Хитай коммунист партийиси һәққидики мулаһизиләр (2)


2004.10.29

Җин җоң әпәнди мақалисида хәлқарада коммунизмниң вә коммунист партийиләрниң гумран болғанлиқи вә әмма хитайда коммунизмниң нами өзгәртилип, коммунист партийә өзини вақитлиқ қутқузуп қалғанлиқи һәққидә тохталған.

Хитайда коммунизм өзгәрди әмма коммунист партийә өзгәрмиди

Җин җоң әпәндиниң баян қилишичә, хәлқарада коммунизм вә коммунист партийиләр өзи дәсләптә пәйда болған сабиқ совет иттипақида ленин, сталин, малинков, херошев, бириƀнев, горбачев қатарлиқ 8 әвлад рәһбәрниң идарә қилиши җәрянида, 80 йиллиқ әмәлийәт арқилиқ синалғандин кейин ахир гумран болди. Русийә вә 8 яврупа дөлити һәммиси бурун өзлири етиқат қилған коммунизмдин вә коммунист партийидин ваз кечип, һечбир иккиләнмәстин өзлири тәнқид қилған, қарши турған капитализимға маңди. Бу дөләтләрдә хәлқиниң кишилик һоқуқи әслигә көтүрүлүшкә башлиди. Коммунизмдин ваз кәчмигән, давамлиқ түрдә "улуғ даһи" ниң улуғ сиясити давамлаштуриливатқан худди шимали корийидәк дөләттә, һазирға қәдәр пүтүн хәлқниң 50٪ и ачарчилиқта өлүп болди. Хитайда болса, коммунист партийә өзини һалакәттин қутқузуш үчүн бир туташ сотсиялизмниң намини вә коммунизмниң намини "хитайчә сотсиялизим", "шавкаң" дегән намларға өзгәртивалди. Әмма коммунист партийә өзи өзгәрмиди . Бәлки бу коммунист партийә шуниңдин тартип пәқәт өзини сақлап қелиш вә өзини қанунлуқ қилиш үчүнла хәлқ билән давамлиқ қаршилишип кәлмәктә.

Җаң земин атқан по

Хитайда җаң земин һоқуқ тутқандин кейин, у өзини һәмминиң "вәкили" дәп елан қилип, һәдәп қораллиқ сақчи қошунлирини кеңәйтип, хәлққә қарита "қаттиқ зәрбә бериш" дегән қанунсиз һәрикәт қозғаш арқилиқ өзиниң кишилик һоқуқини қолға кәлтүрүш үчүн күрәш қилған хәлқни бастурди. Хәлқ ичидики әнәниви дини етиқатларни бастурди. Җаң земин буниңдин 11 йил бурун "марксизм вә тарихий материялизм әгәр фалунгоңни 3 айда йеңәлмисә, күлкигә қалмамду" дәп по атқан иди. Шуниңдин кейин фалунгоң давамлиқ тәрәққи қилди, 10 нәччә йилда 60 нәччә дөләткә кеңәйди. Бу дәврдә пүтүн хәлқниң коммунист партийигә, сотисялизмға болған қаршилиқи барғансири әвҗ алди. Мана буму синақтин өткән әмәлийәт.

Ху җинтавниң партийини қутқузуш шуари

Хитайда ху җинтав һоқуқ тутқандин кейин, адаләтсизликкә чидашлиқ берәлмигән хәлқ юқуриға әриз сунуш, наразилиқ билдүрүш қатарлиқ қанунлуқ шәкил билән күрәш қилишқа башлиди. Коммунист партийә пүтүн мәмликәттә хәлқниң наразилиқи, ләнәт - нәприти астида қалди. Бундақ әһвал астида ху җинтав коммунист партийини һалакәттин қутқузуш үчүн "коммунист партийиниң һоқуқ тутуш қабилийитини ашуруш" дегән шуарни оттуриға қойди. Буниң мәниси йәнила коммунист партийиниң диктаторлиқини ашуруш вә давамлаштуруш, коммунист партийини қайтидин күчләндуруш дегәндин башқа нәрсә әмәс.

Коммунист партийиниң әҗәллик ноқтиси

Коммунист партийә 50 нәччә йилдин буян хитайда хәлқни коммунизм вә сотсиализмдин ибарәт туюқ йолға, һалакәт йолиға, мәғлубийәткә башлиди. Хитай коммунист партийиси хәлқни бу йолға маңғузуш үчүн хәлқниң сөзләш әркинликини, нәшрият әркинликини қаттиқ чәкләш сияситини йүргүзди. Хәлқ бу йолда сияси җәһәттә қаттиқ езилди, иқтисадий җәһәттә ханивәйран болди. Буниң пүтүн җәрянни әсләп көридиған болсақ, коммунист партийә хәлқниң сөзләш әркинлики, нәшрият әркинлики әслигә кәлтүрүлиштин әң қорқиду, мана бу, коммунист партийә һәммидин бәк қорқидиған мәсилә, хитай коммунист партийисиниң әҗәллик ноқтиси. Җин җоң әпәндиниң қаришичә, әгәр хитайда хәлқниң сөзләш әркинлики, нәшрият әркинлики, йәр - зимин һуқуқи, сайлаш - сайлиниш һуқуқи қатарлиқларни өз ичигә алған кишилик һуқуқи әслигә кәлтүрүлсә, хитай коммунист партийисигә орун қалмайду. (Вәли)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.