"Kommunist partiyining ilgharliqi" dégen'ge dunyada héchkim ishenmeydu

"Tyanshan tor béti" de bayan qilinishiche, ötken ayda , Uyghur aptonom rayonida "kommunist partiyining ilgharliqini saqlash terbiyisi" dégen siyasi heriketni élish bérishqa seperwer qilidighan chong yighin échilghan. Yighinda kommunist partiyining Uyghur rayonigha qoyghan shujisi wang lé chu'en ependi, "kommunist partiyining ilgharliqini saqlash terbiyisi" dégen bu heriketning nahayiti muhim heriket ikenlikini tekitlep " , 1 milyon 100 ming neper partiye ezasini toplap terbiye élip barighan bundaq keng kölemlik heriket 20 nechche yildin buyan bolup baqmighan idi" dégen.

Bu heriket Uyghur yurtlirida xitay ölkiliridin alahidirek élip bérilidiken

Uning sözide yene "bu heriketni shinjangning emili ehwaligha maslashturush élip bérish kérek" déginidin qarighanda, bu heriket Uyghur yurtlirida xitay ölkiliridin alahidirek élip bérilidiken.

Wang lé chu'en ependining "bu heriket arqiliq partiye ezaliri we kadirlar qoshunidiki közge körünerlik mesililerni hel qilish" déginidin qarighanda , kommunist partiyining ilgharliqini saqlash dégen heriket Uyghur aptonom rayonida partiye ezalirighila qarita emes , belki pütün kadirlarghiche kengeytilip élip bérilidiken. Shundaqla, saqlan'ghan mesililerning ichidin "közge körünerlik mesile" dep qaralghanlirila hel qilinidiken.

Her qaysi wilayetlerde bu heriket pütün xelqqiche kéngeytilip élip bérilmaqta

Uyghur aptonom rayonluq hökümetning tor bétide bayan qilinishiche, qeshqer wilayetlik partkom shujisi si dagang ependi wilayetlik idare – organlargha, mektep we karxanilargha bérip " kommunist partiyining ilgharliqini saqlash terbiyisi" dégen heriketni élip bérish toghrisida köp qétim seperwerlik doklati bergen.

Aqsu, bayn'ghulin, chöchek, bortala, ili, xoten qatarliq wilayet -oblastlardimu, bu heriket hazir herxil shekil qollinip keng da'iride élip bérilmaqta. "Hemme a'ilige kirish" dégen shekildin qarighanda, "kommunist partiyining ilgharliqini saqlash terbiyisi" dégen bu heriket hazir Uyghur aptonom rayonida da'irisi hemme qatlamlarghiche, pütün xelqqiche kéngeytilip élip bérilmaqta.

"Kommunist partiyining ilgharliqi" dégen'ge dunyada héchkim ishenmeydu

Xewerler mejmu'eside élan qilin'ghan bir mulahizide xu jintaw otturigha qoyghan "kommunist partiyining ilgharliqini saqlash terbiyisi" dégen heriket, maw zédongning 7 - 8 yilda bir qétim heriket élip bérish dégen sözning ijrasi dep mulahize qilin'ghan.

Uningda bayan qilinishiche , hazir "kommunist partiyining ilgharliqi" dégen gepke dunyada héchkim ishenmeydu. Xitay kommunist partiyisimu, xuddi dunyada gumran bolghan bashqa kommunist partiyilerge oxshash alliqachan chérikliship ketken partiye. Uni xelqning sözi bilen teswirligende , kommunist partiyining idare - organlirida derwaza aldida tiklep quyulghan tashtin yasalghan shirning heykilidin bashqa yuyup - sürtse pakize bolalaydighan erbab tépilmaydu.

Xitay kommunist partiyisi 50 nechche yildin buyan istil tüzütüsh, échilish - sayrash dégendek xilmu - xil namlar bilen siyasi heriket élip barghan idi. Uning héchqaysida ilgharliq bolmighan. Hemmiside xelq qattiq ziyankeshlikke uchrash bilen ayaghlashqan. Bu qétim kommunist partiyining bash sékritari xujintaw yene "kommunist partiyining ilgharliqini saqlash terbiyisi" dégen chirayliq nam bilen siyasi heriket élip bérishni otturigha qoydi. U, kommunist partiyide saqlan'ghan mesililer "terbiye" bilen hel qilip ketkili boli'idighan mesile dep qarighan.

Emeliyette chet'ellerde xitay kommunist partiyisige 9 baha élan qilin'ghandin kéyin, xitay kommunist partiyisi uningda körsetken pakitlarni inkar qilalmidi. Bu partiyining jinayetliri üzül - késil ashkarilandi. Bundaq ehwal astida, xu jintaw metbu'atlarni qattiq kontrol qilish arqiliq, qarshi awazlarni boghup tashlap, xitay kommunist partiyisini bir mezgilgiche halakettin saqlap qélish üchün bu heriketni élip bérishni otturigha qoyghan.

"Oghrilar oghrini tut" dep sehnige chiqiwélip warqirawatidu

Ismini melum qilishni xalimaydighan bir kishi muxbirimizgha "hazir Uyghur aptonom rayonida kommunist partiyining ilgharliqini saqlash dégen heriketning daghdughisi nahayiti chong boliwatidu, kishige xuddi yene bir "qara boran" chiqidighanliqini hés qildurmaqta. Bu qétim yenila "oghrilar oghrini tut" dep sehnige chiqiwélip warqirawatidu" dégen.

Kommunist partiyide saqlap qalidighan nime ilgharliq barken?

Ismini melum qilishni xalimaydighan yene bir kishi muxbirimizgha "bu waqqiche hökümet yalghan éytip yapqan mesililer emdi ashkara boldi, yer tewresh yüz bergendin kéyin, Uyghur yurtlirining bay bolghanliqi yaki intayin namrat halgha chüshüp qalghanliqi pütün dunyagha ayan boldi. Yéqinda bezi jaylarda qar apiti yüz bergen idi, yerlik Uyghur xelqning hetta qishta kéyidighan ayighi yoq, yalangayagh qalghanliqinimu dunya kördi, bu partiyide saqlap qalidighan néme ilgharliq barken" dégen. (Weli)