Réstoranlardiki israpchiliqning arqisida ...

• Muxbirimiz gülchéhrening bu heqtiki toluq melumati
• Download story audio

Nöwette Uyghur élining her qandaq sheher nahiye hetta yéza bazarlirighiche échiliwatqan mulazimet qiliwatqan chong kichik réstoranlarning sani yoq. Elwette réstoranlar heshemetlik seremjanliri, mezzilik tamaqliri, köngüldikidek mulazimetliri we yene artistlarning orunlishidiki güzel sen'et nomurliri hem buning bilen meydan'gha kelgen qizghin keypiyati bilen Uyghurlarning kündilik turmush, méhmandarchiliqlirigha, shatliq hem qolayliqlar élip keldi.

Tamaqlar shu péti tökülidu

Her qandaq réstoran üstelliri muqim baha bilen békitilgen, eng töwini bir nechche yüz yü'endin bir qanche ming yü'en'giche. Eng erzan bolghandimu on kishilik bir üstelge on nechche türlük tamaq qorumilar tartilidu. Shirelerge üsti -üstilep döwilinip ketken qorumilar, tamaqlarning köp qismi éship qalidu, éship qalghan tamaqni öyige élip kétidighanlar nahayiti az sanliq bolup, ashqan tamaqlar asasen tökülidu. Réstoranlarda dawam qiliwatqan mushuninggha oxshash israpchiliq mesilisi Uyghur jama'itining köngül bölüwatqan ijtima'iy mesililer témisigha aylandi. Emma réstoranlarda dawamlishiwatqan israpchiliq mesilisini qandaq hel qilish yenila ixtilap telep qiliwatqan bir mesile bolmaqta. Chünki bu yillardin buyan kishilerning turmush aditi bolup singip ketken.

Biz Uyghur élidiki ürümchi, qeshqer, ghulja qatarliq jaylardiki on nechche réstoran'gha téléfon qilip, Uyghur méhmanlarning yaki sahipxanlarning ichide ashqan tamaqlarni élip mangidighanlarning nahayiti az uchraydighanliqi, bezi toylarda hetta 20-30 üstellik tamaqlarmu shu piti tükülidighanliqini bilduq.

"180 Ming yü'enlik toylarni uzattuq "

Ürümchide eng chong yaq hetta ottura asiya boyichimu eng chong réstoran dep saniliwatqan künige on ming kishi birla waqitta ghizalinalaydighan döngköwrüktiki chong bazar réstoranining bir dréktori ziyaritimizni qobul qilip bu réstoranni Uyghur élidiki eng yaxshi réstoran dep maxtidi.

U " résuranimizda eng erzan joza ikki ming besh yüz seksen yü'en, her küni shundaq aldirash méhman bek jiq, toy qilip biraqla kötüriwalidighanlar bar qimmet bolghanda 180 ming yü'enlik toylarni uzattuq, " dédi.

U yene tamaqlarning molluqidin her küni köp tamaqlarning éship qalidighanliqi bu tamaqlarni birni qoymay töküwétidighanliqini éytti.

Tamaqlarning éship qalghandin kéyin tökülidighini muqerrer, emma bu tamaqlarning tökülgendin kéyin qandaq bir terep qilidighanliqi heqqide alghan jawabilirimiz bizni téximu oygha saldi.

Barghanche heshemetke öginip ketken xelqning özgirishige waqit kérek

Nöwette bezi Uyghur ziyaliliri "réstorandiki israpchiliqlarni tügitish, toy - tökün uzutush adetlirimizni, réstoranning tamaq chiqirish adetlirini özgertish kérek, özi tallap élip yeydighan usul boyiche, réstoranlarning bir chétige tallap yeydighan méhman'gha qarap teyyarlap bashlisa, bundaq bolghanda tamaqlar éship qalsimu meynet bolmaydu. Toy igiliri éship qalghanni élip ketsimu bolidu. Tamaq tökidighan, zaye qilidighan ishmu özgertilidu " dégenlerni teshebbus qilmaqta.

Yene beziler "israpchiliq rastinla éghir. Asasliqi réstoran xojayinliri bir üstel manche pul dep muqim bikitiwetken bolghachiqa uni özgertishke sizning amalingiz yoq. Bumu israpchiliqni tügitimen digenlerning yulini tusup quyiwatqan amillarning biri", dep qarimaqta. Emma ürümchidiki melum bir réstoranning diréktori bu xil pikirlerni réstoran bashqurghuchiliri qobul qilghan teqdirdimu barghanche heshemetke öginip kétiwatqan Uyghur jem'iyitining buni qobul qilishigha hem adetke aylan'ghan israpchiliqni tügitishke bir mezgil kétidighanliqini bildürdi. Yene bezi ziyaliylar gerche Uyghur jem'iyitide dawam qiliwatqan israpchiliq mesilisi Uyghur ziyalyliri, jem'iyet hemde millet mesililirige köngül bölidighan bir qeder ilghar kishiler arisida tekitliniwatqan hetta maqalilar élan qiliniwatqan, tor betlerde talash tartish qiliniwatqan mesile bolsimu emma mezkur témilar yenila oqushqa tégishlik heqiqiy obyéktlardin mustesna qalmaqta. Emeliyette del shu kishiler yeni israpchiliqni keltüriwatqan shu kishilerning diqqitini qozghap, israpchiliqni'azaytishqa herket qilishqa ündesh idi " dep qarimaqta. (Gülchéhre)