Деһқанларға беришкә тегишлик йәр төлими ниси қалди


2005-02-03
Share

Уйғур елиниң тәңритағ тор бетидә сәйшәнбә күни берилгән хәвәргә қариғанда. Уйғур елидә 2004 - йилдин буян җәмий 81милйон 500миң юәнгә йеқин йәр төлими ениқланған.

Өткән һәптә ечилған уйғур аптонум районлуқ иқтисад тәптиш хизмити йиғинидиму малийә иқтисад интизамиға хилаплиқ қилинған түрлүк мәсилиләргә четишлиқ 6милярд 17милйон юән пул ениқланғанлиқи оттуриға қоюлған. Буниң ичидә деһқанлар мәнпәәти билән зич мунасивәтлик болған йеза игилики, йезиларниң маарип, ишқа орунлишиш, намратларни йөләш мәбләғлири хизмити үстидинму тәптиш қилинип, мунасивәтлик делоларға четишлик бир қисим кадир һәм хадимлар тәкшүрүлгән. Хәвәрдә хитай һөкүмәт даирилириниң -2004йили ениқланған 81милйон 500миң юәнгә йеқин йәр төләм пулини деһқанларниң қолиға вақтида йәткүзүп бериш үчүн һәрикәт қиливатқанлиқи тилға елинған.

Биз мәзкур учурға асасән уйғур елиниң мунасивәтлик органлиридин деһқанларға беришкә тегишлик бу зор миқдардики мәбләғниң немә сәвәптин ниси қалғанлиқини игилишкә тириштуқ. Әпсус уйғур аптонум районлуқ деһқанчилиқ назаритидин телефонимизни алған киши бизниң әркин асия радиосидин телефон қиливатқинимизни билгәндин кейин телефонни өзди.

Биз йәнә бир қанчә мунасивәтлик органлардин учур елишқа тиришқан болсақму нәтиҗиси охшаш болди.

Уйғур елидики деһқанларниң өзлиригә қайтурушқа тегишлик йәр төлимидин хәвери барму- йоқ ? һөкүмәт тармақлири йәр төлимини деһқанларниң қолиға йәткүздиму - йоқ ? дигән соалларға җавап елиш мәқсидидә биз йәнә уйғур елиниң җәнубидики уйғур йезилириға телефон улидуқ. Қәшқәрниң йопурға наһийисиниң мәлум йезисидики бир уйғур деһқан, йәр төлиминиң һазирға қәдәр деһқанларниң қолиға тәгмигәнликидин сирт, баҗ селиқниң еғирлиқидин деһқанларниң иқтисади турмушиниң қийинчилиқларға йолуқиватқанлиқини ейтти.

Уйғур елидин берилгән хәвәрләрдә, хитай һөкүмити деһқанларниң мәнпәәтигә капаләтлик қилип, тоғра сиясәт қоллиниватқанлиқи үчүн, деһқанлар турмушиниң барғанчә яхшилинип, һәр җәһәттә мәнпәәтлиниватқанлиқи тәшвиқ қилиниду, әмма 81милйон 500миң юәнгә йеқин йәр төлиминиң һазирғичә деһқанлар қолиға тәгмәслики, хитай һөкүмитиниң иҗтимаий капаләт түзүминиң қанчилик үнүм бериватқанлиқини көрситидиған бир мәсилә.

Хотәнниң мәлум йезисидин бир уйғур деһқанларниң әһвали һәққидә тохтилип, гәрчә деһқанлар зиммисидики баҗ - селиқлар бу йил хели йиниклитилгән болсиму, һашар әмгикиниң йәнила давамлишиватқанлиқини ейтип бәрди. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт