Алма-атадики шинҗаң мәдәнийәт байримида тил кризиси йүз бәрди


2004-08-20
Share

Қазақистанниң алма-ата шәһиридә өткүзиливатқан шинҗаң уйғур аптоном райони мәдәнийәт байриминиң ечилиш мунасивити билән чақирилған мухбирларни күтүвелиш йиғинида, аптоном районниң муавин рәиси күрәш мәхсутниң аптоном район парткоми тәшвиқат бөлүми башлиқи ву дунфудин, мухбирларниң соалиға уйғурчә җаваб беришкә болидиған -болмайдиғанлиқини сориғанлиқи, қазақистандики уйғурлар ичидә қаттиқ ғул-ғула қозғиди.

Аптоном районниң муавин рәиси күрәш мәхсут билән аптоном район парткоми тәшвиқат бөлүминиң башлиқи ву дунфу башчилиқидики уйғур аптоном райони мәдәнийәт өмики, 17 -авғуст күни алма-ата шәһәрлик һөкүмәт бинасиниң йиғин залида мухбирларни күтүвелиш йиғини өткүзгән иди.

Алма-атадики ихтияри мухбиримизниң хәвәр қилишичә, мухбирларни күтүвелиш йиғинида, алма-ата шәһәрлик радио истансисиниң бир мухбири хитайчә сөзлигән күрәш мәхсуттин соаллириға уйғурчә җаваб беришини тәләп қилғанда, күрәш мәхсут йенидики тәшвиқат бөлүми башлиқи ву дунфудин, мухбирларниң соаллириға уйғурчә җаваб бәрсә болидиған яки болмайдиғанлиқини сориған. Күрәш мәхсут, мухбирниң соалиға ву дунфунниң тәстиқини алғандин кейин уйғурчә җаваб бәргән.

Күзәткүчиләр, аптоном район һөкүмити муавин рәисиниң хәлқара сорунда тәшвиқат бөлүми башлиқидин уйғурчә сөзләш рухсәт алғанлиқи дипломатик сәтчилик, йәнә бир тәрәптин бу уйғурларниң һазирқи сияси орнини әкс -әттүридиған әң җанлиқ пакит дәп баһа беришмәктә. Хәвәрләргә қариғанда уйғур аптоном райониниң сабиқ рәиси исмайил әмәт билән төмүр давамәтләр әйни чағдики сәуди әрәбистанға қилған зияритидә уйғурчә сөзлигәнликтин тәнқидкә учриған. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт