Қирғизистан һөкүмити сияси кризисниң босуғисидин қайтти

Қирғизистанда сәйшәнбә күни һөкүмәттики 13 нәпәр министирниң вәзиписидин коллектип истипа бериши билән сияси вәзийәт бирдинла өткүрлишип кәткәндин кейин, президент қурманбек бақийев истипа бәргүчи министирлар билән көрүшүп, уларни истипа бериштин ваз кечишкә қайил қилди.

Қирғизистан һөкүмитини өткүзүвалғили бир йилдин ешип қалған болсиму, лекин һазирғичә қирғизистанда демократийә вә ислаһат елип бериш вә муқимлиқни орнитиш вәдисини әмәлгә ашурулмиған бақийев, сәйшәнбә күни һөкүмәт ички кабинтидики 17 нәпәр министирниң 13 ниң истипа бериш хәвпигә дуч кәлгән.

Қирғизистан муавин баш министири адахан мадимаровниң әскәртишичә, "бақийев министирларниң истипанамисини қобул қилмиған." Лекин мадимаров, 13 нәпәр министирниң истипасиға неминиң сәвәбчи болғанлиқини чүшәндүрмигән. Вәзиписидин истипа бәргән министирлар ичидә малийә вә ташқи ишлар министирлири бар.

Бақийев һөкүмити өктичиләрниң демократик ислаһат елип бериш бесимиға дуч кәлмәктә. Өткән һәптә пайтәхт бешкекниң алатов мәйданидики өктичиләр йиғилишида, президент қурманбек бақийевтин 27 -майғичә демократик ислаһат йолида конкрет тәдбир елиш тәләп қилинди. Қирғизистан һөкүмәт баянатчисиниң әскәртишичә, истипачи министирлар өткән һәптә парламентниң тәнқидигә учриғандин кейин вәзиписидин истипа бәрмәкчи болған.

Ғәрб әллири қирғизистан вәзийитигә йеқиндин диққәт қилмақта. явропа иттипақи шу күни қирғизистан вәзийитидин әнсирәватқанлиқини билдүргән вә бешкәк һөкүмитини демократик ислаһат қәдимини тезлитишкә чақирған иди. (Әркин)