Xu jintawning "sekkiz sherep, sekkiz nomus" dégen exlaq ölchimi heqqide su'al (2)

Xitaydiki yerlik hökümetler xujintawning "sekkizni sherep bilish, sekkiz nomus bilish" heqqidiki sözini déhqanlargha "sotsi'alistik yéngi yéza qurush" ning "ikki sekkiz ölchimi" dep teshwiq qilishqa bashlighandin kéyin, xelq'aradiki erkin uchur wastilirida buninggha qarita su'allar otturigha qoyuldi. Bash orgini amérikining prinston uniwirsitétidiki xitay uchur merkizining zhurnili bolghan "közitish zhurnili"ning 4 ‏- ayning 1 ‏-künidiki sanida "xujintawning "sekkiz sherep, sekkiz nomus" dégen exlaq ölchimi heqqide su'al" namliq bir maqale élan qilindi.

"Semimiy -sadaqetlik" heqqide

Maqalide bayan qilinishiche, xitay kommunistik partiyisining neziride jem'iyette "éghiz xataliqi" dep atilidighan birxil jinayet bar. Bu partiye adette ras sözligen, könglidiki pikrini erkin bayan qilghan xelqqe jaza höküm qilidu. Döletning hemme neshriyat, uchur wastiliri partiyining "tili" dep hésablinidu, ular adette jem'iyette oxshimighan köz qarash yaki pikirler ning mewjut bolushigha yol qoymaydu. Her qandaq kishining siyasiy bilen shughullinishqa yol qoymaydu. Bu partiye pul we menpe'etni közligende hergiz waste tallimaydu. Kommunist partiye özi dölet puqraliri ichidiki kembeghellerni kemsitidu. Tégi -tekti'idn éytqanda, kommunistik partiye özi xelqqe térrorluq yürgüzidighan qarangghu jem'iyet. Özide semimiy -sadaqetlik bolmighan partiyining re'isi xujintawning "semimiy -sadaqetlik bolush sherep, paydini körgende exlaqni untush nomus" dep wez éytishqa yüzi qandaq chidighan?

Qanun'gha ri'aye qilish mesilisi heqqide

Maqalide bayan qilinishiche, xitayda kommunistik partiyining mertiwisi döletning qanunidin üstün turidu. Kommunistik partiye qanundin chong. Bu partiye dölet qanunini süyi'istimal qiliwéridu. Dölet ichide bu partiyige nazaret qilidighan organ yoq. Kommunistik partiyining dégini özi qanun. Kommunistik partiye merkizi komitéti pütün dölette hemmining yadrosi. Hemmila jayda kommunistik partiyining mustebitliki höküm süridu. Mawzédong burun özini xodani yaki qanunni tunimaydighan adem dep teswirligen emesmu? hazir xitayda kommunistik partiyining ziyankeshlikige uchrighan minglighan-tümenligen dölet puqraliri derdini éytidighan orun yoq. Bundaq qanunsiz partiyining re'isi xujintawning xelqqe qanun'gha ri'aye qilmasliq nomus dep wez éytish heqqi barmu?

Japagha chidap igilik tiklesh mesilisi heqqide

Maqalide bayan qilinishiche, xitay kommunistik partiyisi özining namini "mülükni omumning qiliwétish partiyisi" dep ataydu. "Mülükni omumning qiliwétish" dégen sözning bolangchiliq qilish dégen söz bilen mene jehettin néme perqi bar? xitay kommunistik partiyisi qurulghandin tartip hazirghiche hemkarlishish, kopiratsiyilishish, kommunalishish, bir qisim ademler aldi bilen bay bolush, kommunistik partiye xelqqe wekillik qilidu, dégen shekillerni qollinip yer igilirini, pul -mal igilirini öz makanidin qoghlap chiqirish, xelqning yer-zéminini tartiwélish, mal - mülkini bulash, xelqning mülkini döletning qiliwélish qatarliq bulangchiliq heriketliri bilenla shughullinip keldi. Bu jeryanda, kommunistik partiye jem'iyette peqet pul-malgha ige bolush üchünla xelqqe zomigerlik qildi. Hazir kommunistik partiye qurultay achsa, yighin'gha pütünley kapital igiliri qatnishidu. Partiye qurultéyi emeliyette "memliketlik soda -sana'et kapitalistliri birleshmisidiki meblegh igilirining qurultéyi"gha aylinip boldi. Bulangchiliqni kesp qilghan bundaq kommunistik partiyining re'isining "japagha chidap ishlep, igilik tiklesh shereplik" dep sözlishi tipik aldamchiliq we nomussizliq emesmu? (tügidi) (weli)