Хитай коммунист партийиси немә үчүн һазир "патийиниң илғарлиқини сақлаш тәрбийиси" дегән һәрикәтни қозғайду?


2005-01-13
Share

"Америка авази" 2005 - йили 1 - айниң 12 - күни, хитай коммунист партийиси мәркизи комитити йеқинда "коммунист партийиниң илғарлиқини сақлаш тәрбийиси" дегән бир кәң көләмлик сияси һәрикәт қозғашни қарар қилғанлиқини хәвәр қилған иди.

Униңда баян қилинишичә, "коммунист партийиниң илғарлиқини сақлаш тәрбийиси" дегән сияси һәрикәт һазирдин башлап бир йерим йилғичә давам қилидикән. Үч басқучқа бөлүп, биринчи басқучта, мәркизи комитетқа қарашлиқ органларда башлаш; иккинчи басқучта, 7 - 8 - айларда йәрлик партийә һөкүмәт органлирида башлаш; үчинчи басқучта, келәр йили әтиязда йеза, базар, районларда башлаш. Униң муһим ноқтиси чирикликкә вә хиянәтчилккә қарши туруш.

Асасән мундақ "бәш хил адәм" җазалинидикән

Шинхуа агентлиқи 2005 - йили 1 - айниң 13 - күни мәркизи интизам тәкшүрүш комитетиниң 5 хил кишиләрни қаттиқ җазалаш һәққидики қарариниң мәзмунлирини хәвәр қилди.

Униңда баян қилинишичә, қанунсиз һалда нәқ пул қубул қилған яки һәдийә бәргәнләр, әмәлдарлардин мәнсәп тәләп қилғанлар, хотун - балилирини башқурмай, улардин пайдилинип сода-тиҗарәт қилған әмәлдарлар, той-төкүн, өлүм - йитимдин пайдилинип пул - мал топлиғанлар; дөләт ичидә яки чегра сиртида қимар ойниғанлар, бундақ 5 хил катигорийәгә киридиған кишиләр қаттиқ җазалинидикән.

Йәнә бир кәң даирилик вә шиддәтлик сияси һәрикәт

Сияси мулаһизичиләрниң ейтишичә, "коммунист партийиниң илғарлиқини сақлаш тәрбийиси" дегән һәрикәт, әмәлийәттә заманға беқип чирайлиқ сөз билән аталғандәк ундақ илғар сәвийилик, назакәтлик һәрикәт әмәс. Бу бәлки 50 нәччә йилдин буян бир нәччә йилда бир қетим қозғаш арқилиқ партийә өзини сақлап қалидиған йәнә бир чоң сияси һәрикәт. Намда "партийә ичидә елип берилиду" дейилгән болсиму, әмәлийәттә бурунқиға охшаш, ахирқи һесабта йәнила хәлққә қаритилған кәң көләмлик бастуруш һәрикити.

Коммунист партийә пәйда қилған тарихий мәсилиләр дөвә – дөвә

Йеқиндин буян бу һәқтә елан қилинған һәрхил йеңи мулаһизиләр "хәвәрләр мәҗмуәси" дә топлап баян қилинған. Униңда ейтишичә, биринҗидин, коммунист партийә пәйда қилған тарихий мәсилиләр дөвә - дөвә. Мәсилән: әксилинқилапчиларни бастуруш, үч кә қарши туруш, бәшкә қарши туруш, чоң сәкрәп илгириләш, чоң ачарчилиқ, хәлқ коммунаси, мәдәнийәт инқилаби, дегән сияси һәрикәтләрдә пәйда қилған наһәқ делолар. Бу мав зедоңниң тарихий қәризлири, буларниң һечқайсини партийә техи тоғра хуласиләп бир тәрәп қилғини йоқ.

Коммунист партийә пәйда қилған риал мәсилиләрму дөвә - дөвә

50 Нәчә йилдин буянқи әң чоң хиянәтчиләр дең шавпиң дәвридин кейин пәйда болди. Хәлқни дөләт армийиси билән қанлиқ бастурушму шу дәврдә йүз бәрди. Җаң земин дәвридә болса, партийә ичидә хиянәтчилик, чириклик омумлашти. Хәлққә бәднам тоқуп қаттиқ зәрбә беришни йолға қойди. Һазирқи хуҗинтав дәвригә кәлгәндә болса, худди тәмсилләрдики "пухраларниң намратлиқитин сүңики көрүнүп қалди, әмма әмәлдарларниң итлириму сесиқ кикириду" дегән мәнзирини көргили болиду. Бу дәврдә, коммунист партийә өзини сақлап қелип үчүн "җәмийәтни торақлиқ қилиш биринҗи орунда туриду" дегән нам билән хәлқни бастуриватиду.

Хитай коммуист партийиси һазир хәлқарадики улуғ еқимдинму чәтнәп кәтти

21 - Әсирдә хәлқарадики улуғ еқим демократийә, кишилик һоқуққа һөрмәт қилиш, учуқ - юруғлуқ, һөкүмәтни бивастә сайлап чиқиш қатарлиқлардин ибарәт болсиму, әмма хитай коммунист партийиси бу улуғ еқимдин чәтнәп җидди кирзисқа дуч кәлди. Һазир бундақ әһвал астида өзини қутқузуш үчүн бир шиддәтлик сияси һәрикәтни қозғатмақта. Һазир хитайта қозғитиливатқан "партийиниң илғарлиқини сақлаш тәрбийиси" дегән бу һәрикәтни шинҗаң уйғур аптоном районидики уйғурлар "һазир бир шиддәтлик қара боран чиқиватиду" дәп тәсвирлимәктә.(Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт