Xitay prézidént kütüpxanisini qurush üchün pul bergenlikini inkar qildi


2005-05-01
Share

Qirghizistan xewer agéntliqlirining uchurigha qarighanda, 30-aprél küni xitayning qirghizistanda turushluq elchixanisi mexsus muxbirlarni kütüwélish yighini ötküzüp, xitay hökümitining esqer aqayéw kütüpxanisini qurush üchün 80 milyon yü'en bergenlikini inkar qildi. Chünki, 25-aprel küni mu'awin qirghizistan bash ministiri usénop sabiq hökümetning parixorluq ishlirini tenqid qilghanda aqayéwning prézidént kütüpxanisini qurush üchün xitaydin pul alghanliqini eskertken.

Xitay terep 2004-yili bishkek bilen béyjing arisida ikki soda hemkarliq kélishimi tüzülgenlikini emma, bularning héchqaysisining siyasiy yaki iqtisadiy shertler asasida bolmighanliqini eskertti. Xitay wekilining bu sözni qoshumche qilishigha seweb bolghan amil, yéqindin buyan qirghizistan öktichiliri aqayéw hökümitini xitayning türlük siyasiy shertlirige könüsh bedilige xitaydin pul alghan dep eyibligenliki idi.

Yene bir qisim insan heqliri küzetküchiliri bolsa, xitay hökümitining qirghizistandiki Uyghur milliy heriketlirini tosush, Uyghurlarning musteqilliq heriketlirige birlikte qarshi turush üchün qirghizistan da'irilirige da'im iqtisadiy yardemlerni bérip turghanliqini körsitishmekte.

Xewerlerge qarighanda hazir yéngi hökümet aqayéw we bashqa sabiq qirghizistan rehbiriy xadimlirining parixorluq ehwalini, ularning bayliqlirini éniqlash ishlirini bashlighan. (Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet