Хитай растила тинчлиқ сөйәр дөләтму? (2)


2006.12.01

Йеқиндин буян хәлқарада хитай рәһбәрлириниң 'тинч баш көтүрүш' дегән шуари һәққидә мулаһизиләр болуватиду. Бирқисим кишиләрниң ейтишичә, хитай башқиларниң таҗавузиға учрап келиватқан дөләт. Мавзедуң 'дуня тинчлиқини қоғдаш' шуарини ағзидин чүшүрмигән иди, дең шавпиңму 'тинчлиқта узун муддәт биллә туруш' шуарини ағзидин чүшүрмиди. Һазир ху җинтавму 'тинч баш көтүрүш' шуарини оттуриға қойди. Һәммисиниң шуарида ' тинчлиқ' дегән сөз бар. Әмма йәнә бир қисим мулаһизичиләр буни рәт қилиду.

Ху җинтав 'тинч баш көтүрүш' дегән шуар астида җиддий һәрбий тәйярлиқ қиливатиду

Ху җинтавниң 'тинч баш көтүрүш' дегән шуар астида җиддий һәрбий тәйярлиқ қиливатқанлиқи бир пакит, ‏- дәп баян қилиниду 'хитай растинла тинчлиқ сөйәр дөләтму?' дегән мақалиниң ху җинтав 'тинч баш көтүрүш' дегән шуар астида җиддий һәрбий тәйярлиқ қиливатиду, дегән бабида,‏ - ху җинтавниң 'тинч баш көтүрүш' шуари чиққандин буян, хитай 38 милйон америка доллири сәрп қилип русийидин су‏-30mkk вә су 30mkk2- бәлгилик көп иқтидарлиқ бомбардиманчи айрупиландин 100 ни сетивалди. 300 Милйон америка доллири сәрп қилип 'кило' дәриҗилик 636m бәлгилик су асти парахотиидн 8 ни сетивалди. 1 Милярд 400 милюн америка доллири сәрп қилип 'бу заман' дәриҗилик қоғлиғуч парахоттин 2 ни сетивалди. 2 Милярд америка доллири сәрп қилип s300pmu2 бәлгилик йәр йүзидин һава бошлуқидики нишанларға атидиған бир йүрүш башқурулидиған бомба сетивалди. 1 Милярд америка доллири сәрп қилип 052b вә c бәлгилик башқурулидиған бомба бекитидиған бир йүрүш қоғлиғуч парахот сетивалди. 2 Милярд 600 милйон амеирка доллири сәрп қилип J-11 бәлгилик урушчи айрупиланларниң сәплимилирини сетивалди. Демәк, 'тинч баш көтүрүш' шуари чиққандин буян, русийә, билорусийә қатарлиқ дөләтләрдин оттура һесаб билән һәр йили 2 милярд америка доллири қиммитидә һәрбий қорал сетивелип келиватқанлиқи , бундақ 'тинч баш көтүрүш' ниң әң яхши изаһати болуп турмақта.

Ху җинтав һазир 'тинч баш көтүрүш' дегән шуарини 'тинч тәрәққи қилдуруш' дәп өзгәртивалди

Ху җинтав 'тинч баш көтүрүш' дегән шуар астида җиддий һәрбий тәйярлиқ қилишқа башлиғандин кейин, ‏бу һәрикәт чәтәлләргә тарихтики хитай милләтчиликиниң қайтидин баш көтүрүванлиқини ипадиләп қойған иди, - дәп баян қилиниду 'хитай растинла тинчлиқсөйәр дөләтму?' дегән мақалиниң ху җинтав 'тинч баш көтүрүш' дегән шуар астида җиддий һәрбий тәйярлиқ қиливатиду дегән бабида,‏ - шуниңдин кейин чәтәлләрдә хитайни 'сериқ апәт ' дәйдиған аташ қайтидин пәйда болди. Хитайни 'йеңи тәһдит' дәп қарашқа башлиди. Шуниңдин кейин ху җинтав 'тинч баш көтүрүш' дегәнни 'тинч тәрәққи қилдуруш' дәп өзгәртивалди. Мәйли ху җинтав шуарини қандақ өзгәртивалсун, у хитай милләтчиликини баш көтүргүзүп, хитай кеңәймичиликини давамлаштуруватқанлиқини йошуралмайду.

