Қирғизистан парламенти әсқәр ақайефниң истипасини қобул қилишни кечиктүрди


2005-04-07
Share

Қирғизистан парламенти ағдурулған президент әсқәр ақайефниң истипасини қобул қилишни йәнә кечиктүрди. Парламент әзалириниң билдүрүшичә, улар әсқәр ақайефниң истипасини қобул қилиштини бурун, униң сабиқ президентлиқ салаһийити билән игә болидиған алаһидә имтиязлирини бикар қилишни халайдикән.

Америка бирләшмә ахбарат агентлиқиниң хәвригә қариғанда, қирғизистан парламентиниң әзалири, җүмә күни қайта йиғип ечип, әсқәр ақайефниң истипасини қобул қилишни музакирә қилмақчи вә бу арқилиқ йеңи президент сайлимиға йол ачмақчи болған.

Қирғизистан парламенти пәйшәнбә күни йәнә 26 - июн күнигә бекитилгән йеңи президент сайлимини бикар қилған. Униң билдүрүшичә, қирғизистан парламенти әсқәрақайефниң истипасини қобул қилғандин кийин, андин президент сайлиминиң йеңи вақит җәдвилини бекитидикән.

Ағдурулған қирғизистан президенти әсқәр ақайеф икки һәптә аввал русийигә қечип кәткән иди. Әсқәр ақайефниң истипа бериш нутуқи тартилған синалғу линтиси пәйшәнбә күни қирғизистан парламентида қоюлған. У истипа бериш нутуқида " мән һичқандақ виҗдан азаби тартмай вәзипәмдин истипа бериватимән, чүнки мән қолумни өз хәлқимниң қени билән бойимидим, ички урушниң алдини алдим " дегән.

Бу синалғу линтиси дүшәнбә күни москвада тартилған. Қирғизистан парламентиниң вәкиллири униң билән москвада сөһбәт өткүзгәндин кийин, әсқәр ақайеф дүшәнбә күни вәзиписидин истипа бәргән иди. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт