Xu jintaw rastinla xu yawbangning namini eslige keltüremdu?(2)

1981 – Yili xu yawbang (ongda) ding shawping bilen

Xongkongda chiqidighan "jenubiy xitay seher géziti" de bayan qilinishiche, hazir xitayda dölet re'isi xu jintaw 11 - ayning 20 - küni, béyjingdiki büyük xelq sariyida sabiq bash sékritar xu yawbangning 90 yilliqini xatirilesh pa'aliyiti ötküzüshke, uningdin burun "xu yawbang eseliri"ni neshr qilishqa, jaylarmu herxil shekilde xu yawbangni xatirilesh pa'aliyiti élip bérishqa teyyarliq körmekte. Bu zadi qandaq özgirish?

"Yönilish zhornili"da élan qilin'ghan "xu jintawning xu yawbangni xatirileshke teyyarliq körüshi némidin dérek béridu?" dégen maqalide bayan qilinishiche, xu jintaw hökümiti aldi bilen xu yawbangning öyige héytlap, uningdin kéyinla hujum bashlighan. Chaghan bayrimi ötkendin kéyin, "xu yawbangning terjimihali" ni teyyarlawatqan merkiziy partiye mektipining proféssori 84 yashliq li gongtyen, memliketlik muxbirlar jem'iyitining sékritari 75 yashliq tang féy, xitay penler akadémiyisi neshriyatining bashliqi 81 yashliq jang ding, ijtima'iy penler akadémiyisi yéqinqi zaman tarix inistitutining tetqiqatchisi yen ruping, "xu yawbangning terjimihali" ning mes'ul muherriri wang jen'gonglarni yoqiri derijilik organ rehberliri chaqiritip kélip sözleshken. Ulargha kitabning teyyarlan'ghan nusqisini yuqirining tekshürüp körüshi üchün yollash kérek, chet'ellerde neshr qilishqa ruxset yoq, xilapliq qilinsa, qanuni jawabkarliqi sürüshtürilidu, dep agahlandurush bérilgen.

6 - Ayda, merkiziy partiye mektipi "xu yawbangning terjimihali" ning 1 - kitabini neshr qilishqa bolidu, buni partiye mektep özi neshr qilidu, kitabni 5 orun tekshürüp köridu" dep buyruq chüshürgen. 7 - Ayning 7 - künige kelgende "xu yawbangning terjimihali" xetmu - xet tekshürilidu, dep uqturush chüshürülüsh bilen bir waqitta, xu yawbang jan üzüshtin burun uzun sözleshken li rüy ependi derhal pénsiyige chiqiriwitilken. U yazghan 2000 xetlik kirish söz qisqartilip aran 800 xet qalghan. 7 - Ayning 12 - küni, kommunist partiye merkiziy komitét ishxanisining mudiri wang gang 3 maddiliq buyruq chüshürgen. Buyruqta birinchidin, "xu yawbangning terjimihali" ning 1 - kitabi (baliliq dewri) tehrirlep neshr qilinidu, 2 - , 3 - kitabliri neshr qilinmaydu؛ ikkinchidin, kitabni merkiziy xelq neshriyati neshr qilidu, chet'ellerde neshr qilishqa ruxset yoq؛ üchünchidin, "jaw ziyangning terjimihali" ni neshrge teyyarlashqa ruxset yoq , déyilgen.

"Xu jintawning xu yawbangni xatirileshke teyyarliq körüshi némidin dérek béridu?" dégen maqalide bayan qilinishiche, xu yawbang özi eslidila bir ixlasmen kommunizmchi idi. U jan üzüshtin burun li rüy ependi bilen ilgiri - kéyin bolup 7 sa'et sözleshken. U sözide partiyidin özige etrapliq bir yekün chiqirishni ümid qilidighanliqini, yekünde özige "marksizmchi" dep nam bérilishini telep qilidighanliqini éytqan. Xu yawbang pütün ömride ikki ishni tamamlighanliqini, birinchidin, naheq délolarni tüzitip, ongchilargha qarshi turush herikitidin tartip medeniyet inqilabighiche bolghan ariliqta, naheq zerbige uchrighan kadirlar we 5 xil unsur dep qalpaq keygüzülgen kishilerni azad qilghanliqini؛ ikkinchidin, "heqiqetning ölchimi" heqqidiki munazirige yétekchilik qilip, "re'is mawzédong bikitkenliki nersining hemmisi toghra" deydighan köz qarashni inkar qilghanliqini éytqan. Emeliyette xu yawbang mushu netijiliri bilen xitay kommunist partiyisini gumran bolushtin qutquzup qalghan idi. Bu bir chong töhpe hésablinidu. U bash sékritar bolup turghan mezgilde démukratiyini teshebbus qilidighan, ziyalilargha kengchilik qilidighan birxil "yéngi hakimiyet" yolini tutqan. Bu xu yawbang qaldurup ketken chong siyasiy miras idi. Shunglashqa xu jintaw xu yawbangni büyük xelq sariyida xatirilesh, xu yawbang eserlirini neshr qilish, xu yawbangning islahat idiyisi heqqide doklat uyushturush, xu yawbang izlirini körgezme qilishtin ibaret chong heriketni bashlighan. "Xu jintaning xu yawbangni xatirileshke teyyarliq körüshi némidin dérek béridu?" dégen maqalide bayan qilinishiche, xu jintawning hoquq tutushi hazir éghir qiyinchiliqqa duch kelgechke, xu yawbang xitay kommunist partiyisi tarixida eng abruyluq bash sékritar bolghachqa, xu jintaw uning shan- sherepliridin paydilinip özini pedezleshke urun'ghan.

Maqalide bayan qilinishiche, maw zédong, ding shawping, jang zéminlerning mustebitlikige tuluq warsliq qilghan xu jintawgha, gerche xu yawbangning mirasliri mas kelmisimu, emma u , xu yawbang eserlirini neshr qilish hoquqidin paydilinip, xu yawbangning siyasiy miraslirini burmilap, uni öz xahishi boyiche qaytidin layihilep, xu yawbangning obrazini özi yaxshi köridighan birxil obrazgha aylandurushqa orunup köreleydu.(Dawami bar) (weli)