Сайлам һарписидики кабул қатарлиқ шәһәрләр ракита һуҗумиға учриди

Афғанистандики президент сайлими шәнбә елип берилиду, президент намзатлири оттурисидики риқабәт әң кәскин басқучқа киргән. Амма бихәтәрлик мәсилиси йәнила президент сайлимидики әң чоң мәсилә. Президент сайлиминиң һарписида афғанистанниң икки чоң шәһири ракитаниң һуҗумиға учриған. Бирақ ракита һуҗуми кәлтүрүп чиқарған бузғунчилик шәнбә күни елип берилидиған сайламға тәсир йәткүзүш дәриҗисидә әмәс дәп қаралмақта. Тунҗи қетимқи һуҗум пәйшәнбә күни кәчиси кабулда йүз бәргән. Икки тал ракита оқи кабулниң шәрқидики бир җайға чүшүп партлиған. 3 - Тал оқ кабулдики бир ахбарат мәркизини нишанға алған. Ахбарат мәркизиниң сиртиға тохтитип қоюлған бәзи машинилар вәйран болған.

Бу арида җүмә күни әтигән афғанистанниң шәрқидики җалалабад шәһиригә чүшкән бир қанчә тал ракита оқида икки бала яриланди. Сабиқ талибан қалдуқ күчлири вә уларниң қоллиғучилири президент сайлимиға йол қоймайдиғанлиқини җакарлап, чәтәл күчлирини афғанистандин қоғлап чиқарғичә күрәш қилидиғанлиқини елан қилған. Һазирғичә сайлам паалийити билән шуғуллиниватқан 12 киши талибанпәрәс күчләр тәрипидин өлтүрүгән. Бирақ афғанистандики америка һәрбий дарилири, талибанпәрәс күчләрниң қаршилиқ көрситиш һәркити пәсийишкә башлиғанлиқини илгири сүрмәктә. Улар, бу әһвал иттипақдаш күчләрниң афғанистандики тазилаш һәркити мувапиқийәтлик боливатқанлиғини көрситиду дәп қариған. Һазир америкиниң 18 миң әскири билән натониң 4 - 5 миң әскири афғанистанда вәзипә өтәватиду. (Әркин)