Amérikining qirghizistandiki bash elchisi xoshlishish yighini ötküzdi

Amérikining qirghizistandiki bash elchisi, amérika, ottura asiyada kéngiyishni meqset qilmaydu, dédi.

Amérikining qirghizistandiki bash elchisi sitifan yong, qirghizistandiki siyasiy özgirishlerni medhiyilidi. Emma u, qirghizistanning sabiq prézidénti esqer aqayof hakimiyitining aghdurulushida amérikining qoli barliqi toghrisidiki xewerlerni ret qildi. Sitifan yong yéqinda qirghizistan bash elchisi wezipisidin ayrilmaqchi.

Amérika birleshme agéntliqining xewer qilishiche, stifan yong, charshenbe küni qirghizistanning paytexti béshkekte ötküzülgen widalishish yighinida bergen bayanatida, yéqinda qirghizistanda ötküzülgen prézidént saylimi üstide toxtilip " qirghizistan ottura asiya tarixidiki eng erkin we eng adaletlik bir saylam ötküzüsh arqiliq ottura asiyadiki pütün döletler üchün bir ülge yaratti" dégen.

Köpchilikke melum bolghandek, ötken ay qirghizistanda ötküzülgen prézidént saylimida, mart éyidiki xelq qozghilingidin kéyin qirghizistanning waqitliq prézidénti bolup wezipe öteshke bashlighan qurmanbég baqiyif, xelqning mutleq köp qismining awazini qolgha keltürüsh arqiliq qirghizistanning prézidénti bolup saylan'ghan.

Mart éyida qirghizistanda xelqning naraziliq herikiti netijiside hakimiyiti aghdurulghan esqer aqayéf, iyun éyida amérika hökümitini öz hakimiyitining aghdurulushida rol oynighan dep eyibligen. Aqayéfning éytishiche, ottura asiyada özining tesir da'irisini kéngeytish üchün tirishiwatqan amérika hökümiti, qirghizistanning rusiyini yaqlighan siyasitidin bi'aram bolghan.

Lékin, amérikining qirghizistandiki bash elchisi, aqayéfning bu muddi'alirini ret qilip, amérikining, rayondiki tesirini kücheytish üchün héchqandaq bir mexpiy pilani yoq, dédi. (Qanat)