Eger shi'enning gherbidiki rayonlargha xeter yetse, amérika néme qilidu?

Amérikining herbiy qorallarni kontrol qilish tetqiqatchisi, péshqedem muxbir, "yéngi jonggo bilen xoshlishish" dégen kitabning aptori étan gutman ependining xitay générali ju chéngxuning yadro urushi heqqidiki sözlirige qarita élan qilghan mulahizliride yene mundaq dep bayan qilinidu:

- Xitay générali ju chéngxuning yadro urushi heqqidiki sözliri men üchün yéngiliq emes. - Deydu gutman ependi, - chünki, buningdin borun xitay hökümiti teywen'ge qarita éléktronluq magnit dolqunlirini buzush bombisi ishlitidighanliqini élan qilghan. Bundaq qoral zamanimizda 3 - ewlad yadro qoralliri hésablinidu. Xitay armiyisining bash shitap qomandani shong gu'angkeymu ju chéngxudin 10 yil burunla "amérika teywenni dep los anjilis shehridin ayrilip qalmasliqi kérek" dep tehdit salghan idi. Bundaq tehdit ju chéngxuning aghzi arqiliq yene chiqti. Emdi xitay kommunist hökümiti xuddi ju chéngxuning dégini boyiche ish körse, u chaghda yadro urushini keltürüp chiqiridu. Eger undaq qilalmisa, özining abruyini yoqitidu.

- Xitay générali ju chéngxuning shi'enning sherqidiki hemmini qurban qilish bedilige tunji bolup amérikigha yadro qoralliri bilen hujum qilidighanliqini bayan qilghanda, xelq'arada uchur wastiliri buninggha jiddiy qarap inkas qayturdi. Shundaqla, xitaydiki pütün xelqning rayigha özi zormu-zor wekillik qilip, pütün xelqning hayatini bedel töleshke teyyar bolup, esebiyliship jöyligen xitay kommunistlirigha qattiq ghezeplendi. Xitaygha hazir pütün dunyadin lenet yaghmaqta. Bundaq waqitta, xitayning tor betliridin "xitay yadro qoralliri" dégen mezmundiki maqalilarni izlise, xitay générali ju chéngxuning sözliri derhal tépilidu. Hetta uningda "ju chéngxuning sözliride 'yoqitish' , 'qorqitish' , 'aldini tosush' , 'küch tiklesh' dégen neziriyiler bar؛ uningdiki 'yoqitish' dégen yaponiye bilen teywenni yoqitish, 'qorqitish' dégen etraptiki döletlerni qorqutush , 'tosush' dégen amérikining aldini tosush, 'küch tiklesh' dégen pütün dunyada kommunist xitay hökümitining küchini tiklesh dégendin ibaret dep yézilghan tepsili izahatlarmu bar. Lékin, xelq'arada ju chéngxuning sözlirige reddiye bérilgen maqalilarni uningdin tépish mumkin emes. Xitay hökümiti bundaq uchurlarni xelqtin yoshuriwatidu.

- Xitay générali ju chéngxu shi'enning sherqini tilgha élip, gherbini tilgha almighan. Ju chéngxuning néme meqsette shundaq dégenlikidin qet'iy nezer, - deydu gutman ependi, - mining éniq bilishimche, dunyada amérikining bombiliri yétip baralmaydighan jay yoq. Amérikigha qarita yadro urushi qozghash, bir hésabta, özini öltürüwalghanliq bilen teng. Amérika teyyarlap qoyghan nishanlarni özi izlep tépip tégidighan bashqurilidighan bombilar yer astidiki herbiy eslihelerni, bolupmu qomandanliq shitablirini xarap qilalaydu. Bundaq qorallar burunqi urushlarda téxi ishlitilip baqmidi. Eger xitay kommunist partiyisi shi'enning gherb teripidiki rayonlarda özi quruwalghan herbiy eslihelerge yoshurunup, u jaylarni xeterlik rayon'gha aylandursa, buning üchün, - deydu gutman ependi, - öz xelqining we eskerlirining chiqim tartishidin saqlinishqa intayin ehmiyet béridighan amérika xitaygha qarita, xelq yashaydighan sheherlerni emes, belki biwaste halda xitay kommunist partiyisi yoshurun'ghan qomandanliq shitablirini aldi bilen pachaqlaydighan "bash yenjish" dep atilidighan herbiy herikitini qollinishi turghan gep.

- Xitay kommunist partiyisi hazir yadro qoralliri bar derijidin tashqiri döletke aylinip qaldi, - deydu gutman ependi, - emma u téxi yadro qorallirigha mes'uliyetchanliq bilen mu'amile qilidighan da'iride emes. Xitay kommunist partiyisi yéqinqi yillardin buyan herbiy jehette téxi zamaniwiylashmighan bolsimu, emma yéngi herbiy téxnikilargha ésilip, yenila maw zédongche peskeshlik yolida kétiwatidu. Yadro urushining partlishi üchün xeterlik shamal chiqiriwatidu.- Deydu gutman ependi, - amérika bilen sowét ittipaqi tirkeshken yillardimu, bu ikki dölet otturisida yadro qoralliri mesiliside "pewqul'adde muqimliq" saqlap qélin'ghan idi. Ikki döletning yadro paraxotliri yéqinliship qalsa, her ikki terep rehberliri bir-birige derhal xewer yetküzüp, sürkilish peyda bolushtin saqlan'ghan. Xeter mewjut bolup turghan minutlarda, dölet rehberliri biwaste sözliship mesilini hel qilish bir xelq'araliq qa'idila emes, belki nahayiti muhim mes'uliyetchanliq. Emma , - deydu gutman ependi, - yuguslawiyide urush boluwatqanda, amérika prézidénti kilinton jang zémin bilen biwaste sözleshmekchi bolup téléfon qilsa, jang zémin téléfonni ret qilghan idi. Hazir xitay qolliniwatqan taktika ghelite. U özining téxi zamaniwiylishalmighanliqigha baqmay, he désila yuqiri téxnikigha ésilip, mexsus amérikining sün'i hemralirini, awi'amatkilirini we yaki xelqning janijan menpe'etige taqilidighan noqtilirini tosattin pachaqlap palech halgha keltürüp qoyidighan yaman gherezdila boliwatidu.

- Xitay hazir bir xeterlik döletke aylinip qaldi, - deydu gutman ependi, -amérika xitayning asiyada derijidin tashqiri döletke aylinishidin ensirigini yoq. Emma xitay hökümitining tebi'iti medeniyetke tehdit sélish. Hazirche urush partlash éhtimali chong emes, emma , eger xitay teywen'ge hujum qilish waqit jediwilini belgilise, buningdin urush kélip chiqish éhtimalliqi bar. Xitay hazir "tinch tereqqi qilish" dégen nam bilen pütün dunyagha singip kirish, kéngiyishni yolgha qoyup, urush arqiliq özining kommunist hakimiyiti we milletchilik bayriqining qanunluq ornini tikleshni közlewatidu. Emma bu, xitay üchün asan'gha chüshmeydu. Chünki, xitay bu jehette jiddiy heriket qilsila, u, pütün dunyada qaghish -lenetke uchrawatidu. Xitay éhtimal, amérikini özining tehditini chüshenmey qéliwatidu dep oylawatsa kérek. (Weli)