Xu jintaw emdi aqsaraygha qachan baridu?

Xu jintaw 9 - ayning 7 - küni amérikining prézidénti bush bilen aqsarayda körüshmekchi idi. Bu pilan alliqachan özgerdi. Xu jintaw emdi aqsaraygha qachan baridu? eger barmisa, xu jintawning bush bilen élip baridighan söhbitining kelgüsi néme bolidu? bu heqte hazir kishiler muxbirlardin uchur sorawatidu.

Shinxu'a agénétliqining 9 - ayning 6 - künidiki xewiridin melum bolushiche, xitay tashqi ishlar ministirliqining bayanatchisi chin'gang xu jintawning amérikida bush bilen körüshüsh pilani kéchikip, shuning bilen ikki dölet otturisida bir chong pursetning qoldin ketkenlikini étirap qilmighan. Xu jintawning b d t yighinida bush bilen uchrishishi esli pilanlan'ghan bundaq söhbetning rolini oynaydighan yaki oyniyalmaydighanliqi toghrisida éniqlima bermigen. Peqet amérikining jenub teripide déngiz chapquni yüz bergenliktin xu jintaw bu qétimqi ziyaretni kéchiktürdi, dep chüshendürgen.

Ziyaretning xaraktérigha oxshimighan qarash

Merkizi agéntliqining bayan qilishiche, xu jintawning amérika prézidénti bush bilen aqsarayda bush bilen söhbetlishish pilanining kéchikkenliki sewebtin, xitay bilen amérika otturisida ali derijilik uchrurushush üchün qilin'ghan 8 ayliq teyyarliq tamamen bikar bolghan. Xitayning amérikida turushluq elchixanisi xu jintawning bu qétimqi ziyaritining derijisi heqqide intayin yuqiri telep qoyup ching turiwalghan, gerche bu ikki dölet otturisida pikir ortaqliqi bolmisimu. Qisqisi xitayning bayanatchisi xu jintawning amérika ziyaritini dölet ziyariti dégen bolsa, amérikining bayanatchisi bu bir dölet ziyariti emes, peqet bir wax chüshlük ghiza, dédi.

Chén yonglin: amérika xuni qarshi élishni xalimighan

"Uluq ira géziti" ning xewer qilishiche, xitayning awstraliyidiki elchixanisidin yüz örüp chiqqan diplomat chén yonglinning mulahize qilishiche, xu jintawning amérikini ziyaret qilidighan pilanining özgergenliki, emeliyette amérikining xu jintawni qarshi élishni xalimighanliqdin boldi. Chünki xitay kommunistlirining sadiq pushti ju chéngxu amérikigha yadro popozisi qilghandin kéyin, xitay hökümitining amérikidin xu jintawni eng aliy derijide kütüshni telep qilghanliqi amérika xelqini qattiq yirkendürgen we qoy térisige kiriwalghan kommunist börilerge emdi yem bérishni xalimaydighan bolup qalghan idi.

Xu jintawning aldidiki yol

Anada gézitliride xewer qilinishiche, 9 - ayning 2 - küni kanadaning toranto uniwérsitéti xitay tetqiqat inistutida tküzülgen bir muhakime yighinida, mutexessisler "xu jintawning amérika prézidénti bush bilen aqsarayda söhbet ötküzüshi kéchiktürülgendin kéyin, xu jintaw emdi aqsaraygha qachan bérish emes, belki hazir u özi üchün derhal yol tallashqa mejur bolmaqta" dep körsetken.

Tetqiqatchi xéngxé ependi " xitay hazir kommunist partiye tarixidiki eng chong réqabetke duch keldi. Kommunist partiye ichide kommunizmgha ishinidighan adem qalmidi, kommunist partiyining qanunluq orni riqabetke duch keldi " dep körsetken.

Xitaydin yüz örigen shényang sheherlik qanun idarisini bashliqi xen gu'angshéng "xu jintaw hoquq tutqan ikki yildin buyan siyasiy jehette mustebitlik téximu éhir boldi. Hazir xu jintaw ya dawamliq xelq bilen düshmenliship aghdurulush ya xelqning rayigha bérip islahatélish bérishtin ibaret ikki yolning birini tallishi kérek" dep körsetken.

Médétsina penliri doktori féng lili xanim "xitay kommunist partiyisining 50 yilliq hökümranliqi pütün dölet xelqide intayin éghir rohi siqinji we wehimilik rohi halet peyda qildi. Deryalar, köller bulghandi. Xitayda hazir tebi'iy ormanliqlar mewjut emes. Xelq hazir sap hawada nepeslinish emes, belki künde 2 qap tamaka chékiwatqandek halda turiwatidu. Xelqning késelge qarshiliq körsitish kuchi omumyüzlük ajizlap ketti" dep körsetken.

Musteqil yazghuchi, mulahizichi shénshö xanim " xu jintaw xitay xelqning qosiqi toyghanliqi eng chong kishilik hoquqqa ige bolghanliq dep qaraydighan, guyju, tébetlerde xizmet qilghanda démokaratiyini basturghan, hazir pütün dölette kommunist partiyining ilgharliqini saqlash dep atilidighan siyasiy heriketni élip bériwatqan kommunist solchisi. Biz kanada bash minisitirining xu jintawdek bundaq kommunist solchisigha kishilik hoquq mesilisde qet'iy yol qoymasliqini ümid qilimiz" dégen

Xitay elchixanisining ejri yoq bolghan

Uluq ira gézitining xewer qilishiche, bu qétim xu jintawning aqsarayni ziyaret qilish pilani kéchikkendin kéyin, xitay elchixanilirining bashqa teyyarliqlirimu bikar bolghan.

Xewer éytilishiche, xitay elchixaniliri xitay muhajirliri we oqughuchilar ichidin xu jintaw ni qarshi élish üchün heq bérip qoshun teshkilligen. Xu jintawni namayishchilardin xali qilish üchün, xu jintaw aldi bilen ziyaret qilidighan siyatil shehirige kelgende xelq'araliq ayridoromgha chüshmey, melum bir boyin shirkitining ayrodromidin tik uchar bilen mihmanxanigha kétishni mexpi orunlashturghan.

Xewerde éytilishiche yene, bu qétim xu jintaw bilen bille ziyaretke kélidighan kishilerning isimliki élan qilin'ghandin kéyin, kanadada falun'gongchilar we bir qisim xelq'araliq munasiwet adwukatliri xu jintaw bilen bille ziyaretke kélidighan xitayning soda minisitiri bo shiley qatarliq emeldarlarni saqchilarning nazaret qilidighan, yoldin ötüshini chekleydighan, chégridin qoghlap chiqiridighan kishiler tizimlikige kirgüzüshni muraji'et qilghan. (Weli)