Qirghizistan bilen türkiye iqtisadiy hemkarliq kélishimi imzalidi

Qirghizistan prézidénti qurmanbék baqiyéw düshenbe küni bashlighan türkiyidiki ziyaritini dawamlashturuwatidu. Baqiyéw düshenbe küni türkiye prézidénti nejdet sezer bilen körüshken.

Türkiye prézidénti nejdet sezer, prézidént baqiyifni kütüwélish murasimida qilghan sözide, qirghizistan prézidéntining türkiye ziyariti, türkiye bilen qirghizistanning öz-ara munasiwetlirini we ikki dölet otturisida mewjut hemkarliqini téximu tereqqiy qildurush iradisining bir ipadisi hésablinidu, dégen.

Qirghizistan prézidénti baqiyéw bergen bayanatida, qirghizistan bilen türkiye otturisidiki hemkarliqining kütülgen sewiyide emeslikini, ikki terepning qarari we iradisi bu kemchilikni toluqlaydighanliqini bildürgen.

Seyshenbe küni bolsa baqiyéw türkiye bash ministiri rejep tayib erdoghan bilen uchriship, türkiye bilen qirghizistan otturisida mewjut dostluq we hemkarliqini téximu tereqqiy qildurush mesilisi üstide söhbetleshti. Xewerlerge qarighanda, seyshenbe küni türkiye bilen qirghizistan otturisida töt chong iqtisadiy hemkarliq kélishimi imzalan'ghan.

Qirghizistan bilen yéqin tarixy, milliy we diniy munasiwetlerge ige bolghan türkiye, qirghizistanning dunyadiki tötinchi iqtsadiy shériki bolup, qirghizistan’ gha eng köp meblegh séliwatqan ikkinchi dölet hésablinidiken. (Qanat)