Xitay kommunist partiyisi heqqidiki mulahiziler (2)

Jin jong ependi maqalisida xelq'arada kommunizmning we kommunist partiyilerning gumran bolghanliqi we emma xitayda kommunizmning nami özgertilip, kommunist partiye özini waqitliq qutquzup qalghanliqi heqqide toxtalghan.

Xitayda kommunizm özgerdi emma kommunist partiye özgermidi

Jin jong ependining bayan qilishiche, xelq'arada kommunizm we kommunist partiyiler özi deslepte peyda bolghan sabiq sowét ittipaqida lénin, stalin, malinkow, xéroshéw, biriƀnéw, gorbachéw qatarliq 8 ewlad rehberning idare qilishi jeryanida, 80 yilliq emeliyet arqiliq sinalghandin kéyin axir gumran boldi. Rusiye we 8 yawrupa döliti hemmisi burun özliri étiqat qilghan kommunizmdin we kommunist partiyidin waz kéchip, héchbir ikkilenmestin özliri tenqid qilghan, qarshi turghan kapitalizimgha mangdi. Bu döletlerde xelqining kishilik hoquqi eslige kötürülüshke bashlidi. Kommunizmdin waz kechmigen, dawamliq türde "ulugh dahi" ning ulugh siyasiti dawamlashturiliwatqan xuddi shimali koriyidek dölette, hazirgha qeder pütün xelqning 50٪ i acharchiliqta ölüp boldi. Xitayda bolsa, kommunist partiye özini halakettin qutquzush üchün bir tutash sotsiyalizmning namini we kommunizmning namini "xitayche sotsiyalizim", "shawkang" dégen namlargha özgertiwaldi. Emma kommunist partiye özi özgermidi . Belki bu kommunist partiye shuningdin tartip peqet özini saqlap qélish we özini qanunluq qilish üchünla xelq bilen dawamliq qarshiliship kelmekte.

Jang zémin atqan po

Xitayda jang zémin hoquq tutqandin kéyin, u özini hemmining "wekili" dep élan qilip, hedep qoralliq saqchi qoshunlirini kéngeytip, xelqqe qarita "qattiq zerbe bérish" dégen qanunsiz heriket qozghash arqiliq özining kishilik hoquqini qolgha keltürüsh üchün küresh qilghan xelqni basturdi. Xelq ichidiki en'eniwi dini étiqatlarni basturdi. Jang zémin buningdin 11 yil burun "marksizm we tarixiy matériyalizm eger falun'gongni 3 ayda yéngelmise, külkige qalmamdu" dep po atqan idi. Shuningdin kéyin falun'gong dawamliq tereqqi qildi, 10 nechche yilda 60 nechche döletke kéngeydi. Bu dewrde pütün xelqning kommunist partiyige, sotisyalizmgha bolghan qarshiliqi barghansiri ewj aldi. Mana bumu sinaqtin ötken emeliyet.

Xu jintawning partiyini qutquzush shu'ari

Xitayda xu jintaw hoquq tutqandin kéyin, adaletsizlikke chidashliq bérelmigen xelq yuqurigha eriz sunush, naraziliq bildürüsh qatarliq qanunluq shekil bilen küresh qilishqa bashlidi. Kommunist partiye pütün memlikette xelqning naraziliqi, lenet - nepriti astida qaldi. Bundaq ehwal astida xu jintaw kommunist partiyini halakettin qutquzush üchün "kommunist partiyining hoquq tutush qabiliyitini ashurush" dégen shu'arni otturigha qoydi. Buning menisi yenila kommunist partiyining diktatorliqini ashurush we dawamlashturush, kommunist partiyini qaytidin küchlendurush dégendin bashqa nerse emes.

Kommunist partiyining ejellik noqtisi

Kommunist partiye 50 nechche yildin buyan xitayda xelqni kommunizm we sotsi'alizmdin ibaret tuyuq yolgha, halaket yoligha, meghlubiyetke bashlidi. Xitay kommunist partiyisi xelqni bu yolgha mangghuzush üchün xelqning sözlesh erkinlikini, neshriyat erkinlikini qattiq cheklesh siyasitini yürgüzdi. Xelq bu yolda siyasi jehette qattiq ézildi, iqtisadiy jehette xaniweyran boldi. Buning pütün jeryanni eslep köridighan bolsaq, kommunist partiye xelqning sözlesh erkinliki, neshriyat erkinliki eslige keltürülishtin eng qorqidu, mana bu, kommunist partiye hemmidin bek qorqidighan mesile, xitay kommunist partiyisining ejellik noqtisi. Jin jong ependining qarishiche, eger xitayda xelqning sözlesh erkinliki, neshriyat erkinliki, yer - zimin huquqi, saylash - saylinish huquqi qatarliqlarni öz ichige alghan kishilik huquqi eslige keltürülse, xitay kommunist partiyisige orun qalmaydu. (Weli)