Қирғизистан америкиниң манас айдурумини давамлиқ ишлитигә қошулди


2005.04.14
Share on WhatsApp
Share on WhatsApp

Америка дөләт мудапиә министири доналд рамсфилд қирғизистан пайтәхти бешкәкни зиярәт қилип, америка қисимлириниң бешкәктики манас һава армийә базисини давамлиқ ишлитиш тоғрисида қирғизистан даирилириниң мақуллиқини алди.

Рамсфилд, пәйшәнбә күни бешкәкдики зиярити җәрянида қирғизистан президенти бақийев билән сөһбәт өткүзди. Улар, қирғизистандики америка һәрбий базисиниң орни мәсилисини музакирә қилған. Бақийев мухбирларни күтүвелиш йиғинида, америка афғанистандики америка қисимлириға арқа сәп ярдими бериш вәзиписини өтәватқан бу базини давамлиқ ишләтсә болиду, дәп көрсәтти. Бирақ у, рамсфилд билән америкиниң авакс бәлгилилик чарлиғучи айрупиланлирини қирғизистанға орунлаштуруш тоғрисида музакирә елип барғанлиқини рәт қилған.

Рамсфилд, бешкәккә келишниң алдида афғанистан билән пакистанни зиярәт қилди. У афғанистанда президент карзай билән бихәтәрлик мәсилилирини шундақла афғанистандики америка қисимлириниң келәчигини музакирә қилди. Президент карзай, " афғанларниң америка билән орнатқан истратегийилик бихәтәрлик мунасивити, афғанистанниң өз өзини мудапиә қилишида пәвқуладдә әһмийәткә игә," дәп тәкитлигән.

Рамсфилд қирғизистанға йолуқушниң алдида пакистанни зиярәт қилип, президент пәрвиз мушәррәф билән сөһбәт елип барди. Пакистан америкиниң тәроризимға қарши күрәштики муһим иттипақдиши. Рамсфилд қирғизистанда бу йәрдики америка қисимлирини йоқлиди.

Франсийә ахбарат агентлиқиниң хәвәр қилишичә, һазир америкиниң қирғизистанда 1000 нәпәр әскири турмақтикән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.