Қирғизистан парламенти, сабиқ президент ақайевниң алаһидә имтиязлирини бикар қилди


2005-04-08
Share

Қирғизистан парламенти җүмә күни беләт ташлап, қирғизистанниң бешкәктики хәлқ инқилабида ағдуруветилгән сабиқ президенти әсқәр ақайевниң һәр хил имтиязлирини бикар қилди.

Парламент ақайевниң буниңдин кейин һакимийәт вә парламент хизмитигә арлишишини чәклигән шундақла ақайев аилисиниң қануни җавапкарлиқтин чәттә қалмайдиғанлиқини қарар қилған. Шуниң билән биргә ақайевниң вәзиписидин истипа бериш шәртлирини қобул қилиш яки рәт қилишни авазға қоюш кечиктүрүлди. Қирғизистан парламенти, ақайев истипа бәргәндин кейин қандақ имтиязлардин бәһриман болидиғанлиқини айдиңлаштурувелиш керәк, дәп көрсәткән.

Парламентниң җүмә күнки қарари бойичә, ақайевниң дөләт мәҗлиси, қирғизистан дөлити вә һөкүмәт органлирида баянат елан қилишини чәклигән шундақла униң бешкәктики икки туралғуси билән шәхси китабханисини мусадирә қилинған.

Парламентикиләр, ақайев аилисиниң қилған хиянәтчиликини сүрүштүрүшни тәләп қилған. Парламентниң ақайев тоғрисида чиқарған қарари, президент бақийев тәстиқлиғандин кейин күчкә игә болидикән. Бирақ ақайев, өзиниң қирғизистан асаси қануни бойичә җавабкарлиққа тартилмаслиқим керәк, дәп қарайдиғанлиқини тәкитлигән. У мундақ дәйду: " мән ишинимәнки мениң қирғизистанға рәһбәрлик қилған күнлирим тарихниң муәйәнләштүрүшигә еришиду."

Қирғизистан парламенти алдимиздики дүшәнбә күни ақайевниң истипасини парламент әзалириниң беләт ташлишиға сунидикән шундақла бу йил 6 - айда елип берилидиған президент сайлимини музакирә қилидикән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт