Jang zéminning esliy qiyapiti(23)

"Uluq ira géziti" de élan qilin'ghan "jang zéminning esli qiyapiti" namliq chatma obzorning "azatliq armiye ichidiki chiriklik" dégen qismida bayan qilinishiche, xitayda herbiy qisimlarning soda - tijaret bilen shughullinishi 1980 - yillarda bashlan'ghan.

Azadliq armiyide etkeschilik

Bundaq bashlinish eyni waqitta, yang shangkun, wang jén qatarliq kishiler herbiy qisimlargha yézip bergen béghishlimilirida "herbiy xirajetning yétishmigen qismini toluqlash" yaki "herbiler özini özi béqish" dep atalghan bolsimu, emma mahiyette undaq bolmighan.

Bolupmu, jang zémin herbiy komitét re'isi bolghandin kéyin, herbiy qisimlarning soda tijaret bilen shughullinishqa keng yol échip, ularni menpe'et élishqa qiziqturush arqiliq, herbiy qisimlardiki achköz, nepsaniyetchi kishilerni öz etrapigha toplighan. 1998 - Yili 7 - ayning 13 - küni échilghan merkiziy komitét yighinida ashkarilan'ghan sanliq melumatlargha qarighanda, xitayda her yili etkeschilik qilip, döletke baj töleshtin qachurulghan pul sani 800 milyard yu'en bolup, buning 500 milyardti herbiy qisimlar teripidin sadir qilin'ghan. Bu pulning mutleq köpchiliki shexsiylerning yanchuqigha kirip ketken.

Xelq ichide hékaye qilinishiche, xitay xelq azadliq armiyisi sherqiy jenubi déngizda "déngiz qaraqchiliri" gha, shimaldiki rayonlarda chégrida yol tosup bulangchiliq qilidighan "bandit" largha aylan'ghan.

Etkes malni talishidighan "sériq déngiz urushi"

"Uluq ira géziti" de élan qilin'ghan "jang zéminning esli qiyapiti" namliq chatma obzorning "azadliq armiye ichidiki chiriklik" dégen qismida bayan qilinishiche, 1998 - yili 7 - ayning 26 - küni, xitay xelq azadliq armiyisi shimaliy déngiz pilotining 4 topchi paraxoti we 2 su asti charlash paraxoti shimaliy yawropadin 70 ming tonna pishshiqlan'ghan etkes néfit mehsulatlirni bésip kéliwatqan bir paraxotni muhapizet qilish wezipisini ötigen. Jama'et xewpsizliki we tamozhna tarmaqliri teripidin yötkep kélin'gen 12 topchi paraxot ular bilen qarshilashqan. Her ikki terep merkiziy herbiy komitéttin yolyoruq sorighan. Déngiz armiyisi buyruqqa bina'en oq chiqarghan. Shu qétim yüz bergen "sériq déngiz urushi" da neq meydanda 87 adem étip öltürülgen. Buning ichide étip öltürülgen tamozhna xademiliri 13 neper. Eyni waqitta bu weqeni tekshürüp birterep qilish cheklen'gen. Obzorda bayan qilinishiche, azadliq armiyining oxshimighan qisimliri, qoralliq saqchilar we siyasiy qanun, tamozhna xademliri öz - ara menpe'et taliship, oq chiqirip, hetta top-zembirek étishidighan herxil urushlarda 1998 - yilining bash yérimidila 2200 din artuq adem ölgen.

Azadliq armiye zawutlirida ishlen'gen zeherlik chikimlik

Filipinning dölet bixeterlik meslihetchisi géler ependi 2001 - yili b b s radi'osi arqiliq, xitayning sherq tereptiki 5 ölkiside xelq azadliq armiyisining ofitsérliri bashquriwatqan zawutlarda ishlepchiqirilghan "muz" dep atilidighan zeherlik chikimlikning filipin'ge kirgenlikini we bu mesile toghrisida xitay hökümiti bilen köp qétim sözleshken bolsimu, buning yenila dawamlishiwatqanliqini pash qilghan.

Azadliq armiyining tijaret qilishi cheklen'gendin kéyin. ..

1998 - Yili 11 - ayda senshi ölkiside échilghan herbiy rayonlarning intizam tekshürüsh yighighida ashkarilan'ghan sanliq melumatlargha qarighanda, 1994 - yilidin kéyin herbiy qisimlar bashqurghan shirketlerning kirimi dölet teripidin herbiy qisimlargha buyrup bergen xirajet miqtaridin 80٪ éship ketken. Bu pulning 50٪ i yuqiri derijilik ofitsérlerning yep - ichish, sayahet qilish we turalghu sélishigha chiqim qilin'ghan. 1998 - Yili herbiy qisimlarning tijaretke arilishishini cheklesh toghrisida buyruq élan qilin'ghandin kéyinki yérim yil ichide, herbiy qisimlardiki etkeschilik, xiyanetchilik mesililiri boyiche turghuzulghan délo sani 2770 ge yetken.

Obzorda éytilishiche, nenjing herbiy rayonining bir bashqurilidighan bomba batalyon komandiri özi quruwalghan "seddichin shirkiti" din shexsiyler temsimliwalghan xiyanet sommisi 3 yüz milyondin ashqan. Merkizi herbiy komitétning ishxana bashliqi dong lyangjü öz namida 9 sayahet ornida alahide turalghu saldurghan. Gu'angju herbiy rayonining qomandani 6 jayda heshemetlik turalghu saldurghan. Azadliq armiye penler akadémiyisi italiyidin 120 ming amérika dolliriliq turalghu bézesh matériyallirini import qilghuzghan. 2 - Topchi qisimning mu'awin qomandani yawropa bazarlirini körüp kélish üchün 250 ming amérika dolliri xejligen.

"Uluq ira géziti" de élan qilin'ghan "jang zéminning esli qiyapiti" namliq chatma obzorning "azadliq armiye ichidiki chiriklik" dégen qismida bayan qilinishiche, amérikiliq robrt lawréns kuhn ependi yazghan "xitayni özgertken adem - jang zéminning sergüzeshtiliri" namliq kitabta "jang zémin herbiy qisimlarning tijaret - soda ishliri bilen shughullinishi cheklidi" dep yézilghanliqi - jang zéminning muxbirgha qilghan yalghanchiliqi. (Dawami bar) (weli)