitay hazir, xuddi fashist gétlérge oxshash, démokratik döletlerning küchini sel chaghlighan bolsa kérek. Ular prézidént bushni mesxire qilish üchün mayk mor ependi réjissorliqida teyyarlan'ghan "sélsiye 911 dradus" dégen kino filimidiki, amérikida nahayiti köp xelq kochilargha chiqip namayish qilghan körünishlernila körüp, démokratik teywende kishiler oxshimighan köz qarashllirini otturigha qoyup jidelliship ketken körünishlernila körüp, démokratik döletlerni bir mushqa yarimaydu dep hésablighan bolsa kérek. Démokratik döletlerde oxshimighan partiyilerning dölet we xelq menpe'eti üchün jidellishishtin hasil bolghan küch - qudretni, soghuqchiliq urush dewride, sowét ittipaqi éniq körgen'ghu! amérikida prézidént saylimi bolghanda, ikki partiyining jenggi - jidili taza ewjige chiqqanda, osama bin ladin yene bir qétim qutratquluq qilghan idi, shu waqitta téximu köp xelq bushni saylashqa awaz berdi. Teywende saylam bolghanda, xitayning bash ministiri ju rongji teywen'ge tehdit salghan idi, teywen xelqni derhal chén shuybyenni saylidi. Yéqinda yene, deydu gutman ependi, - teywendiki gomindang partiyisi re'is saylighanda, xitay hökümiti özi yaxshi körmeydighan ma yingjyu ependining saylinishini ümid qilmay, général ju chéngxu yadro qorallirini ishlitish toghrisida söz qilghan idi, gomindangmu derhal ma yingjyu ependini re'islikke saylidi. Xitay kommunist hökümiti özi bashqilarni dawamliq bozek qilish meqsitide, dunyani qorqutup arilashmaydighan qilimen démisun, dunyaning ishi uning dégini boyiche yürüshmeydu!

- Amérikining herbiy istratégiyisi ezeldin tartip küch - quwwet üstünlükni saqlap, muqimliqqa kapaletlik qilish. - Deydu gutman ependi, - besh burjek binaning amérikigha nishanlap étilghan bashqurilidighan bombilarning köpünchisini tosiwélish iqtidari bar. Xitayda amérikining karilado shtatidin halqip ötidighan bashqurilidighan bomba barliqi téxi bizge namelum. Xitayning su asti paraxotlirini perq étish - amérika üchün nahayiti asan, u amérikining gherbiy qirghaqlirigha yéqinlishalishi mumkin emes. Amérikining herbiy qisimliri qoghdinish jehette nayahiti éhtiyatchan. Özini chaghliyalmaydighanlar, adette, xata mölcherge tayinip hujum qozghap qoyushi mumkin. - Deydu gutman ependi, -- shunglashqa amérika özining herbiy eslihelirini qarshi terepning kélip körüshige ruxset qilidu, ularni xata mölcherlep qoymisun deydu. 1996 - Yili teywende saylam bolghanda, xitay bashqurilidighan bomba sinaq qilip tehdit salghan idi, shu haman amérikining herbiy awi'amatkisi we charlighuchi ayrupilanliri teywen boghuzida peyda boldi. Xitay ighwagerchilikini derhal toxtatqan idighu! (weli)