Jyaw gobyaw: xitay générali ipadiligen idiyining hökümet bilen ortaqliqi bar

• Muxbirimiz welining bu heqtiki programmisi
• Download story audio

Xitay générali ju chéngxu 7 - ayning 6 - küni amérikigha yadro popozisi qilghanliqi heqqidiki xewer xitayning tor betliri arqiliq dunyagha tarqalghandin kéyinla, "xitay kommunist partiyisining teshwiqat minisrliqini topqa tutayli" dep maqale yazghanliqi üchün béyjing uniwérsitétining proféssorliqidin qaldurulghan jyaw go byaw ependi obzor élan qilip, xitay générali ju héngxuni "xitaydiki osama bin ladin" dep atighan idi. 7 - Ayning 20 - küni proféssor jaw ependi ziyaritimizni qobul qildi.

Béyjing uniwérsitétida axbarat ilmi boyiche proféssor bolup ishligen jyaw gobyaw ependi aldi bilen "xitay générali ju chéngxu ipadiligen idiye we ang intayin qalaq, intayin yawuz oy - pikir" dep körsetti. Shundaqla yene, xitayning herbiy da'iriliri shu qeder köp xelqni bedel bergüzüp, yadro popozisi qilghanliqigha qarshi turush kérek, dep tekitlidi.

Jyaw gobyaw ependi so'al qoyush sheklide tehlil yürgüzüp "ju chéngxu némige asasen shi'en shehirining sherqidiki hemme xelqni, ularning hayatini, menpe'etini yoq qilish bedilige yadro urushi qilmaqchiken? xelqni qanchilik bedel töligüzimiz dése, xelq ulargha maqul dep shunchilik bedel tölep béremdiken?" dédi.

Jyawgobyaw ependi xitay générali ju chéngxuning neziyiwiy asasi heqqide tehlil yürgüzdi. Uning éytishiche, ju chéngxuning sepsetisi nopus mesilisi jehettin otturigha qoyulghan. U xitayda nopus mesilisi bir chong mesile, mushu esrning otturilirida yaki axirida, bu mesile haman otturigha chiqidu, dep qarighan. Gerche shundaq dep qaralghandimu, ju chéngxuning yaki herbiy qisimlardiki qaysi bir kishining yaki xitay hökümitidiki qaysibir qattiq qolluq siyaset qollunushni teshebbus qilghuchi kishining insaniyet üchün "maysa taqlash" hoquqi yoq. Bu hoquq ilahning hoquqi. Qoyuq bolup ketken maysini taqlap shalanglitish yaki shalanglatmasliq ilahning iradisi. Insaniyetning peyda bolushi we tereqqi qilishi tebi'iy yosunda bolidu. Her qandaq bir ademning buni birterep qilish hoquqi yoq.

Jyawgobyaw ependi osama bin ladin bilen ju chéngxuni sélishturup tehlil qildi. Uning éytishiche, osama bin ladin hökümet emes. U bir shexsi yaki teshkilat, belki yer asti teshkilati. Uning herikiti melum bir döletning yaki hökümetning herikiti emes. Emma xitay générali ju chéngxuning yadro popozisi bilen xitay hökümitining otturisida ortaqliq bar. Ju chéngxuning xahishi hökümet xaraktérliq xahishe.

Jyaw ependining bayan qilishiche, yéqinda xitaydiki tor betliride yene, xitayning sabiq dölet mudapi'e ministiri chi xawtyenningmu ju chéngxugha oxshash sözliri barliqi inkas qilin'ghan. U " kim xitay kommunist hökümitini yoq qilimen dése, pütün xitay yoq qilinidu, insaniyet yoq qilinidu, aldi bilen amérika yoq qilinidu" dégenmish. Her qandaq bir sulalining yaki bir siyasiy partiyining mushuninggha oxshaydighan oy - pikri meghlub bolmay qalmighan. Chünki, insaniyet ezeldin warsliq qilip kéliwatqan idiye nepret we qirghinchiliq emes, belki söygü we rehimdiliq . Hazirqi zamandimu teshebbus qiliniwatqini söygü we rehimdilliq.

Jyaw ependi ju chéngxu bilen chi xawtyenning sözliride néme perq barliqi we ularning xitay hökümiti bilen munasiwiti bar yaki yoqliqi heqqidimu tehlil yürgüzdi. Uning bayan qilishiche, xitayda herbiy qisimlardin chiqqan bu sözler xitay kommunist hökümiti bilen köz qarash jehette ortaqliqqa ige. Ular bir - biri bilen hemnepes. Ju chéngxu nopus mesilisi jehettin pikir qilghan. U xitayda nopus mesilisini hel qilghili bolmaydu, shunglashqa aldi bilen mush kötürüp chiqish kérek, aldi bilen bashqilarni yoq qilish kérek, dep qarighan. Chi xawtyen bolsa idé'ologiye jehettin pikir qilghan. U amérika hazir xitay kommunist hökümiti üchün eng chong tehdit, shunglashqa aldi bilen amérikini yoq qilish kérek, dep oylighan. Bularning oy - pikrining neziriyiwi asasliri oxshimisimu, emma ular yawuzluq, xelqqe, insaniyetke we medeniyetke qarshi turush jehette oxshash. Ular oxshashla, sen kommunist partiyini yoq qilimen déseng, biz ewwel sini yoq qilimiz yaki teng yoq bolimiz, dep oylighan. Mining qarishimche, ularning xitay hökümiti bilen ortaqliqi bar. Chünki hazir xitay yüzliniwatqan ichki ziddiyet bilen xitaygha xelq'aradin kéliwatqan tashqi bésim, ular üchün ortaq. Xitayning ichki qismida hazir menpe'etlerge érishish jehette tengsizlik bar. Xelq'arada bolsa démokratiye hedep qanat yaydurliwatydu, bu ular üchün ortaq bésim. Amérika prézidénti bush ependi " 21 - esir erkinlik esiri" dep jakarlidi. Mining qarishimche, bu nahayiti yaxshi pikir. Hazir xelqning bextlik yaki bextlik emesliki shu dölette erkinlik we démokratiyining bar yaki yoqliqi bilen ölchinidu. (Weli)