Qirghizistan, sabiq prézidént aqayéwning mal - mülkini tekshüridu

Qirghizistan hökümiti jüme küni sabiq qirghizistan prézidénti aqayéw we uning a'ilisi bilen munasiwetlik 42 shirketning tizimlikini élan qilip, bu shirketler üstidin tekshürüsh élip baridighanliqini jakarlidi.

Qirghizistan hökümiti, aqayéw we uning uruq - tuqqanlirining tijaret pa'aliyitini tekshüridighan mexsus komitét qurup chiqqan. Tizimliktiki shirketler altun kéni, sémont zawutliri, soda merkizi, chong gézitler we téléwiziye istansiliri, béshkektiki kechlik kulublar shundaqla aliy derijilik résturanlarni öz ichige alghan.

B b s ning ilgiri sürüshiche, aqayéw jemetidikilerning tijaret pa'aliyiti, ottura asiya döletliridiki asasliq chong karxanilar bilen chétilidiken. Hazirgha qeder rusiyide panaliniwatqan aqayéw, qirghiz metbu'atlirining uning jemeti heqqidiki eyibleshlirini siyasiy meqset arlashqan, dep ret qilmaqtiken.

En'giliye axbarat tori b b s, amérika qisimlirigha ijarige bérilgen béshkektiki manas aydurumining tekshürüsh ichige élin'ghanliqini bildürdi. Emma aqayéwning qizi bermit, tizimliktiki nurghun shirketlerning dölet igilikidiki karxanilar bolup, aqayéw a'ilisi bilen munasiwiti yoqliqini tekitligen.

Dölet mülkini özining qiliwélish bilen eyiblen'gen aqayéwning mal mülkini bashqurush hoquqi bermit aqayéw we uning yoldishining ilkide, dep qaralghan.Aqayéw 24 - marttiki xelq inqilabida rusiyige qéchip ketken idi. (Erkin)