Heptilik xewerler (20-yanwardin 26-yanwarghiche)

• Muxbirimiz ümidwarning bu heqtiki toluq melumati
• Download story audio

Qazaqistandiki Uyghur tijaretchiliri kulubi “Ilham mukapati” ni tarqatti

Qazaqistan Uyghur tijaretchiliri yéqinqi on yildin buyan öz millitining medeniyet -ma'arip we sen'et ishlirining tereqqiyatini maddiy jehettin qollash arqiliq körünerlik netijilerning qolgha kélishini ilgiri sürmekte. Dilmurat qoziyéw bashchiliqidiki qazaqistan Uyghur tijaretchiliri kulubi "ilham" dep atalghan bir mukapat tesis qilghan bolup, ular bir qanche yillardin buyan her yili bir qétim bahalash élip bérip, edebiyat -sen'et, ijtima'iy we tebi'iy penler hem bashqa sahelerde közge körüngen we netije yaratqanlarni mukapatlashni dawamlashturmaqta. 2 ‏- Yanwar küni almatadiki muxtar ewizof namidiki döletlik téyatirxanida 2007-yilliq “Ilham mukapati” ni tarqitish murasimi ötküzüldi . Chet'el elchiliri we dölet erbabliri qatnashqan mezkur pa'aliyette medeniyet sépidiki jümlidin edebiyat , sen'et , tinchliq qatarliq sahelerde mol netije yaratqan töhpikarlar mukapatlandi. Bu qétimqi mukapatning turi aldinqi yildikidin köpeygen bolup, uning da'irisige tinchliq mukapatimu kirgüzülgen .

Ilida bir qisim chet'ellikler tazilandi

21- Yanwar küni , ili qazaq aptonom oblastida hökümet hemde saqchi da'irilirining birlikte , chégridin qanunsiz kirgen , resmiyetsiz turuwatqan hem qanunsiz ishlewatqan yeni chet'el tili dersi bérip, oqutquchiliq qiliwatqan chet elliklerge qarita üch xil qanunsizlarni tazilash herikiti bashlighanliqi we bu jeryanda 19 chet'ellikni qolgha alghanliqi xewer qilindi. Ili qazaq aptonom oblastliq hökümet tor bétining xewer qilishiche, mezkur chet'ellikning 17 nepiri qanunsiz chégridin kirgenler bolup, ikki nepiri qanunsiz ishligenler iken. Ili da'iriliri yene türlük tekshürüsh we kontrol qilish charilirini ishqa ashuruwatqan bolup, ular bu arqiliq 2008-yilliq béyjing olimpik tenheriket yighinning ghelibilik échilishini kapaletke ige qilish hem shu waqittiki amanliq tertipini saqlash muddi'asigha yetmekchi iken.

Ürümchide qoralliq bingtü'en terbiyileydighan chong bina sélinishqa bashlighan

Ürümchidiki wujachü dep atilidighan xitay qurulush armiyisining turalghu jayi resmiy sheher qilip özgertilgendin buyan ,uning tereqqiyat süriti téz bolmaqta, yéqinda wujachüde urushqa teyyarliq körüsh telipi boyiche qoralliq bingtü'en eskerlirini terbiyileydighan bir qomandanliq shitabi qurulghan we bu organ üchün chong bina sélinishqa bashlighan. Bu chong binaning nami ékologiyilik herbiy gazarma' dep atilidiken. Nöwette, bingtü'enning herbiy teyyarliq ishlirighimu alahide köngül bölüwatqanliqi melum.

Bingtü'en da'iriliri özlirining adem sanini ikki yérim milyon dep élan qiliwatqan bolsimu, lékin ularning emeliyettiki sanining buningdin xéli köp ikenliki perez qilinmaqta. Bingtü'en Uyghur élida peyda bolghandin buyan yerlik xelqlerning qarshiliq heriketlirini basturup kelgen bolup, ular adette qoralliq déhqanlar dep qarilidu.

Uyghur aptonom rayoni hökümitide hoquq tengshesh élip bérildi

22- Yanwar küni Uyghur aptonom rayonida hoquq tengshesh élip bérilghan bolup, aptonom rayonning yuqiri rehberlik ornida özgirish bolghan. Bu özgirishler Uyghur aptonom rayoni 11- nöwetlik xelq qurultiyi 3- qétimliq omumi yighinining netijisi süpitide bolghan . Uyghur aptonom rayonining re'isi, mu'awin re'isliri, xelq qurultiyining mudiri we mu'awin mudirliri hem yuqiri sot mehkimisining bashliqi qatarliqlar békitilip chiqilghan.

Bu nöwetlik yighinda 9 neper mu'awin re'is békitip chiqilghan bolup, bularning ichide besh neper xitay , bir neper qazaq bar iken. Uyghur aptonom rayonining re'isler qatlimida xitaylarning sani Uyghurlardin artuq bolghan. Bu qétim nur bekri re'islikke resmiy bekitilgen bolup, u söz qilip , özining atalmish üch xil küchlerge qattiq zerbe béridighanliqi, partiye hökümetke sadiq bolup xizmet qilidighanliqi we bashqa xizmetler boyiche wede bergen. Nur bekrining re'is bolushi Uyghurlar arisida türlük inkaslarni qozghimaqta.

Rusiye bash shitab bashliqi؛ rusiye tajawuzchiliqqa yadro qorali arqiliq jawab béridu

Ötken shenbe küni rusiye qoralliq küchliri bash qomandanliq shitab bashliqi général armiye yuriy balu'éwskiy "dunya shuni chüshinishi lazimki, rusiye eger zor xewpke duch kelse, yadro qorallirini öz ichige alghan herbiy küchliri bilen özini qoghdaydu, rusiyining bashqa döletlerge hujum qilish pilani yoq" dep bildürdi. U, sözide rusiyining we uning ittipaqdashlirining igilik hoquqi hem zémin pütünlikini qoghdash üchün qoralliq küchlerni ishlitishi mumkinlikini tekitligen. . Rusiye aliy herbiy emeldarining bu xil yadro qorali ishlitishtin yanmaydighanliqini jakarlishi xelq'ara jemiyetning diqqitini jelp qildi. (Ümidwar)