Xitay kommunist partiyisi heqqidiki mulahiziler (3)


2004.11.01
Share on WhatsApp
Share on WhatsApp

Sün féng ependining " kommunist partiyining mahiyiti zomigerlik" serlewhilik bir mulahizisi "xewerler mejmu'esi"de élan qilindi. Sün féng ependi maqalisida kommunist partiyining mahiyiti zomigerlik qilip hemmini igeliwilishtin ibaret ikenlikini körsitipla qalmay, belki kommunist partiye xitaydek dölette hazir xelqning muhasire ichide qalghanliqinimu körsetken.

Kommunist partiyining zomigerlik neziriyisi

Sün féng ependining bayan qilishiche, kommunist partiyining zomigerlik nezeriyisi "kommunizm" dégen quruq xiyal asasigha qurulghan. Kommunist partiye özimu ghayisini "kommunizmni ishqa ashurushtin ibaret" yeni hemmini omumning qiliwétish arqiliq hemmini özi igeliwalidighanlighini jakalap kelmekte. Démek, kommunist partiyining mahiyiti "kommunizm" dégen quruq xiyalgha asasen yalghan sözlesh, aldamchiliq qilish arqiliq insaniyettiki ré'alliqini yoqqa chiqirish, insaniyetning tebi'i shekillen'gen exlaq ölchemlirini burmilash, buzush, inkar qilishtin ibaret boldi. Kommunist partiye buning üchün xelqni "sinip"qa ayrish usulini qollinip xelq ichide adawet, öchmenlik peyda qildi we "sinipi küresh" arqiliq xelqning en'eniwi edep ölchemlirini buzup, shu arqiliq axirqi hésabta xelqning pütün mülkini tartiwaldi. Kommunist partiye yolgha qoyghan "sinipi küresh" dégenning emiliy jeryani jemiyettiki hemme mesilini hökümetning qoral kuchigha tayinip bir terep qilishtin ibaret boldi. Kommunist partiyide wedige emel qilish, döletning qanunigha ri'aye qilish, qa'idige buy sunush, adalet, insanperwerlik dégen nerse mewjut emes.

Kommunist partiyining pütün herikiti hemmini igeliwilish

Sün féng ependining bayan qilishiche, sabiq sowét ittipaqida kommunist partiye qurulghandila, uning meqsidi bashqa ellerge tajawuz qilish, hujum qilish we uni igeliwélishtin ibaret bolghan. U shu yol bilen öz etrapidiki türkiy ellerni igeliwaldi. U yawropada, xitayda, koriyide, wétnamda, hetta kambodiyedimu özige oxshash kommunist partiye qurup chiqqan idi. Bu kommunist partiyilermu hemmisi, xuddi sowét ittipaqi kommunist partiyisige oxshashla, hoquq tutushtin burun banditliq, bolangchiliq bilen shughullan'ghan bolsa, hakimiyet qurghandin kéyin öz xelqighe zomigerlik qilish, we etrapidiki ellerge tajawuz qilish bilen shughullandi. Axir 80 yilliq emiliyet arqiliq xelq'arada kommunizm we kommunist partiye sistéma jehettin pütünley gumran boldi. Buning ichide, xuddi xitay kommunist partiyisidek özini saqlap qélish üchünla kommunizmdin yüz örüsh usulini qollinip téxiche xelqqe öktemlik qilip turiwatqan partiyimu hazir xelqning muhasirisi ichide qaldi.

Kommunist partiye xelqning muhasirisi ichide

Sün féng ependining bayan qilishiche, xitay kommunist partiyisi merkizi komititi élan qilghan sanliq melumatlargha qarighanda, buyil 9 - ay ichidila xitayda 170 tin artuq sheher we 390 din artuq nahiyide hökümetke qarshi namayish we qarshiliq heriketler yüz berdi. Buninggha qatnashqan adem sani 3 milyon 110 mingdin ashti. Bu namayishlar asasen dölet égilikidiki karxanilardin ishtin boshutulghan ishchilarning turmushi qanunluq orunlashturulmighanliqi؛ ishchilar ish heqqini alalmighanliqi؛ xelqning asasi hoquqi dexl - terizge uchrighan yaki tartiwélin'ghanliqi؛ kommunist partiye, hökümet, saqchi, qanun organlirida xiyanetchilik - chiriklik ewj alghanliqi؛ jemiyette ikki qutupqa bölünüsh peyda bolup, tüwen tebiqining uninggha narazi boliwatqanliqi؛ hökümetning jemiyettiki mesililerni birterep qilishi adil bolmighanliqi؛ yerlik hökümetler déhqanlarning jan tomuri bolghan yer - zéminini xalighanche égelliwalghanliqi؛ déhqanlargha qalaymiqan alwang- séliqlarni köpeytkenliki؛ déhqanlar ish heqqini qoligha alalmighanliqi؛ yézilarda ximiye ughut we bashqa déhqanchiliq saymanlirining bahasi östürülüp déhqanlarning séliqi ashqanliqi؛ déhqanlarni mejburiy halda östeng chapidighan, yol yasaydighan heqsiz emgekke, yeni hashargha tutushni dawamlashturiwatqanliqi qatarliq qanunsizliqlar tüpeylidin kélip chiqqan. Hazir xitayda déhqanlarning hökümetni muhasirige alidighan qanunluq heriketler barghansiri ewj almaqta.

Xujintawning muhasi'iridin qutulush shu'ari

Sün féng ependining bayan qilishiche, xujintaw qarighu emes, pang emes, dötmu emes, u xelqning qarshiliq namayishlirini kördi, xelqning ghezep - nepritini anglidi, xelqning öz erkinilikini we kishilik huquqini eslige keltürüsh üchün küresh qiliwatqanliqini chüshendi. Xujintaw del mushundaq shara'itta "partiyining huquq tutush qabiliyitini östürüsh" dégen shu'arni otturigha qoydi. Xitayda kommunist partiye hazir özini xelqning muhasirisidin qutquzush üchün heriket qiliwatidu. Sün féng ependining bayan qilishiche, xelqning özining kishilik hoquqini qolgha keltürüsh körishi, mahiyettin eytqanda, xelqning kommunizmgha we kommunist partiyige qarshi medeniyet körishidin ibaret. (Weli)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.