Esqer aqayéf wezipisidin istipa bérishke qoshuldi

Qirghizistanning aghdurulghan prézidénti esqer aqayéf yekshenbe küni wezipisidin resmiy istipa bérishke qoshuldi. Buning bilen qirghizistanda heptilerdin boyan dawamliship kéliwatqan siyasiy muqimsizliqqa xatime bérildi.

Fransiye axbarat agéntliqining xewirige qarighanda, moskwagha qéchip bériwalghan esqer aqayéf yekshenbe küni qirghizistan parlaméntining wekiller ömiki bilen üch sa'etche söhbet ötküzgendin kiyin, wezipisidin resmiy istipa bérishqa qoshulghan. Buning bedilige, qirghizistan parlaménti esqer aqayéfning bixeterlikige kapaletlik qilishqa wede bergen.

Xewerde iytilishiche, esqer aqayéfning wezipisidin istipa bérish murasimi düshenbe küni ötküzülidiken.

Esqer aqayéf 24 - mart künidiki keng xelq naraziliq herikitidin kiyin, béshkektin qéchip ketken idi. Qirghizistan asasiy qanunida, prézidént choqum parlamént aldida istipa bérishi belgilen'gen. Biraq esqer aqayéfning qirghizistan'gha qaytip kelgendin kéyinki bixeterlikini közde tutup, qirghizistan asasiy qanun soti, esqer aqayéfning sürgünde turup istipa bérishini testiqlighan.

Esqer aqayéfning istipa bérishke qoshulushi, qirghizistanning yéngi rehberlirining qanunluq ornini téximu mustehkemlep, 26 - iyun künige békitilgen prézidént saylimigha yol échip berdi. (Arzu)