Хитай тарихтин буян өзлүксиз һалда әтраптики башқа милләтләргә таҗавуз қилип кеңәймичилик қилип келиватсиму, әмма хитайларда һечқандақ хаталиқ болмиған дәп ақлинип келиватиду

‏Хитайдики дәрслик ктабларға қарайдиған болсақ, ‏- дәп баян қилиниду 'хитай растинла тинчлиқ сөйәр дөләтму?' дегән мақалиниң хитайниң өз әтрапидики башқа дөләт яки милләтләр билән мунасивити һәққидә мулаһизә қилинған бабида, ‏- хитайниң нәччә миң йиллиқ тәрәққият тарихида, пүтүнләй өз әтрапидики башқа милләтләргә қарита, йәни шәрқтики хор, шималдики һун, ғәрптики ғуз вә җәнубтики мәрҗиләр билән қандақ уруш қилип, уларни юртлиридин қандақ қоғлап -йоқитип өзи ғәлибә қилғанлиқи һекайә қилиниду. Хитайниң бундақ кеңәймичилики чин шихуаң дәвридила әмәс, таң, суң, юән, миң ,чиң сулалилири дәвридиму изчил давамлашти. Хитай һәр бир заманда кеңийип игиливалған йеңи земинләрни 'әзәлдин хитайниң земини'дәп өктәмлик қилип кәлди. Шундақла хитай өзиниң тарихтин буян әтраптики әлләр вә милләтләргә қарита елип барған террорчилиқини ақлап кәлди. Әтраптики башқа милләтләрни болса 'таҗавузчи' дәп қарилап кәлди. Бундақ хитай кеңәймичилики һазирғичә давам қилмақтила әмәс, бәлки 'тинч баш көтүрүш' шуари астида техиму вәһшийлишиватиду.

Ху җинтав һазир 'тинч баш көтүрүш' дегән шуар астида тәйвәнни хитайға қошувелиш, тибәтләрни вә уйғүрларни хитайлаштуруш үчүн һәрбий вә сиясий һәрикәт елип бериватиду

Хитайда коммунистик партийә һакимийәт бешиға чиққандин кейин, - дәп баян қилиниду 'хитай растинла тинчлиқсөйәр дөләтму?' дегән мақалиниң ахирида, ‏- мавзедуң 'тинчлиқни қоғдаш' дегән шуар астида корийигә әскәр киргүзүп, бирләшкән дөләтләр тәшкилатиниң тинчлиқни қоғдаш қисимлириға қарши уруш қилип, уни 'америка җаһангирликигә қарши туруп, корийигә ярдәм бериш уруши' дәп пәдәзлигән иди. Униңдин кейин, дең шавпиң 'башқа әлләр билән тинчлиқта мәңгу биллә туруш' дегән шуар астида, вейтнамға қарши уруш қозғап, уни 'вейтнамниң әдипини берип қоюш уруши' дәп пәдәзлиди. Әмди ху җинтав 'тинч баш көтүрүш' дегән шуар астида җиддий һәрбий тәйярлиқ қиливатиду. Тәйвәнни өзигә қошувелиш үчүн, тибәтләрни вә уйғурларни хитайлаштуруш үчүн һәрбий вә сиясий һәрикәт елип бериватиду. 'Биңтуән' дәп атилидиған қораллиқ хитай көчмәнлирини пүтүн оттура асияға кеңәйтишни тизлитиватиду. (Түгиди) (вәли)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.