Uyghur élide, xitay ölkilirige sen'etchi qiz qobul qilish élanliri barghanséri köpeymekte


2007-03-29
Share

Yéqinda, biz Uyghur élining yéza ‏- qishlaqliridin bolupmu, Uyghurlar zich olturaqlashqan qeshqer, xoten hemde aqsu qatarliq jaylardin Uyghur qizlirining türküm ‏- türkümlep xitayning her qaysi jayliridiki zawut, karxanilargha ishchiliqqa élip kétiliwatqanliqi heqqide anglitishlar bergen iduq. Radi'omizning igilishiche, xitay ölkilirige ekitiliwatqan bu Uyghur qizliri yézilardiki yéshi 18din 25 yashqiche bolghan, toy qilmighan, chirayliq, kélishken qizlar bolup, ularning köp sandikisi mejburiy halda élip kétilgen. Amalsiz qalghan bir qisim ata ‏- anilar ilaji yoq téxi toy qilish yéshigha toshmighan qizlirini xitay ölkilirige ewetmeslik üchün, toyini qiliwétishke mejbur bolghan.

"Ussulchi" qobul qilish élanliri

Démek hazir Uyghur élide, "déhqan emgek küchlirini shinjang sirtigha yötkesh" dégen siyaset tüpeylidin, nurghunlighan namrat déhqan qizliri xitay ölkilirige bérip ishleshke mejbur bolghan. Yéqinda xitay ölkiside oqet qilip yürgen bir Uyghur yash radi'omizning heqsiz liniyisige téléfon qilip, Uyghur élidiki nurghunlighan qizlarning wang léchüenning yurti sendunggha apirilghanliqini ashkarilap, özining bu xil ehwaldin qattiq nepretlinidighanliqini bildürdi.

Bundin ikki kün ilgiri, radi'omizning heqsiz liniyisige téléfon qilghan ürümchidiki bir Uyghur yash hazir Uyghur élining ghulja, xoten, aqsu, qeshqer qatarliq yerlik téléwiziye istansiliri xitay ölkilirige "usulchi qiz qobul qilish" heqqide, toxtimay élan béridighan bolup ketkenlikini hemde nurghunlighan Uyghur qizlirining bundaq élanlargha ishinip xitay ölkilirige kétiwatqanliqini melum qildi.

Yérim yalingach "Uyghurche ussullar"

Radi'omizning heqsiz liniyisige téléfon qilghan bu Uyghur yash bir qisim Uyghur qizlirining pul üchün hemmidin waz kéchip, xitay ölkilirige kétiwatqanliqini tekitlesh bilen bir waqitta, ularning xitay ölkiliride oynighan usuli Uyghurche usul emes, belki Uyghurche muzikigha keltürüp oynighan erebche yérim yalingach usul ikenlikini bildürdi.

Radi'omizning ziyaritini qobul qilghan ismini melum qilishni xalimighan ürümchidiki bir ayal hazir herqaysi téléwizorlarda "usulchi qiz" we modél qiz élish heqqidiki élanlarning künséri köpiyip kétiwatqanliqini, Uyghur qizlirining pul üchün hemmidin waz kéchiwatqanliqini tekitlep, Uyghur ata- anilirining bu xil ehwaldin intayin endishe qilidighanliqini bildürdi. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet