Amérika qazaqistanni metbu'at erkinlikini boghqanliqi bilen eyiblidi


2006-06-21
Share

Amérika hökümiti charshenbe küni qazaqistan'gha qaratqan teleppuzini qattiqlashturup, qazaqistanning axbaratchiliq qanunini özgertishining metbu'at erkinlikini boghup qoyidighanliqini eyiblidi.

Roytérs agéntliqining xewer qilishiche, amérikining qazaqistandiki bash elchisi jon ordwéy " metbu'at qanunlirigha yéngidin kirgüzülmekchi boluwatqan qoshumche maddilar, qazaqistanda metbu'at erkinlikining ilgiri sürülishige chong tesir yetküzidu" dédi.

Uning bu qétimqi teleppuzi bir qeder qattiq bolup, bu amérikining buningdin awwal qazaqistan'gha tutup kéliwatqan pozitsiyisidin köp perqliq boldi. Nurghun analizchilar amérikini rusiye bilen ottura asiyada küch talishish üchün xélidin béri qazaqistan'gha yumshaq pozitsiye tutup kelgen dep qaraydu. Emma jon ordwéy charshenbe küni muxbirlargha " méning bu sözlirimdin qazaqistan hökümitining aldin'ala xewiri yoq bolghan bolsa, buningdin emdi xewiri bolidu" dégen.

Yéngidin kirgüzülmekchi boluwatqan bu maddilar qazaqistan parlaméntining maqullishigha sunulidighan bolup, bu maddilar hökümetning zhornalistlargha qaratqan kontrolluqini téximu kücheytip, axbarat erkinlikini cheklep qoyidiken. Emma qazaqistan hökümiti özgertilidighan bu maddilarni aqlap, hökümetning haman ammining metbu'atqa bolghan ishenchisini qoghdaydighanliqini bildürdi.

Hazirmu qazaqistan metbu'atliri prézidént nursultan nazarbayéwni tenqidleydighan maqalilarni élan qilishtin özini tartidu. Shundaqla 2005‏- yilidin buyan ikki neper qazaq öktichi rehbiri öltürülgen bolsimu, lékin metbu'atlarda bu xewerge nahayiti az orun bérildi. (Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet