Xitayda xelq, hökümetning sehiye sahesidiki islahatidin narazi bolmaqta


2005-08-23
Share

Yéqinda, xitay yashlar géziti teripidin élan qilin'ghan bir qétimliq tekshürüshte éytilishiche, xitayda hazir 90٪ xelq, xitayning yéqinqi 10 yildin buyan dawalash saheside élip bériliwatqan islahatidin narazi bolghan. Köp sandiki xelqning inkasidin melum bolushiche, yéqinqi yillardin buyan, xitayda doxturxanilarning sani barghanséri köpeygen, lékin dawalinish heqqi yildin - yilgha örligenliktin, bimarlarning doxturgha körinelishi téximu teske toxtighan.

Bahaning yuqiriliqi, bimarlarni doxturxanidin yiraqlashturmaqta

Radi'omizning ziyaritini qobul qilghan eydiz pa'aliyetchisi xu jya ependi "hazir xitayda, alahide hoquqqa ige bolghan bir qisim yuqiri qatlamdikilerni hésablimighanda, adettiki puqralarning hemmisi dégidek doxturxanigha bérishtin qachidu. Chünki eger doxturxanigha baridiken, adettiki bir zukam késili üchünmu, ming yü'en'ge yéqin pul xejlishi mumkin. Shunga kishilerning, késel bolup qalsa aldi bilen oylaydighini, doxturgha bérishqa erzimdu, erzimemdu dégen mesile bolup qaldi. Chünki meyli qandaq doxturxanida bolsun, doxturlarning hemmisi dégidek dora sodigirige aylinip qalghan. Ular he dése késellerge qimmet bahaliq hetta késel bilen anche munasiwiti bolmighan dorilarni yézip béridu. Islahat élip bérish jeryanida yüz bériwatqan, bu xil dawalash we dora heqqining heddidin tashqiri örlesh ehwali doxtur we doxturxanilargha payda élip kelgini bilen, keng xelqqe taghdek bésim bolup, ulargha zor ziyan yetküzmekte" dep bildürdi.

Mesile dölet tüzülmisi mesilisige bérip taqishidu

Amérika sehiye inistitutining tetqiqatchisi pang yü bing ependimu xitayning dawalash saheside élip bériwatqan islahatini "toghra bolmidi" dep qarighan bolup, u mundaq deydu:

" Menche bu xil islahat élip bérish toghra bolmidi, dawalash saheside bundaq mesililerning yüz bérishini, peqet doxturxana we doxturlarghila artip qoysaq bolmaydu. Bu xil ehwal, pütün jem'iyette yüz bériwatqan bolmighur ishlarning doxturxanilargha bolghan tesiridin kélip chiqqan. Késip éytqanda, dawalash saheside yüz bériwatqan bu mesililer, dölet tüzülmisi mesilisige bérip taqishidu. Shunga mesilini quruq islahat élip bérish arqiliq hel qilish hergizmu mumkin emes, chünki hazir, nurghunlighan kishilerning doxturgha körünishkimu qudriti yetmigini bilen, yene bir qisim puli bar hoquqdarlar nahayiti aliy derijilik dawalash mulazimetliridin behriman bolmaqta ".

Hazir doxturxanilarning wezipisi adem qutquzush emes …

Eydiz pa'aliyetchisi xu jya ependi "xitayning dawalash saheside élip bériwatqan islahati doxturxanilarni pütünley bazarlashturiwetti. Hazir doxturxanilarning wezipisi adem qutquzush emes, belki bimarlardin pul buliwélish bolup qaldi " dep tekitlep, öz köz - qarashlirini mundaq otturigha qoydi :

" Buxil haletning shekillinishi dawalash séstimisida ortaq mewjüt bolup turiwatqan chirikliktin kélip chiqqan. Mesilen, dora bahasi mesilisige kelsek, dora ishlepchiqiridighan zawutlar her xil yollar arqiliq doxturxana we doxturlar bilen birlishiwalghan. Xuddi hökümet idarilirigha oxshash, doxturxana bashliqi, doriger, doxtur, hetta séstiralardin tartip hemmisi dégidek chirikliship bolghan. Shunga ular öz- ara bir - birige chapan yépip, özige payda kélidighan ishnila oylap, dorilarning bahasini nechche hesse örlitiwalghan. Shuning bilen eng chong ziyan tartquchi yenila bichare déhqanlar bolup hésablinidu. Ular yuqiri bahaliq dorilargha érishelmigenliktin, eslide dora ichip dawalansa saqiyidighan késeldin bara - bara éghirliship, axirigha bérip ölüp kétidighan ehwallar yüz bériwatidu. " (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet