Uyghurlar tarixiy hem medeniy namayendiliri namlirining tawar markisi qilip ishlitilishi munazire peyda qilmaqta


2005.06.30

Nöwette Uyghur élide her xil shekildiki shirket hem mehsulatlarning barghanche köpiyishige egiship, türlük markilar barliqqa kéliwatqan bolup, bezi karxanilar özlirining mehsulatlirining yerlik alahidilikini gewdilendürüsh yaki dangdar namlar arqiliq istimalchilarni qiziqturush üchün Uyghurlargha xas bolghan tarixiy, medeniy namayendilerning namlirini marka qilip bes - beste ishletmekte.

Her qandaq karxana dangliq marka yaritip bazar igileshke urunidu elwette, emma bezi Uyghurlarning inkasigha qarighanda, hazir hetta Uyghurlarning medeniy mirasliri, tarixiy yadikarliqliri mehsulat nami qilin'ghandin bashqa amannisaxan, oghuzxan, bughraxan dégendek Uyghurlar ulughlap kéliwatqan tarixiy shexslerning namlirimu haraq, tamakigha oxshash mehsulatlarning markiliri ornida ishlitiliwatqan bolup, bu Uyghur élide marka heqqide türlük mulahizilerni peyda qiliwatqan iken.

Beziler "karxanilar üchün dangliq marka shu shirket -zawutlarning mehsulatning küchini eks ettürgendek, bir millet tarixi hem medeniyitidiki namayendiler, shu milletning tarixi, medeniyet yiltizi, milliylikining mewjutliqini körsitip béridighan intayin chongqur ehmiyetke ige meniwi hadise.

Nöwette tawar ishlepchiqarghuchilarning peqet mehsulatining sétilishinila oylap, Uyghurlar üchün chongqur menagha ige ulughlarning namlirini tawargha aylandurishi, bolupmu haraq, tamakigha oxshash mehsulatlargha, résturan, qawaqxanigha oxshash orunlargha marka qilip ishlitishi, bu Uyghurlarning medeniyiti, diniy örüp - adetlirige hörmet qilmighanliq hetta milliy kemsitish hésablinidu" digendek pikirlerde bolsa, yene beziler "Uyghurlargha hem Uyghur élige xas bolghan namlarning marka bolup chong bazarlargha sélinishi, mehsulatlarning dang qazinip, bazar tépishidin bashqa, Uyghur éli hem Uyghurlarning tonulishighimu paydiliq bolushi mumkin" dep qarimaqta iken .

Marka sewebidin Uyghurlarda peyda bolghan bu talash- tartishlar chet'ellerdiki Uyghur ziyaliylardimu oylinish peyda qildi. Bu munasiwet bilen biz amérikida yashawatqan Uyghur ziyaliyliridin dangliq obzorchi sidiq haji rozi ependi bilen söhbet ötküzduq .

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.