Jang zéminning esliy qiyapiti(22)

"Uluq ira géziti"de élan qilin'ghan "jang zéminning esli qiyapiti" namliq chatma obzorning "azatliq armiye ichidiki chiriklik" dégen qismida bayan qilinishiche, xitayda jang zémin xuddi maw zédong, déng shawpinglardek urushqa qatniship baqmighan, herbiyge qomandanliq qilip baqmighan, herbiy qisimlar ichide tonulmighan kishi bolghachqa, shunglashqa bolsa kérek, u xitayda téxtke chiqqandin kéyinla , herbiy qisimlar ichide aldi bilen özining yéqinlirigha, özige yalaqchiliq qilghan kishilerge mensep we unwan bérip, özining ornini muqimlashqa tirishqan. Jang wennyen, yushiguy, gobeyshong dégendek kishilerning yuqiri derijilik mensepke qoyulushi tamamen shu sewebtin bolghan. Jang zémin shu arqiliq özining herbiy qismlardiki hökümranliqini tikleshke bashlighan. Herbiy qisimlar ichide hékaye qilinishiche, jang zémin chüshte uxlighan waqitlarda, 47 - korpusning bashliqi go beyshong özi postta turup muhapizet qilghanliqi üchünla, jang zémin uni herbiy komitétning mu'awin re'islikke östürgen.

Armiye ichidiki chiriklik

Obzorda bayan qilinishiche, adette normal ijtima'iy tüzüm shara'itidiki döletlerde, hoquq tutidighan partiye démokratik saylam arqiliq hökümetni teshkillep chiqidu. Jem'iyette oxshimighan awazlarning bolushi hoquq tutiwatqan partiyining hakimiyetni idare qilishigha nazaretchilik qilish rolini oynaydu. Jem'iyettiki qarshi awazlar hökümetni idare qilish yaxshi bolmighan rehberlerni mensipidin élip tashlashqa türtke bolidu. Bundaq démokratik döletlerde, armiye peqet döletkila mensup. U qaysibir siyasiy partiyige qarimaydu. Uning birdinbir burchi xelqni we döletni qoghdash. Partiyiler ara yaki hoquq tutiwatqan partiye ichide, her qanche jiddiy jenggi-jédel yüz bergendimu, dölet muqim turiwéridu. Emma xitayda undaq emes, armiye döletke qarimay melum bir partiyige qaraydu. Xitayda armiye melum bir partiyining armiyisi. Shunglashqa u xelqni nezerde tutmaydu. Herbiy qismlardiki asasiy qatlam teshkilatliridimu, partiyining asasiy qatlam teshkilatliri hemmini belgileydu. Kimning qolida herbiy hoquq bolsa, döletning hoquqi we bashqa imtiyazlar shuning qolida. Bundaq tüzüm maw zédongche "partiye miltiqqa qomandanliq qilidu" dégen tüzümning dawami. Jang zémin yolgha qoyghan tüzüm del mushundaq mustebit tüzüm.

Jang zémin générallarni belgilesh bilen chiriklikni teng yolgha qoyghan

"Uluq ira géziti" de élan qilin'ghan "jang zéminning esli qiyapiti" namliq chatma obzorning "azadliq armiye ichidiki chiriklik" dégen qismida bayan qilinishiche, xitayda 1988 - yili herbiy unwan bérish eslige keltürülgendin kéyin, déng shawping 17 kishige yuqiri derijilik herbiy unwan bergen bolsa, jang zémin hoquq tutqandin kéyinla 96 kishige yuqiri derijilik herbiy unwan bergen. 1993 - 94 - Yillirida yene 79 kishige yuqiri derijilik herbiy unwan bergen. Déng shawping 6 kishige yuqiri derijilik général unwani bergen bolsa, jang zémin biraqla 18 kishige yuqiri derijilik général unwani bergen.

Herbiy qisimlar ichide hékaye qilinishiche, 1996 - yili jang zémin öz yénidiki kishilerge "buyaqqa kélinglar, biz bügün bir köngül achayli, bir nechche kishige herbiy unwan bériwiteyli " depla ziyapet teyyarlitip, topchi 2 - qisim siyasiy komissari süy yongjü qatarliq 4 kishini chaqiritip kélip, jang zémin özi ulargha yuqiri derijilik général unwani bergenlikini élan qilghan.

Siyasiy qérilarning ewlatlirighimu herbiy unwan bérip...

Obzorda bayan qilinishiche, jang zémin aldi bilen özining yéqinlirigha, özige xoshamet qilidighan kishilerge herbiy unwan bergendin bashqa, kommunist partiye ichide we herbiy qisimlar ichide nami chiqqan pishqedemlerning balilirighimu herbiy unwan bérip, shu arqiliq ularnimu öz etrapigha toplighan, gerche ularning herbiy istazhi nahayiti qisqa yaki bilimi shu derijige toshmighan bolsimu. Jang zémin 1997 - yili 10 - ayning 24 - küni birkün ichidila, péshqedem bashliqlarning baliliridin xé longning oghli xé péngféy qatarliqlarni öz ichige alghan 530 kishige ottura derijilik général unwani bergen. Jang zémin 2004 - yili texttin chüshüp kétidighan waqittimu, özi shangxeydin béyjingge bille élip kelgen yu shiguy qatarliq 15 kishige yuqiri derijilik général unwani bériwitip andin hoquqni ötküzüp bergen. Hazir herbiy qisimlar ichide, jang zémin peyda qilghan chiriklik-nepsaniyetchilik, bir- birige qayil bolmasliq, bir - birini yéqitishqa heriket qilish qatarliq herxil xahishlar nahayiti éghir derijide dawam qilmaqta. (Dawami bar) (weli)