Қазақистан ички ишлар министири: сәрсанбайефниң өлтүрүлүш сәвәби "шәхсий өчмәнлик"
2006.02.27
Қазақистан ички ишлар министири борҗан муқамәдҗаноф, қазақистан нағиз ақйол партийисиниң рәһбири алтунбек сәрсанбайефниң қазақистан парламентиниң юқири дәриҗилик әмәлдари утанбайеф билән болған " шәхсий өчмәнлики" сәвәбидин өлтүрүгәнликини җакарлиди.
Әмма нағиз ақйол партийиси вәқәни "буйруқ билән елип берилған", адәттики җинайәт әмәс, дәп қаримақта. Бурҗан муқамәдҗанофниң әскәртишичә, қазақистан парламенти юқири палатасиниң мәмури башқарма мудири ерҗан утанбайеф сәрсанбайеф билән " узундин бери давамлишип келиватқан шәхсий өчмәнлики" сәвәбидин уни өлтүрүшкә буйруқ бәргәнликини иқрар қилған. Утанбайеф өткән һәптә қолға елинған иди.
Бирақ өктичи гуруһлар утанбайефниң алтунбек сәрсанбайефни өлтүрүшкә буйруқ бериш күчи йоқлиқини әскәртип, президент назарбайефниң қизи дариға билән көйоғли раһәт алийефлар үстидин тәкшүрүш елип беришни тәләп қилған. Нағиз ақйол партийисиниң қошумчә рәиси толиген җукийеф, дүшәнбә күни тәкшүрүш хадимлириниң сәрсанбайеф вәқәсини утанбайеф пиланлиған, дегән қаришиқа ишәнмәйдиғанлиқини билдүрди. У, " бу адәттики җинайәт әмәс, буйруқ билән елип берилған сүйқәст " дәйду.
Бу арида қазақистанниң бәзи мәтбуатлири сәрсанбайеф сүйқәстиниң икки уйғур тәрипидин елип берилғанлиқини илгири сүргән. Уларниң әскәртишичә, бу икки уйғурни назарбайеф һөкүмитиниң юқири қатлимидики теги - тәкти уйғурлар билән четишлиқи бар бир әмәлдар пиланлиған болуши мүмкин. Көзәткүчиләрниң илгири сүрүшичә, шаңхәй гуруһи қурулғандин бери оттура асия җумһурийәтлиридә йүз бәргән сиясий җинайәтләрни уйғурлар билән мунасивәтлик, дәп қараш мәтбуатларниң әқлигә асан келидиған бир йол болуп қалған. (Әркин)
Мунасивәтлик мақалилар
- Қазақистанда һәр саһә алтунбекниң қатилини җазалашни тәләп қилди
- Сәрсанбайефниң өлүми қазақистанда сияси боран - чапқун чиқарди
- Қазақистан ақ йол партийиси рәиси алтунбекниң өлтүрүлүш дилоси мурәккәпләшмәктә
- Алтунбекниң өлүми сәвәбидин қазақистанниң бихәтәрлик министири истипа бәрди
- Қазақистанда алтунбекниң дәпнә мурасими өткүзүлди