Хитайдики милләтчилик америкини әндишигә салмақта

• Мухбиримиз пәридәниң бу һәқтики толуқ мәлумати
• Download story audio

10-Април күни, гуаңҗудики японийигә қарши намайиш.

Хитай-японийә мунасивәтлири хәлқараниң диққитини тартиватқан мәзгилдә, америка дөләт мәҗлиси америка- хитай иқтисадий вә бихәтәрлик ишлири комитети йеқинда хитайдики милләтчилик долқуниниң нәгә баридиғанлиқи һәққидә мәхсус йиғин уюштурди.

Йиғинға қатнашқан мутәхәссисләр, хитай һөкүмитиниң мәтбуат вә ентернетни, коммунист партийиси өзигә дүшмән дәп қариғанларға қарши хәлқниң тар милләтчилик һессиятини қозғайдиған қорал сүпитидә пайдилиниватқанлиқини билдүрди.

Хитайниң кейинки нишани- америка

Йиғинға қатнашқан вискансон университетиниң профессори едвард фридмән, хитай һөкүмитиниң бу қетим өзиниң асиядики әң асаслиқ рәқиби һесабланған японийини мәқсәтлик нишан қилғанлиқини, шундақла әмдики нөвәтниң америка, тәйвән вә демократийигә келиши мумкинликини билдүргән.

Зияритимизни қобул қилған нйо-йорктики сиракус университетиниң хәлқара мунасивәтләр бөлимидә доктурлуқта оқуватқан қилич қанат, хитайниң хели бурундин тартипла дөләт ичидә америкиға қарши кәйпиятни шәкилләндүрүшкә тиришчанлиқ көрситип кәлгәнликини билдүрди.

Хитай билән японийә оттурисидики өчмәнлик узун йиллардин буян давам қилип келиватқан болсиму, лекин хитайниң йеқинда оттуриға елип чиққан бу қаршилиқлири асаслиқи, японийиниң тарих дәрислик китавиға нарази болуш, японийиниң б д т бихәтәрлик комитетиниң даимий һәйәт әзаси болушни илтимас қилишиға қарши туруш шундақла талаш-тартиштики сенкако тақим араллири маҗраси сәвәбидин юқири пәллигә көтүрүлгән.

Бу маҗра узунға созулуши мумкин

Хитайниң бу қетим японийигә тутқан йоли яхши бир дипломатик усулму? икки тәрәп оттурисидики бу маҗраниң һәл болишиға йәнә қанчилик вақит кетиду? доктур әркин әкрәм бу һәқтә тохтилип, нөвәттики вәзийәткә қариғанда хитай-японийә оттурисидики бу маҗраниң узунға созулиши мумкинликини билдүрди.

Сөһбитимиз давамида қилич қанат йәнә, хитай һөкүмити оттуриға елип чиқиватқан бу милләтчилик еқиминиң кәлгүсидә хитай коммунист партийисиниң өзи үчүн бир тәһдит болуп қелиши мумкинликини билдүрди.

Профессор едвард фридмән йиғинда қилған сөзидә, хитайниң асиядики демократийә болмиған бир дөләт икәнликини, шундақла америка һөкүмитиниң хитайға демократийини тарқитишта йәккә паалийәт елип бармастин, бәлки дуня демократсийиси билән ортақлишип болупму асиядики демократик дөләтләр билән бирлишип һәрикәт қилиши керәкликини билдүрди. (Пәридә)