Xu jintaw rastinla xu yawbangning namini eslige keltüremdu?(1)

1981 – Yili xu yawbang (ongda) ding shawping bilen

Xongkongda chiqidighan "jenubiy xitay seher géziti" de bayan qilinishiche, hazir xitayda dölet re'isi xu jintaw 11 - ayning 20 - küni, béyjingdiki büyük xelq sariyida sabiq bash sékritar xu yawbang tughulghanliqining 90 yilliqini xatirilesh pa'aliyiti ötküzüshke, uningdin burun "xu yawbang eseliri" ni neshr qilishqa orunlashturghan, jaylarmu herxil shekilde xu yawbangni xatirilesh pa'aliyiti élip bérishqa teyyarliq körmekte. Bu zadi qandaq özgirish?

Xu jintaw jem'iyetni muressege élip kelmekchi

Amérika awazining xewer qilishiche, 80 - yillarda "nur géziti" ning muxbiri bolghan, 89 - yilidiki tyen'enmén weqeside pa'aliyetlerge aktip qatniship türmige élin'ghan, kéyin amérikining xarward uniwérsitétida oqughan, washin'gtondiki wilsün merkizide teklip tetqiqatchi bolghan, xitayning sabiq marshali yé jenyingning béqiwalghan qizi, hazir béyjingda turiwatqan, pa'aliyetchan mulahizichi deyching xanim hazirqi xitay re'isi xu jintawning , buningdin 16 yil burunqi tyen'enmén weqesidek bir alemshumul weqening partlishi üchün pilte bolghan, shu sewebtin wezipisidin qaldurulghan we ölüp ketkendin kéyin dawamliq natoghra mu'amilige uchrap kéliwatqan bash sékritar xu yawbangni xatirileshke teyyarliq qiliwatqanliqini "bu hazirqi hökümetning jem'iyetni muressege élip kélish arzusi" dep tehlil qilghan.

Uning éytishiche, xu jintaw özi kommunist partiyining pütün jeddisige warsliq qilidighan xaraktérdiki adem. U hazir maw zédongning sinipi küresh nezeriyisini tashliwétip, emma uning bir partiye hoquq tutush idiyisini saqlap qélip, bundaq murekkep shekil bilen xelqqe qarita köyümchan siyaset yürgüzmekchi boliwatidu. Xu jintaw bu pilanini xu yawbangni xatirilesh pa'aliyiti élip bérishtin bashlimaqchi.

Xu jintaw xu yawbangning burunqi islahat netijilirige ige boliwalmaqchi

Xewerde bayan qilinishiche yene, xongkong uniwérsitétining proféssori jén yüsho ependi "xitayning eng aliy hoquqdari xu jintaw hazir xu yawbangni xatirilesh pa'aliyiti élip bérish arqiliq, xu yawbangning burunqi meshhur islahat netijilirige ige boliwélishni oylawatidu" dep tehlil qilghan. Uning éytishiche, xu yawbang burun siyasiy islahat élip bérishni teshebbus qilghan tereqqiyperwer adem idi. Xu jintaw bolsa bir ixlasmen marksizm -lé'inizmchi. Marksizm aqmighan bügünki künde, xu jintaw hazir xu yawbangdek islahatchilarning téxiche xelq ichide saqlinip turiwatqan abruyi we nam - sherepliridin paydilinishqa muhtaj. Xelqning xu yawbanggha bolghan eqidisini özige qaritiwélishqa muhtaj. Jaw ziyangmu xu yawbanggha oxshash bash sékritar bolghan, emma xu jintaw jaw ziyangni hayat turghuzup 10 nechche yil chetke qaqqan bolghachqa, u jaw ziyangni xatirilimesliki, mubada xelqning rayigha béqip xatirileshke toghri kelsimu, uni xu yawbangni xatiriligendek undaq chong daghdugha qilip xatirilimesliki turghan gep.

Aldin pilanlan'ghan "xatirilesh"

"Yönilish zhornili"da bayan qilinishiche, 10 nechche yildin buyan, jem'iyette xu yawbang eserliri neshrge teyyarliniwatidu. Hökümet da'iriliri xu yawbanggha da'ir her qandaq kitabning chet'ellerde neshr qilinishini jiddiy tosupla qalmay, belki dölet ichide , xu yawbang heqqide maqale yazghan kishilernimu chetke qéqip kelmekte. Hetta xu yawbang eserlirini teyyarlawatqan li ruy ependinimu pénisiyige chiqirish yoli bilen neshriyattiki tehrirlik ornidin qozghiwetken.

Maqalide bayan qilinishiche, buyil 1 - ayda, xitayning chaghan bayrimidin burun, partiye merkizi komitétining birliksep ministiri, xu jintawning yashlar ittipaqi sistémisidiki ishenchlik adimi lyu yendong xanim xu yawbangning oghli xu dépingni chaqiritip kélip "men bash sékritar xu yawbang toghriliq teyyarliniwatqan ikki kitabni anglidim. Bash sékritar xu yawbang jan üzüsh aldida li rüy bilen uzun sözleshken iken. Men shu heqte yézilghan maqalining mezmunini körüp baqsam bolamdu?" dégen. Uningdin kéyin, kommunist partiye merkiziy komitétining teshwiqat ministiri xé gochang xu yawbangning öyige bir séwet gülni kötürüp "aldin héytlap" barghan. Chaghan mezgilide bolsa, xu jintaw bilen wén jawbaw ayrim - ayrim halda xu yawbangning a'ilisini héytlap kelgen. Xu jintaw özi xu yawbangning ayali li jaw xanimgha "11 - ayda bash sékritar xu yawbangning 90 yilliqi xatirilinidu, bu merkezning bir chong herikiti! xatirilesh chong yighini échilipla qalmay, belki uningdin burun "xu yawbang eserliri" neshrdin chiqidu" dep xosh xewer yetküzgen. (Dawami bar)