Xitay rastila tinchliq söyer döletmu? (2)

• Muxbirimiz welining bu heqtiki melumati
• Download story audio

Yéqindin buyan xelq'arada xitay rehberlirining 'tinch bash kötürüsh' dégen shu'ari heqqide mulahiziler boluwatidu. Birqisim kishilerning éytishiche, xitay bashqilarning tajawuzigha uchrap kéliwatqan dölet. Mawzédung 'dunya tinchliqini qoghdash' shu'arini aghzidin chüshürmigen idi, déng shawpingmu 'tinchliqta uzun muddet bille turush' shu'arini aghzidin chüshürmidi. Hazir xu jintawmu 'tinch bash kötürüsh' shu'arini otturigha qoydi. Hemmisining shu'arida ' tinchliq' dégen söz bar. Emma yene bir qisim mulahizichiler buni ret qilidu.

Xu jintaw 'tinch bash kötürüsh' dégen shu'ar astida jiddiy herbiy teyyarliq qiliwatidu

Xu jintawning 'tinch bash kötürüsh' dégen shu'ar astida jiddiy herbiy teyyarliq qiliwatqanliqi bir pakit, ‏- dep bayan qilinidu 'xitay rastinla tinchliq söyer döletmu?' dégen maqalining xu jintaw 'tinch bash kötürüsh' dégen shu'ar astida jiddiy herbiy teyyarliq qiliwatidu, dégen babida,‏ - xu jintawning 'tinch bash kötürüsh' shu'ari chiqqandin buyan, xitay 38 milyon amérika dolliri serp qilip rusiyidin su‏-30mkk we su 30mkk2- belgilik köp iqtidarliq bombardimanchi ayrupilandin 100 ni sétiwaldi. 300 Milyon amérika dolliri serp qilip 'kilo' derijilik 636m belgilik su asti paraxoti'idn 8 ni sétiwaldi. 1 Milyard 400 milyun amérika dolliri serp qilip 'bu zaman' derijilik qoghlighuch paraxottin 2 ni sétiwaldi. 2 Milyard amérika dolliri serp qilip s300pmu2 belgilik yer yüzidin hawa boshluqidiki nishanlargha atidighan bir yürüsh bashqurulidighan bomba sétiwaldi. 1 Milyard amérika dolliri serp qilip 052b we c belgilik bashqurulidighan bomba békitidighan bir yürüsh qoghlighuch paraxot sétiwaldi. 2 Milyard 600 milyon améirka dolliri serp qilip J-11 belgilik urushchi ayrupilanlarning seplimilirini sétiwaldi. Démek, 'tinch bash kötürüsh' shu'ari chiqqandin buyan, rusiye, bilorusiye qatarliq döletlerdin ottura hésab bilen her yili 2 milyard amérika dolliri qimmitide herbiy qoral sétiwélip kéliwatqanliqi , bundaq 'tinch bash kötürüsh' ning eng yaxshi izahati bolup turmaqta.

Xu jintaw hazir 'tinch bash kötürüsh' dégen shu'arini 'tinch tereqqi qildurush' dep özgertiwaldi

Xu jintaw 'tinch bash kötürüsh' dégen shu'ar astida jiddiy herbiy teyyarliq qilishqa bashlighandin kéyin, ‏bu heriket chet'ellerge tarixtiki xitay milletchilikining qaytidin bash kötürüwanliqini ipadilep qoyghan idi, - dep bayan qilinidu 'xitay rastinla tinchliqsöyer döletmu?' dégen maqalining xu jintaw 'tinch bash kötürüsh' dégen shu'ar astida jiddiy herbiy teyyarliq qiliwatidu dégen babida,‏ - shuningdin kéyin chet'ellerde xitayni 'sériq apet ' deydighan atash qaytidin peyda boldi. Xitayni 'yéngi tehdit' dep qarashqa bashlidi. Shuningdin kéyin xu jintaw 'tinch bash kötürüsh' dégenni 'tinch tereqqi qildurush' dep özgertiwaldi. Meyli xu jintaw shu'arini qandaq özgertiwalsun, u xitay milletchilikini bash kötürgüzüp, xitay kéngeymichilikini dawamlashturuwatqanliqini yoshuralmaydu.

Xitay tarixtin buyan özlüksiz halda etraptiki bashqa milletlerge tajawuz qilip kéngeymichilik qilip kéliwatsimu, emma xitaylarda héchqandaq xataliq bolmighan dep aqlinip kéliwatidu

‏Xitaydiki derslik ktablargha qaraydighan bolsaq, ‏- dep bayan qilinidu 'xitay rastinla tinchliq söyer döletmu?' dégen maqalining xitayning öz etrapidiki bashqa dölet yaki milletler bilen munasiwiti heqqide mulahize qilin'ghan babida, ‏- xitayning nechche ming yilliq tereqqiyat tarixida, pütünley öz etrapidiki bashqa milletlerge qarita, yeni sherqtiki xor, shimaldiki hun, gherptiki ghuz we jenubtiki merjiler bilen qandaq urush qilip, ularni yurtliridin qandaq qoghlap -yoqitip özi ghelibe qilghanliqi hékaye qilinidu. Xitayning bundaq kéngeymichiliki chin shixu'ang dewridila emes, tang, sung, yu'en, ming ,ching sulaliliri dewridimu izchil dawamlashti. Xitay her bir zamanda kéngiyip igiliwalghan yéngi zéminlerni 'ezeldin xitayning zémini'dep öktemlik qilip keldi. Shundaqla xitay özining tarixtin buyan etraptiki eller we milletlerge qarita élip barghan térrorchiliqini aqlap keldi. Etraptiki bashqa milletlerni bolsa 'tajawuzchi' dep qarilap keldi. Bundaq xitay kéngeymichiliki hazirghiche dawam qilmaqtila emes, belki 'tinch bash kötürüsh' shu'ari astida téximu wehshiylishiwatidu.

Xu jintaw hazir 'tinch bash kötürüsh' dégen shu'ar astida teywenni xitaygha qoshuwélish, tibetlerni we uyghürlarni xitaylashturush üchün herbiy we siyasiy heriket élip bériwatidu

Xitayda kommunistik partiye hakimiyet béshigha chiqqandin kéyin, - dep bayan qilinidu 'xitay rastinla tinchliqsöyer döletmu?' dégen maqalining axirida, ‏- mawzédung 'tinchliqni qoghdash' dégen shu'ar astida koriyige esker kirgüzüp, birleshken döletler teshkilatining tinchliqni qoghdash qisimlirigha qarshi urush qilip, uni 'amérika jahan'girlikige qarshi turup, koriyige yardem bérish urushi' dep pedezligen idi. Uningdin kéyin, déng shawping 'bashqa eller bilen tinchliqta menggu bille turush' dégen shu'ar astida, wéytnamgha qarshi urush qozghap, uni 'wéytnamning edipini bérip qoyush urushi' dep pedezlidi. Emdi xu jintaw 'tinch bash kötürüsh' dégen shu'ar astida jiddiy herbiy teyyarliq qiliwatidu. Teywenni özige qoshuwélish üchün, tibetlerni we Uyghurlarni xitaylashturush üchün herbiy we siyasiy heriket élip bériwatidu. 'Bingtu'en' dep atilidighan qoralliq xitay köchmenlirini pütün ottura asiyagha kéngeytishni tizlitiwatidu. (Tügidi) (weli)