Қәшқәр шәһириниң дөләтбағ йезисида йүз бәргән бир вәқә һәққидә радиомизға кәлгән инкас


2008-03-14
Share

Қәшқәр шәһиридин мәлум бир уйғур, һазир шветсийидә туруватқан юртдеши абдуришит һаҗи керими әпәндигә телефон қилип, қәшқәр шәһириниң дөләтбағ йезисида йүз бәргән бир вәқәни баян қилған. Бу уйғур дунядин қануний ярдәм сорайдиғанлиқини ипадилигән. Әмма у өзиниң нами вә авазини һазирчә радиода беришни халимайдикән.

Униң баян қилишичә, қәшқәр шәһири дөләтбағ йезисиниң 2 - вә 9 ‏- әтритидин мәмәт турсун вә қурбанҗан дегән икки диний затни 'динни тәшвиқ қилдиң' дәп сақчилар тутуп кетип, бирини уруп өлтүрүп җәситини аилисигә тапшуруп бәргән, йәнә бирини қаттиқ зәхмиләндүрүп аилисигә қайтуруп бәргән.

Өз юртида йүз бәргән вәқәни баян қилған бу киши 'қәшқәр дегән тарихтин буян уйғурлар өзимиз яшап кәлгән бу земинда, һазир өзимиздә гәп қилидиғанға еғиз, мидирлиғили земин йоқ ' дәп дәрт ейтқан.

Уйғур юртлиридин телефон арқилиқ баян қилинған бу вәқәликтики учурларға асасән, қәшқәр шәһәрлик һөкүмәткә вә мунасивәтлик сақчи орунлириға телефон қилип вәқәни ениқлашқа тириштуқ. Қәшқәр шәһәрлик һөкүмәтниң тор бетидә шәһәрлик һөкүмәт телефони дәп елан қилинған 9982823386 дегән номуридин пәқәт тиҗарәт елани чиқти.

Униңдин кейин, телефон номури сораш истансисидин ейтип бәргән номур дөләтбағ йезисиниң сақчиханиси болмай, бәлки тоқумичилиқ фабрикиси сақчиханиси болуп чиқти. Бу сақчиханидикиләр телефонни алди, дөләтбағ йезисиниң сақчиханисидин соришимиз лазимлиқини баян қилди. Дөләтбағ сақчиханиниң телефон номурини билиш үчүн йәнә номур сораш истансисидин қайта сорисақ, бизгә телефон номурини ейтип бәрмәй телефонни үзивәтти. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт