Tarixni eynen bayan qilish kérek

Yaponiye 1941 - yili 12 - ayning 7 - küni, amérikining prilxarbor portigha ushtumtut hujum qilghandin kéyin, ikkinchi dunya urushida yéngi bir sehipe échilghan idi. Shu chaghda amérikining "arizona" namliq herbiy paraxoti chöktüriwétilgen. 1945 - Yili 9 - ayning 2 - küni, yaponiye shu waqitta amérika tereptin qaytarma hujumgha ötken "missuri" namliq paraxotta teslimname tapshurdi.

Amérika awazining xewer qilishiche, buyil ikkinchi dunya urushi ghelibe qilghanliqining 60 yilliqi xatirilen'gen künde, yaponiyidin 100 oqughuchi "missuri" namliq paraxotni ziyaret qildi. Ular eyni waqittiki pakitlarni kördi, ular buningdin özlirige öchmenlik tapmay, belki neq meydanda tarix ögendi.

B b s ning xewer qilishiche, 9 - ayning 3 - küni, xitay hökümiti ikkinchi dunya urushi ghelibe qilghanliqining 60 yilliqi munasiwiti bilen béyjingdiki tyen'enmén meydanida 10 mingdek ademni teshkillep xatirilesh pa'aliyiti ötküzgen. Dölet re'isi xu jintaw söz qilghan. Xu jintaw sözide tunji qétim milletchi partiye) gomindang( armiyisini asas qilghan yapon'gha qarshi qoshun asasiy frontlarda chong rol oynidi, 1937 - yili bashlan'ghan 8 yilliq yapon'gha qarshi urushta milletchi partiye armiyisidin 3 milyon 200 ming adem chiqim boldi, teywen xelqidin 50 ming adem chiqim boldi, dep tilgha alghan.

Xo bosün ependining eyni shara'it heqqide éytqanliri

Teywenning memuriy mehkime bashliqi, 1 - derijilik général, yapon'gha qarshi urush dewride jang keyshining yénidiki muhapizetchilerning biri, 87 yashliq xo bosün ependi b b s ning ziyaritini qobul qilghan. Uning éytishiche, ikkinchi dunya urushida 3 chong urush meydani bolghan, biri, yawropa jeng meydani, 2 - si, tinch okyan jeng meydani, 3 - si xitay jeng meydani. Xitaydiki jeng meydanining qomandani jang keyshi. Uning éytishiche, 1943 - yilidiki qahire yighinidin kéyin, yaponning teslim bolush shertlirini rozwélid, chirchil we jang keyshi ücheylen muzakire qilghan. Yaponiye wekili 45 - yili 9 - ayning 2 - küni amérikining "missuri" namliq paraxotida teslimnamigha qol qoyghandin kéyin, 9 - ayning 9 - küni yaponning xitaygha teslim bolghanliqini jang keyshining wekili bash général xé yingchin nenjinde qobul qildi. Maw zédong bu ishlarning héchqaysida yoq. Milletchi partiye 1949 - yili ichki urushta meghlubiyetke uchrighandin kéyin, xitay kommunist partiyisi yapon'gha qarshi urushning hemme netijisini özining qilip teshwiq qildi. Yapon'gha qarshi urush bashlan'ghanda, kommunist partiyining aran 20 - 30 mingdek adimi bar idi, ular yapon'gha qarshi urush jeryanida milletchi partiye armiyisining ichide turup özini tereqqiy qilduruwaldi. Bu tarixni eynen bayan qilish kérek.

Urush chiqimliri heqqidiki oxshimasliqlar

Siyasiy mulahizichi lin féng ependining "yéngi dewr" muhakime meydanida élan qilighan obzorida bayan qilinishiche, 1946 - yilining axirida, jongxu'a min'go hökümitining yaponiyidin tölem élish heqqidiki layihiside ölgen we yarilan'ghan adem sani herbiylerdin 3 milyon 310 ming, xelqtin 8 milyon 420 ming, dep atalghan. 1947 – Yili 5 - ayning 20 - küni échilghan jongxu'a min'go siyasiy kéngishining 3 - qétimliq yighinida, yapon'gha qarshi urush dewride ölgen we yarilan'ghan adem sani 12 milyon 784 ming 974 dep békitilgen.

Chong quruqluqtin élan qilin'ghan melumatlar buninggha oxshimaydu. Béyjing xelq neshriyati neshr qilghan "jonggoning yéngi démokratik inqilabi dewri" dégen kitabta, xitay kommunist partiyisining tarix mutexessisliri yapon'gha qarshi urush dewride ölgen we yarilan'ghan adem sani 18 milyon, chiqim bolghan mal - mülük 60 milyard amérika dolliri, dep bayan qilghan bolsa, 1998 - yili jang zémin yaponiyini ziyaret qilghanda, 60 milyard dégen sanining keynige bir nölni qoshup 600 milyard amérika dolliri dégen. Bu qétim 9 - ayning 3 - küni yapon'gha qarshi urushning ghelibisini xatirilesh pa'aliyitide , kommunist partiye özi éytip kéliwatqan 18 milyon dégen sanni xu jintaw yene bir qétim köptürüp 35 milyon dégen.

Lin féng ependining mulahiziside bayan qilinishiche, milletchi partiyige qarighanda, xitay kommunist hökümitining hésablishi téximu ghelite. Yapon'gha qarshi urushta ölgen we yarilan'ghan adem sanini medeniyet inqilabidin burun 18 milyon dégen idi. Jang zémin bu sanni köptürüp 35 milyon dédi. Emdi xu jintaw ölgen we yarilan'ghan adem sani 35 milyon dégenni özgertip, 35 milyon adem öldi dep gül chembirek qoyghan.

Hemmimizge melumki, xitay kommunist partiyisi hakimiyet qurghandin kéyin, tinch shara'itita siyasiy heriket élip bérip zulum sélip yaki apet peyda qilip öltürgen adem sani 80 milyon. Xu jintaw yapon'gha qarshi urushta ölgen adem sanini her qanche köptürsimu, ular özining gunahini eyni zamandiki yapon jahan'girlikidin yinik dep ispatliyalmaydu. (Weli)