Афғанистан, иранни әйиблиди

Шәнбә күни афғанистан даирилири, иранни талибанларни қорал билән тәминләватиду, дәп әйиблиди.

Франсийә агентлиқиниң хәвәр қилишичә, афғанистан сақчи даирилири, пәйшәнбә күни фраә өлкисидә, талибанларға қарши елип барған бир тазилаш һәрикити җәрянида, нурғунлиған қорал-ярақ қолға чүшүргән болуп, бу қоралларниң көп қисми иранда ясалған икән.

Фраә өлкисиниң башлиқи муһиттин балучниң ейтишичә, мәзкур қораллар, йеқинда иран арқилиқ фраә өлкисигә киргән. У шәнбә күни мухбирларға бәргән баянатида, "бу қоралларниң иран һөкүмитидин хәвәрсиз, афғанистанға кириши мумкин әмәс" дәп, иран һөкүмитини талибанларни қорал билән тәминләватиду, дәп әйиблигән.

Америка вә шималий атлантик окян әһди тәшкилати хадимлири, бундин бурун бир нәччә қетим иран һөкүмитини талибанларға ярдәм бериватиду дәп әйиблигән. Лекин һазирғичә президент карзай һөкүмити, иран билән мунасивәтләрни бузмаслиқ үчүн, бу әйибләшләрни рәт қилип кәлгән иди. (Өмәр қанат)