Қазақистандики балқаш көли тәһдиткә учримақта


2005.09.28

Тәтқиқатчилар қазақистандики балқаш көлиниң қуруп йоқилиш тәһдитигә учраватқанлиқини агаһландурди. Әнгилийә б б д радио - телевизийисиниң хәвиригә қариғанда, оттура асиядики төтинчи чоң көл һисабланған балқаш көлиниң сүйи өткәнки нәччә он йил ичидә җиддий төвәнләп кәткән.

Хәвәрниң мутәхәсисләрниң сөзини нәқил кәлтүрүшичә, су йүзиниң төвәнләп кетиши қисмән җәһәттин нормал болсиму, әмма асаслиқи инсанларниң паалийити кәлтүрүп чиқарған. Хәвәрдә ейтилишичә, балқаш көлиниң асаслиқ мәнбәси или дәряси болуп, нөвәттә хитай һөкүмити ғәрбни ечиш еһтияҗини қандуруш үчүн дәря сүйини тармақ еқинларға еқитип, балқаш көлигә қоюлишини тосимақта.

Қазақистандики муһит асриғучилар, хитайниң бу қилмишиниң районниң екелогийилик тәңпуңлиқиға еғир зиян селиватқанлиқини билдүрди һәмдә балқаш көлиниң қуруп кетишиниң хитайғиму охшашла пайдисиз икәнликини көрсәтти.

Йәрлик биологийә мутәхәссислириниң мөлчәрлишичә, балқаш көлиниң қуруп кетиши кәлтүрүп чиқиридиған екелогийилик хәвпи дунядики әң еғир екилогийилик апәттинму чоң болуши мумкин икән.

Әгәр хитай ели дәрясиниң сүйини давамлиқ башқа тармақ еқинларға айривалса, у һалда балқаш көли райониниң келимати тәсиргә учрап, бу районниң техиму қумлишишини кәлтүрүп чиқиридикән. Бу районда яшайдиған 3 милйондин артуқ аһалә сиртқа көчүшкә мәҗбур болуп, чоң бир апәт келип чиқидикән. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.