Xu jintawning amérika ziyaritining kéchiktürülgenlikige oxshimighan qarashlar

Xitay dölet re'isi xu jintaw eslidiki pilanda amérikining paytexti washin'gtonni ziyaret qilip, prézidént bush bilen uchrashqandin sirt, yene siyatol shehirini ziyaret qilmaqchi we dangliq yél uniwérsitétida nutuq sözlimekchi idi.

Amérika birleshme axbarat agéntliqining xewirige qarighanda, xu jintawning amérika ziyaritidiki bu orunlashturushlarning hemmisi bikar qilin'ghan. Emma u 9 - ayning otturiliri yenila nyo yorkqa kélip b d t ning yighinigha qatnishidiken . Xewerge qarighanda, prézidént bush b d t ning yighini jeryanida xu jintaw bilen körishidiken.

Kéchiktürülüsh sewebliri

Amérika we xitay da'iriliri, xu jintaw ziyaritining kéchktürilishining sewebi, asasliqi amérikining yéngi orliyan shehiride yéqinda déngiz chapquni apiti yüz bergechke, xitay dölet rehbirining bu peytte amérikini ziyaret qilishi anche muwapiq emes dep chüshendürgen.

Amérika toleydo uniwérsitétining siyaset proféssori raw bogung ependi, xu jintawning ziyaritini kéchiktürishide, yéngi orliyanda yüz bergen su apitidin sirt, amérika we xitayning nurghun mesililerde öz- ara ortaq köz qarashqa kélelmigenliki, bolupmu amérika dölet ichide xitayni tenqid qilidighan awazning yuqiriliqi asasliq sewebler bolushi mumkinlikini bildürdi. U mundaq dédi:

"Yéqinda, amérikida xitaygha qarshi keypiyatlar yuqiri boliwatidu. Bolupmu amérika dölet mejlisidikiler xitaydin narazi. Soda mesilisi, xitay xelq pulining qimmiti mesilisi, toqumichiliq mehsulatlirining importi mesilisi, kishilik hoquq mesilisi qatarliq nurghun mesililerde ikki terep birlikke kélelmeywatidu. Uning üstige su apiti boldi. Méningche asasliq sewebler mushular".

Amérika we xitay terep eslide, bu qétimqi xu jintawning amérikini ziyaret qilish pursitidin paydilinip, ikki dölet munasiwitidiki soda ixtilabi, eqliy mülük hoquqining patént hoquqi mesilisi, kishilik hoquq we bashqa dunya weziyetlirini öz ichige alghan bir yürüsh mesililerni muzakire qilmaqchi idi.

Muwapiq peyt emes

Amérika oklixoma uniwérsitéti gherbiy tinch okyan tetqiqat merkizining bashliqi, xelq'ara munasiwetler mutexessisi proféssor li shyawbingmu nöwette amérika we xitay otturisidiki siyasiy weziyetning xu jintawning daghdughiliq ziyaret élip bérishigha anche muwapiq kelmeydighanliqini bildürdi. U mundaq dédi:

"Hazir amérika bir nechche tereptin xitaydin narazi. Mesilen, xitayning bu qétimqi rusiye bilen ötküzgen birleshme herbiy maniwérining kölimi esli pilandikidin chong boldi. Uning üstige xitay bu heqtiki uchurlarni amérikigha toluq yetküzmigen. Eslide amérika we xitay herbiy uchurlarni almashturidighan méxanizmi ornatqan. Buningdin sirt, amérika we xitay soda ixtilapi heqqidiki söhbitini uzartqan bolsimu, biraq anche köngüldikidek ünüm hasil qilalmaywatidu. Xitaydin import qilidighan toqumichiliq mehsulatlirini ünümlük kontrol qilalmaywatidu. Shunga bu seweblerdin qarighanda, ikkila terep uchrishishqa anche qizip ketmeywatidu. Eger ular uchrishish arqiliq dölet ichidiki bir qisim mesililerni hel qilishqa közi yetmise, söhbet ötküzüshke aldirimaydu. Ikki dölet rehberlirining uchrishishi bir purset bolghachqa, ikkila terep biraz saqlap, peytini kütüp téximu chong siyasiy ünüm hasil qilishni xalawatidu".

Amérika birleshme axbarat agéntliqining xewirige qarighanda, xitay dölet re'isi xu jintawning amérika ziyaritining qachan'ghiche kéchiktürülidighanliqi téxi éniq emes bolup, amérika terep, xitay bilen kéliship yene bir muwapiq waqitni tépip, xitay dölet re'isi xu jintawning amérikini ziyaret qilishini qayta orunlashturidighanliqini bildürgen. (Arzu)