Qirghizistan hökümiti siyasi krizisning bosughisidin qaytti

• 
  2006-05-02

Qirghizistanda seyshenbe küni hökümettiki 13 neper ministirning wezipisidin kolléktip istipa bérishi bilen siyasi weziyet birdinla ötkürliship ketkendin kéyin, prézidént qurmanbék baqiyéw istipa bergüchi ministirlar bilen körüshüp, ularni istipa bérishtin waz kéchishke qayil qildi.

Qirghizistan hökümitini ötküzüwalghili bir yildin éship qalghan bolsimu, lékin hazirghiche qirghizistanda démokratiye we islahat élip bérish we muqimliqni ornitish wedisini emelge ashurulmighan baqiyéw, seyshenbe küni hökümet ichki kabintidiki 17 neper ministirning 13 ning istipa bérish xewpige duch kelgen.

Qirghizistan mu'awin bash ministiri adaxan madimarowning eskertishiche, "baqiyéw ministirlarning istipanamisini qobul qilmighan." Lékin madimarow, 13 neper ministirning istipasigha némining sewebchi bolghanliqini chüshendürmigen. Wezipisidin istipa bergen ministirlar ichide maliye we tashqi ishlar ministirliri bar.

Baqiyéw hökümiti öktichilerning démokratik islahat élip bérish bésimigha duch kelmekte. Ötken hepte paytext béshkékning alatow meydanidiki öktichiler yighilishida, prézidént qurmanbék baqiyéwtin 27 -mayghiche démokratik islahat yolida konkrét tedbir élish telep qilindi. Qirghizistan hökümet bayanatchisining eskertishiche, istipachi ministirlar ötken hepte parlaméntning tenqidige uchrighandin kéyin wezipisidin istipa bermekchi bolghan.

Gherb elliri qirghizistan weziyitige yéqindin diqqet qilmaqta. Yawropa ittipaqi shu küni qirghizistan weziyitidin ensirewatqanliqini bildürgen we béshkek hökümitini démokratik islahat qedimini tézlitishke chaqirghan idi. (Erkin)