Uyghur élining qizilma bayliqliri néme meqsette bulang - talang qiliniwatidu

• Muxbirimiz eqidening bu heqtiki melumati
• Download story audio

Uyghur aptonum rayon hökümiti, qizilma bayliqlarni échish tertipini tüzesh we qéliplashturush xizmitini ching tutup yaxshi ünümge érishkenlikini keng teshwiq qilmaqta.

25 ‏- Öktebir küni xitay xewer agéntliqining bu heqte élan qilghan xewiride mundaq déyilgen: "charlash ijazetnamisi, kan échish ijazetnamisini omumyüzlük éniqlash asasida muhim nuqtini gewdilendürüp, qalaymiqan échish qézish ehwallirini tertipke sélip, ijazetnamisiz , qanunsiz échish - qézish qilmishlirini men'iy qilip, kan échish hoquqini testiqlashni qéliplashturup, gé'ologiyilik charlash we qézilma bayliqlarni échishqa bolghan nazaretchilik we bashqurushni kücheytti".

Xewerde yene "Uyghur élidiki 14 wilayet, oblast , sheher, 48 nahiye 51 kan we sherqiy jungghar kömürlikidiki 12 kömür kan charlash rayonida neq meydanda tekshürgenliki hemde melum miqdarda iqtisadiy jaza qoyulup, toluqlima heqqi yighiwilin'ghanliqi bayan qilin'ghan. Omumen xewerdin, bu rayonda qizilma bayliqlirini bulang ‏- talang qilish heriketliri qet'iy cheklinidighanliqi alahide tekitlen'gen.

Nöwette chet'ellerde pa'aliyet élip bériwatqan kishilik hoquq teshkilatliri bilen Uyghur kishilik hoquq teshkilatliri, Uyghur zéminidiki bayliqlardin bu zéminning igisi bolghan Uyghurlarning qilchilik menpe'etlenmeywatqanliqini ashkarilap, xitay hökümitini qattiq eyiblimekte.

Dunya Uyghur qurultiyi mexsus doklat hazirlap, xitay hökümitining Uyghurlargha dölet térrorchiliqi ishlitipla qalmay, belki bu zéminning qimmetlik meden bayliqlirini talan ‏- taraj qiliwatqanliqini bildürmekte.

Dunya Uyghur qurultiyining bayanatchisi dilshat rishit bilen kanadadiki Uyghur ziyaliysi ruqiye xanim ziyaritimizni qobul qilip, xitay da'irilirining qizilma bayliqlarni bulang - talang qilishtiki meqsidi heqqide toxtaldi.