Amérika palata meslihetchiliri, xitay jasusluq herikitini 1 ‏- derijilik tehdit dep élan qildi


2007.11.16

Amérika‏-xitay munasiwitidiki iqtisadiy we bixeterlik ishlirini közitish komitéti, tünügün yeni 15 ‏- noyabir küni yilliq doklat élan qilip, xitay herbiy téxnikisidiki yüksilishning amérika hökümet emeldarlirining mölchiridin köp üstün we endishilinerlik derijide ikenlikini eskertip xitay jasusluq herikitini amérika téxnologiyisi üchün 1 ‏- derijilik tehdit dep élan qildi hem bu munasiwet bilen, amérika dölet mejlisni, jasusluqqa qarshi xizmetke köprek meblegh ajritip, xitayning amérikidin téxnika oghrilishini tosushqa chaqirdi.

Xitay pulining qimmitini sün'iy tengshewatidu

Mezkur doklatta, xitayning dölet igilikidiki we himayisidiki shirketliri arqiliq, amérikidin téxnika we uchur oghrilawatqanliqi we bu uchurni özlirining herbiy téxnikisi üchün paydiliniwatqanliqi otturigha qoyulghan. Doklat, xitay jasuslirining, téxnika oghrilashta waqit we pul serpiyati bilen hésablashmasliq yolini tutqanliqini ashkarilighan.

Doklat xitay xelq azatliq armiyisining weyran qilish xaraktérlik urush téxnikisini tereqqiy qildurushqa ziyade tirishiwatqanliqini otturigha qoyghan, buninggha misal qilip, 2006 ‏- yil xitay élip barghan bashqurulidighan bomba siniqining amérikining sun'iy hemrah uchur torigha ziyan yetküzgenlikini, xitayning xakkér hujumlirining amérika we yawropa hökümetlirining intérnét sistémisini nishan qilghanliqini körsetken.

Mezkur doklat yene, xitayning 11 ‏- besh yilliq pilanida otturigha qoyulghan, uchur téxnikisi, téléfon alaqe ishliri, qatnash -transiport we awi'atsiye qatarliq on nechche xil sahediki shirketlerni dölet igilikide bashqurushni dawamlashturush qararini bazar igiliki sistémisidin chetnesh dep körsetken hem buni dunya soda teshkilatining asasiy prinsiplirigha xilap dep eyibligen.

Doklat yene, xitayning xitay pulining qimmitini erkin bazarning belgilishige qoyuwetmey, sün'iy tengshewatqanliqini, bu ehwalning, xelq'ara tijarette, adil riqabet muhitigha dexli yetküzüp xitay shirketlirige imtiyaz yaritip bériwatqanliqini, amérika shirketlirining bu weziyettin ziyan'gha uchrawatqanliqini otturigha qoyghan.

Xitay öz xelqi ichide ejnebiy düshmenlikini yétishtüriwatidu

Doklat yene, xitayning kömür énérgiye sana'itini bashqurushtiki ajizliqi sewebidin muhit kirlishish mesilisining xitaydin halqip amérikighimu tesir körsitiwatqanliqini, xitayning énérgiye tijaritide, mehsulatni bashqa döletlerdek xelq'ara bazardin sétiwalmay yeng ichi sodisi qiliwatqanliqini, buning netijiside sudan, bérma, iran qatarliq insan heqliri depsende boluwatqan döletlerge köplep meblegh sélip, bir tereptin bu döletlerning kishilik hoquq xatirisini kirletse, yene bir tereptin xelq'ara tijarette yolsiz payda qaziniwatqanliqini otturigha qoyghan.

Doklatta yene, xitay axbarat we uchur alaqisini qamal qiliwélip, kommunistik partiye hakimiyitining mustehkemlinishi üchün paydilan'ghandin sirt, bashqa döletlerdiki xelqlerning xitay heqqide uchur igilishige,, saxta xitay mehsulatlirining ziyinidin saqlinishigha tosqunluq qildi dep körsitilgen. Xitayning xelq'ara qanunlargha xilap halda tashqi dunyadin tarqitiliwatqan radi'o ‏- téléwiziye we intérnét uchurlirini tosup öz xelqining uchur erkinlikini boghqanliqini, oz xelqige qarita peqet milletchilik teshwiqati élip bérip, ejnebiy düshmenliki héssiyatini yitildürüwatqanliqini ashkarilighan.

Doklat yene, xitay-hindistan munasiwitige orun bergen bolup, xitay ‏-hindistan arisidiki chégra mesilisining téxi hel bolmighanliqi, hindistanning asiya rayonidiki xitay tesiridin endishe qiliwatqanliqi, bu jehettin amérikining hindistan bilen ortaq heriket qilish imkanigha ige ikenliki bayan qilin'ghan.

Xitay -teywen urushsa amérika chette qalalmaydu

Amérika-xitay iqtisadiy we bixeterlik ishliri közitish komitéti, 2000 ‏- yili 30‏ - öktebirde qurulghan bolup, bu komitétning wezipisi, amérika -xitay soda- tijaret munasiwetliri dawamida, amérika dölet bixeterlikining tesirge uchrighan ‏-uchrimighanliqini nazaret qilishtur.

Xizmet usuli közitish, tetqiq qilish we doklat teyyarlashtur. Bu qétimqisi beshinchi qétim hazirlan'ghan chong hejimlik doklat bolup, komitét ezaliri bu doklatni hazirlash uchun, xitay, teywen we hindistanda tekshürüsh élip barghan؛ bu döletlerning herbiy, memuri emeldarliri, dölet bixeterlik teshkilatining xadimliri qatarliq her sahedin melumat igiligen., bu qétimqi doklat, komitétidiki her ikki partiyige tewe ezalarning birdek maqullishigha érishken bolup, bu doklat, amérika hökümitining xitay tehditi üstide jiddiy oylinishigha türtke bolidighanliqi texmin qilinmaqta.

Doklattiki yene bir muhim nuqta, xitay- teywen munasiwitining barghanséri yirikliship kétiwatqanliqi, ikki terep arisida urush yüz berse, amérikining bu toqunushning sirtida qalalmaydighanliqini eskertishi we amérika hökümitini, teywen'ge qarita herby yardimini kücheytip, ikki terep arisida kuch tengpungluqini shekillendürüshke chaqirishidur. (Shöhret hoshur)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.