Өзбекистан өктичилириниң америка һәрбий базиси һәққидики инкаслири


2005-08-01
Share

Өткән һәптә өзбекистан даирилири америкиниң қарши-хан абадтики һәрбий базисини тақашни, алтә ай ичидә у җайдики әскәрлири вә һәрбий әслиһәлирини йөткәп чиқип кетишни рәсми тәләп қилди. Бу мунасивәт билән америка муавин ташқи ишлар министири николас өзиниң өзбекистанға қилмақчи болған зияритини бикар қилди.

Буниңдин илгири америка дөләт мудапиә министири доналд рамсфелд қирғизистан вә таҗикистанни зиярәт қилғанда у, әгәр өзбекистанниң хан абадтики һәрбий базини ишләтмәсликни тәләп қилса, америкиниң өз қошунлирини елип чиқип кетишкә тәйяр икәнликини билдүргән иди. Демәк, 13-майдики әнҗандики қирғинчилиқтин кейин вашингтон билән ташкәнтниң мунасивәтлири соғуқлишишқа қарап йүзләнгән болуп, америкиниң ислам керимофни демократик ислаһат елип беришқа дәвәт қилип, униң әнҗанда ишләткән қаттиқ қоллуқини тәнқид қилиши шуниңдәк әнҗан вәқәсиниң һәқиқи әһвали һәққидә мәхсус хәлқаралиқ тәкшүрүш елип беришни тәләп қилиши ислам керимофниң өз позитсийисини өзгәртип, хитай вә русийә билән болған һәмкарлиқини күчәйткән иди. У , хитай билән русийиниң қойниға өзини атқан һәмдә америкини өз әскәрлирини елип чиқип кетишни тәләп қилған иди.

Ислам керимофниң америка һәрбий базисини тақашни рәсми тәләп қилип, униңға 6 айлиқ мөһләт елан қилиши керимоф түзимидин нарази болуп, чәтәлләргә чиқип кәткән өзбекистанлиқларниң инкаслирини қозғиди.

Өзбекистан парламентиниң сабиқ әзаси, президент керимофқа бир мәһәл мәслиһәтчилик қилған , һазир америкиниң виргиниа шитатида яшайдиған җаһангир мәмәтоп әпәндиму зияритимизни қобул қилип, өзигә хас болған инкаслирини оттуриға қойди.

Униң қаришичә, америкиниң өз қошунлирини елип чиқип кетиши өзбек хәлқи үчүн зор йоқитиш, чүнки буниң билән бу җайда диктатурулуқ түзүм техиму күчийиши мумкин. Керимоф америкиниң һәрбий базисини тақашни хәлқниң тәләп қилғанлиқи дәп чүшәндүриватиду, әмма бу пүтүнләй ялған болуп, әмәлийәттә хәлқ уни халимайду. Керимоф бу қетим русийә билән хитайниң арқа тәрәптин қоллиши билән өзигә зиянлиқ бир оюн ойниди. Әмма , у бу оюнда уттурди.

Америкиниң қарши хан абадтики һәрбий базиси 2001-йили афғанистандики талибанларға қарши уруш башланғанда тәсис қилинған болуп, у җайда афғанистандики урушқа ярдәм беридиған бир қисим америка айропиланлири вә 800 нәпәр әтрапида қошуни бар иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт