Һәптилик хәвәрләр (6- өктәбирдин 12- өктәбиргичә)


2007-10-12
Share

Рабийә қадир ханим, хәлқара кишилик һоқуқ һөҗҗәтлик филим баһалаш комитетиниң әзалиқиға сайланди

Техи алдинқи һәптидә әнглийидә бир қатар паалийәтләрни елип берип, әнгилийә юқири дәриҗилик һөкүмәт вә парламент даирилири билән көрүшүп, уйғурлар мәсилисини тонуштуруп, вашингтонға қайтип кәлгән уйғур миллий һәрикитиниң рәһбири вә дуня уйғур қурултийиниң рәиси рабийә қадир ханим, чех җумһурийитиниң сабиқ президенти всалав хавелниң риясәтчиликидә вә дуня һаҗәтмән хәлқләр тәшкилатиниң уюштуруши билән прага шәһиридә, келәр йили май ейида өткүзүлидиған, 10‏ - нөвәтлик хәлқара кишилик һоқуқ һөҗҗәтлик филим фестивалиниң, баһалаш комитетиниң әзалиқиға сайланди. Көзәткүчиләр буни рабийә қадир ханимниң хәлқара миқясида юқири һөрмәткә сазавәр болғанлиқиниң бир ипадиси дәп һесаблимақта.

Рабийә қадир ханим 2007-йиллиқ нобил тинчлиқ мукапатиниң намзатлиқиға көрситилгән болуп, у һәр қетимда күчлүк намзатлар қатариға киргән. Бу йилқи нобил тинчлиқ мукапати америкиниң сабиқ муавин президенти ал гор әпәндигә берилди.

Уйғурларда роза һейт өткүзди

Рамизан ейи ахирлишип, 12- вә 13-өктәбир күнлири дуняниң һәр қайси җайлиридики мусулманлар мубарәк роза һейтини өткүзди. Әлвәттә, бу күн уйғур мусулманлири үчүнму хасийәтлик вә хушаллиқ күндур.

Америка, түркийә , сәуди әрәбистан, явропа иттипақи вә оттура асия һәм уйғур елидики уйғурлар 12-13-өктәбир күни роза һейтни күтүвелиш йүзисидин түрлүк паалийәтләрни елип барди.

Америка әрмәниләрниң қирғинчилиққа учраш мәсилиси һәққидә қарар лайиһиси мақуллиди

Америка авам палата ташқи мунасивәтләр комитети 10-өктәбир күни америка президенти буш вә түркийә даирилириниң қарши турушиға қаримай, 1 ‏- дуня уруши мәзгилидә османли империйисиниң әрмәнләргә " ирқий тазилаш" елип барғанлиқини муәййәнләштүридиған қарар лайиһиси мақуллиди.

Түркийә мәзкур қарар лайиһисиниң америка - түркийә мунасивәтлиригә еғир дәриҗидә тәсир көрситидиғанлиқини агаһландурмақта. Бу қарар лайиһисидин кейин түркийиниң бир қисим җайлирида наразилиқ намайишлири өткүзүлгән һәмдә түркийә җамаәтчиликидә күчлүк наразилиқ инкаслири пәйда болған. Түркийә изчил һалда бундақ қирғинчилиқни инкар қилип кәлгән.

Хитай америкиниң далай ламаға алтун медал беришигә нарази болди

Хитай ташқи ишлар минстирлиқиниң баянатчиси лю җәнчав 11 - өктәбир күни бейҗиңда мухбирларни күтүвелиш йиғини өткүзүп, америка дөләт мәҗлисиниң далай ламаға америкиниң әң алий алтун медал мукапати бәргәнликигә қарши туридиғанлиқини тәкитләп, "биз һәр қандақ бир дөләт яки шәхисниң далай ламадин җуңгониң ички ишлириға арилишиш үчүн пайдилинишиға қарши туримиз " дегән.

17-Өктәбир күни алтун медал бериш мурасимиға президент бушму қатнишидиғанлиқини җакарлиған болуп, бу хитай тәрәпни биарам қилған. Шу күни йәнә америка дөләт мәҗлиси алдидики мәйданда кәң көләмлик хатириләш паалийити өткүзүлиду.

Америка палата әзалири хитай рәиси ху җинтавға имзалиқ хәт йоллиди

Алдинқи һәптидә ашкарилинишичә, 19-сентәбир америка дөләт мәҗлиси әзаси трен фанкс , том лантос қатарлиқ 33 нәпәр палата әзаси имза қоюп, хитайда түрмидә йетиватқан кишилик һоқуқ паалийәтчиси чен гуаңчеңни қоюп беришкә қистап вә хитайниң вәйран қилиш характеригә игә пиланлиқ туғут сияситигә қарита нәзәр ағдурушқа дәвәт қилип, хитай рәиси ху җинтавға мураҗиәтнамә йоллиған.

Франкс әпәнди вә том лантос әпәнди қатарлиқ мәҗлис әзалири йәнә, уйғур миллий һәрикитиниң рәһбири рабийә қадир ханимниң балилириниң қолға елиниши қатарлиқ бир қатар мәсилиләргә йеқиндин көңүл болуп , хитай һөкүмитидин уларни қоюп беришни тәләп қилған иди.

Мәрһум күрәш күсән әпәнди вапатиниң бир йиллиқи хатириләнди

6-Өктәбир күни америка пайтәхти вашингтон йенидики фаирфакис шәһиридә мәрһум композитор вә сиясий паалийәтчи күрәш күсәнниң сиңлиси мунәввәр ханим вә уйғур америка бирләшмисиниң тәшкиллиши билән күрәш күсән вапатиниң бир йиллиқиға атап нәзир өткүзди .

Мәрһумниң бир йиллиқ хатириләш мурасимиға вашингтон әтрапидики уйғурлар әмәс бәлки, нюйорк вә ниюв җерсий қатарлиқ шитатлардинму бир қисим уйғурларму келип қатнашти. Бу паалийәттә мәрһум күрәш күсәнниң роһиға атап дуа-тилавәт қилинди шуниңдәк униң мол мәзмунлуқ иҗадий паалийәтлири вә сиясий күрәш һаяти әсләп өтүлди.

Қәдимий кучаниң күсән намини өзигә тәхәллус қилған күрәш султан өткән йили. 29 -Өктәбирдә шветсийидә туюқсиз қозғалған йүрәк тиқилмиси билән 47 йешида қаза қилған иди. Дуня уйғур қурултийиниң рәиси рабийә қадир ханим күрәш күсәнниң вапатини уйғур миллий һәрикити үчүн зор бир йоқитиш дәп тәрипләш билән униң уйғур давасиға қошқан төһпилириниң һечқачан унтулмайдиғанлиқини көрсәткән иди.(Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт