Xitayning yilliq omumiy mehsulat qimmiti, 5 - omumiy yighin we "muqeddes - 6"

Xitay kommunist partiyisining 5 - omumiy yighini 10 - ayning 11 - küni ayaghlashqandin kéyinla, xitay hökümiti "muqedes - 6" namliq alem kémisini asman'gha chiqirip, 5 - uninggha "salyut étip, daghdugha qilip" sogha teqdim qildi. Mushu künlerde xelq'arada xitayning yilliq omumiy mehsulat qimmiti, 5 - omumiy yighin we "muqeddes 6- " témiliri boyiche yéngi mulahiziler élan qilindi.

"Gérmaniye awazi" ning bayan qilishiche, xitay kommunist partiyisi merkiziy komitéti 5 - omumiy yighinda bezi atalghularni özgertken herikitini, partiyining organ géziti "yéngi burulush" dep atighan. Nurghun kishiler we metbu'atlar buningdiki "maharet" ni sezmey qalghan. Xitay burun "5 yilliq pilan" dep atap kéliwatqan sözni bu qé'itm jimjit halda "5 yilliq pilanlash" dep atashqa özgertken.

Ismi özgertilgen pilan

Hazirqidek, xitayda baylar bilen namratlarning perqi barghanséri chongiyip, baylarning heshemetlik mashiniliri nege barsa , kéyimi yirtiq yoqsullarni soquwetmise yoldin ötelmeydighan ehwal astida, xitay ichkiy bésimgha duch kelgen, xelq'arada bolsa, chet'ellerning bazar igilikige maslishishqa mejburlishigha duch kelgen ehwal astida, xitay hökümiti özining "sotsiyalistik pilanliq igilik" tin ajrilip chiqqanliqini, hazir bolsa peqet bazar igilkining éhtiyajigha asasen adettikiche "pilanlash" élip barghanliqini bildürüsh üchün, burunqi "5 yilliq pilan" dégen atashni hazir "5 yilliq pilanlash" dep atashqa özgertiwalghan. Gerche xitay hökümiti qiliwatqan ishlirining namini herxil özgertip atiwalsimu, emma u ning döletke bolghan kontrolluqini alliqachan yoqatqanliqi bir pakit.

Xu jintawning "emeliy ish" liri

Erkin asiya radi'osining obzorchisi lin bawxu'a ependining tehlil qilishiche, xitay kommunist partiyisining 5 - omumiy yighinida ikki ish qilin'ghan. Biri ghulghula qilish, yene bir emeliy hoquq teqsimati. Yighinda déng shawping nezeriyisi, jyang zéminning 3 ke wekillik idiyisi, 11 – besh yilliq pilan, baylar bilen namratlarning perqini kichiklitish, namratlarni yölesh , ching turush, kücheytish, tizlitish, chungqurlitish, yuqiriy kötirish, ilgiri sürüsh, algha ilgirilitish, , toluqlash, yol échish, kapaletlik qilish, dawamlashturush, küchni toplash, inaq jem'iyet, bir niyet bir meqsette bolush, qanun boyiche idare qilish, mashliship ishlesh dégendek sözler üstide ghulghula köp bolghan. Xu jintaw yighin ehlining béshini qayduriwitip, özining hoquq teqsimatini jimjit élip bérip "emeliy ish" qilghan. Yighinda yene "namratlarni yölesh" dep shu'ar towlap qoyup, emeliyette intayin köp meblegh serp qilip "muqedes - 6" dégen alem kémisini asman'gha chiqirip, xu jintawning 4 - ewlad yadrosi ikenlikidin ibaret quruq abroyini namayan qilghan.

"Yéngi esir mulahize munbiri" de élan qilin'ghan "xitayning amérikidin ötüp kétish xiyali" dégen mulahizide bayan qilinishiche, xitay özini yene 4 yilda gérmaniyidin éship kétidu, 2015 - yiligha kelgende yaponiyidin éship kétidu, 2039 - yiligha kelgende amérikidin éship kétidu, dep qaraydu. Buning emeliyetke uyghun yaki uyghun emeslikini delillesh üchün töwendiki bir nechche sanliq melumatqa qarap chiqayli: xitayning sheherlishish nisbiti 32%, amérikining sheherlishish nisbiti 70%. Xitayda aptomobil qatnaydighan yollar amérikining 7.3% Ge teng. Néfit turubisi amérikining 3.5% Ge. -Gaz turubisi 2.8% Ge teng. Hawa qatnishi amérikining 9.1% Ge teng. Aptomobil sani amérikining 5.3% Ge teng. Aliy pen- téxnika ékisport qilish miqtari amérikining 3.5% Ge teng. Keshpiyat -ijadiyet iqtidari yoq déyerlik.

Xitay we énérgiye

Maqalide bayan qilinishiche yene, 2003 - yili pütün dunyaning néfit mehsulati 3 milyard 900 milyon tonna. Buningdin amérika 25% ni serp qilghan. Hazir xitayning néfitke bolghan ihtiyaji 4 milyard 200 milyon tonna. Démek xitaygha pütün dunyaning néfit mehsulati yétishmeydu.

Dunya bankisi 2003 - yili élan qilghan pütün yer sharining yilliq omumiy mehsulat qimmiti 36 térlyon amérika dolliri, buning ichide amérikining 11 térliyon, xitayning 1 tirlyon 400 milyard. Amérika 300 yildin buyan pütün insaniyet üchün ijtima'iy bayliq toplidi. Dunyada téxiche yéngi birxil énérgiye quwiti bayqalmidi. Pütün dunyada téxi yéngi birxil énérgiye menbesi bayqalmighan ehwal astida, eger xitay hazirqi énérgiye éhtiyaji bilen, pütün dunyadiki énérgiye bayliqiliridin bashqilarningmu paydilinish hoquqi barliqi bilen hésablashmay, peqet amérikining omumiy mehsulat qimmitige tenglishimen yaki éship kétimen dése, uninggha yene 3 yer shari bolsimu yetmeydu. Xitayning hazir asman'gha chiqarghan "muqeddes - 6" namliq alem kémisi yéngiliq yaritish yaki bir xil keshpiyat emes, u peqet insaniyet bayliqini serp qilip, xuddi tashpaqining toshqan bilen musabiqigha chüshkenlikige oxshaydu. (Weli)